മുംബൈ: വളര്‍ത്തുനായയെ അമ്മ അടിച്ചതിന്‍റെ പേരില്‍ ആത്മഹത്യ ചെയ്‌ത് പതിനാലു വയസുകാരന്‍. മഹാരാഷ്‌ട്ര ഛത്രപതി സംഭാജിനഗറിലെ മിൽകോർണർ ഏരിയയിലാണ് സംഭവം. അമ്മ പലചരക്ക് കട നടത്തിവരികയാണ്. ഇവരുടെ ഏകമകനാണ് മരിച്ച രാജ്‌വീര്‍. വീടിന്‍റെ അകം മലിനമാക്കിയതിന് വെള്ളിയാഴ്‌ചയാണ് കുട്ടിയുടെ അമ്മ നായയെ മർദിച്ചത്.
ആ സമയം കുട്ടി തൻ്റെ സുഹൃത്തുക്കളോടൊപ്പം വീടിന് പുറത്ത് ഇരിക്കുകയായിരുന്നു. നായയെ മര്‍ദിച്ചതിന് ശേഷം അമ്മ കുട്ടിയോട് ദേഷ്യപ്പെടുകയും ചെയ്‌തു. ഇതിന് പിന്നാലെ കിടപ്പുമുറിയിൽ പോയ 14-കാരന്‍ ജീവനൊടുക്കുകയായിരുന്നു. അമ്മയും അയൽവാസികളും ചേര്‍ന്ന് ഉടൻ തന്നെ അബോധാവസ്ഥയിലായ കുട്ടിയെ ഘാട്ടി ആശുപത്രിയിൽ പ്രവേശിപ്പിച്ചുവെങ്കിലും ജീവന്‍ രക്ഷിക്കാനായില്ല.