ആഗ്ര (ഉത്തർപ്രദേശ്): താജ്‌മഹൽ ഈസ്‌റ്റ് ഗേറ്റിന് സമീപത്തെ മുസ്‌ലിം പള്ളി പരിസരത്ത് പെൺകുട്ടിയുടെ മൃതദേഹം കണ്ടെത്തി. നഗ്ല-പൈമ റോഡിലെ പള്ളി പരിസരത്താണ് പെൺകുട്ടിയുടെ മൃതദേഹം കാണപ്പെട്ടത്. ഇന്ന് വൈകിട്ട് മൂന്ന് മണിയോടെ പള്ളിയിൽ പ്രാർത്ഥനയ്ക്കായി എത്തിയ ആളുകളാണ് പെൺകുട്ടിയുടെ മൃതദേഹം കിടക്കുന്നത് കണ്ടതെന്ന് ഡെപ്യൂട്ടി പൊലീസ് കമ്മീഷണർ സൂരജ് റായ് പറഞ്ഞു.
പെൺകുട്ടിയെ ബലാത്സംഗം ചെയ്‌ത ശേഷം കൊലപ്പെടുത്തിയതാകാമെന്ന് പൊലീസ് ഉദ്യോഗസ്ഥൻ പറഞ്ഞു. പെൺകുട്ടി ആരെന്ന് തിരിച്ചറിയാതിരിക്കുവാൻ മുഖം കല്ലുകൊണ്ട് ഇടിച്ച് വികൃതമാക്കിയ നിലയിലാണ്. പെൺകുട്ടി ആരാണെന്ന് ഇതുവരെ കണ്ടെത്താനായിട്ടില്ല. പ്രായം 25-26 വയസിനിടയിലാണെന്നും ഡിസിപി സൂരജ് റായ് പറഞ്ഞു.