ന്യൂഡൽഹി : സായുധ സേന നവീകരിക്കേണ്ടത് അത്യാവശ്യമാണെന്ന് എയർ സ്റ്റാഫ് ചീഫ്, എയർ ചീഫ് മാർഷൽ വി ആർ ചൗധരി. വര്‍ധിച്ചുവരുന്ന സുരക്ഷ വെല്ലുവിളികൾക്കിടയിലും ഇന്ത്യന്‍ സായുധ സേനയുടെ നവീകരണത്തിനായി നിക്ഷേപം നടത്തേണ്ടത് അത്യാവശ്യമാണെന്നാണ് വി ആർ ചൗധരി ചൊവ്വാഴ്‌ച പറഞ്ഞത്. ഇന്ത്യൻ എയർഫോഴ്‌സ്, കോളജ് ഓഫ് എയർ വാർഫെയർ, സെൻ്റർ ഫോർ എയർ പവർ സ്റ്റഡീസ് എന്നിവ സംയുക്തമായി സംഘടിപ്പിച്ച സെമിനാറിൽ പങ്കെടുത്ത് സംസാരിക്കുകയായിരുന്നു അദ്ദേഹം.
ചരിത്ര സംഭവങ്ങളും മാറിക്കൊണ്ടിരിക്കുന്ന അന്താരാഷ്ട്ര സാഹചര്യങ്ങളുമാണ് ഇന്ത്യയുടെ തന്ത്രവൈദഗ്‌ധ്യം രൂപപ്പെടുത്തിയത്. ഇത് സ്വയംഭരണം, അതിര്‍ത്തി സംരക്ഷണം എന്നിവയ്‌ക്ക് പ്രാധാന്യം നല്‍കുന്നതാണെന്ന് വി ആർ ചൗധരി പറഞ്ഞു. അതിർത്തി തർക്കങ്ങളും തീവ്രവാദവും മുതൽ സൈബർ ഭീഷണികളും പ്രാദേശിക പ്രശ്‌നങ്ങളും വരെയുള്ള ഇന്ത്യ നേരിടുന്ന ബഹുമുഖ വെല്ലുവിളികളെ കുറിച്ചും അദ്ദേഹം സംസാരിച്ചു. ഇന്ത്യയുടെ സായുധ സേനയെ നവീകരിക്കുക, നയതന്ത്ര ബന്ധം വളര്‍ത്തുക, ആയുധങ്ങളുടെ ഉത്പാദനം വർധിപ്പിക്കുക, സമഗ്ര സുരക്ഷ ഉറപ്പുവരുത്തുക എന്നിവയ്‌ക്ക് പ്രാധാന്യം നല്‍കേണ്ടതിന്‍റെ ആവശ്യകത അദ്ദേഹം ഊന്നിപ്പറഞ്ഞു.