ഇന്ത്യയുടെ പതിനൊന്നാമത് രാഷ്ട്രപതിയും പ്രശസ്‌ത ശാസ്ത്രജ്ഞനുമായ ഡോ. എ പി ജെ അബ്‌ദുല്‍ കലാമിനോടുള്ള ബഹുമാനാര്‍ഥം എല്ലാ വർഷവും ഒക്ടോബർ 15 ന് ലോക വിദ്യാർഥി ദിനമായി ആചരിക്കുന്നു. രാജ്യത്തെ വിദ്യാര്‍ഥികളെയും യുവാക്കളെയും സ്വപ്‌നം കാണാൻ പഠിപ്പിച്ച കലാമിന്‍റെ ജന്മവാർഷികത്തോട് അനുബന്ധിച്ച് വിദ്യാഭ്യാസം, ശാസ്ത്രം ഉള്‍പ്പെടെയുള്ള വിവിധ മേഖലകളില്‍ രാജ്യത്തുടനീളം പ്രത്യേക പരിപാടികള്‍ സംഘടിപ്പിക്കാറുണ്ട്. 2010 മുതലാണ് ഐക്യരാഷ്ട്രസഭ ഒക്ടോബര്‍ 15 ലോക വിദ്യാർഥി ദിനമായി ആചരിക്കാൻ തുടങ്ങിയത്.
വിദ്യാർഥികള്‍ക്ക് ഏറെ പ്രിയപ്പെട്ട അധ്യാപകനും ശാസ്ത്രജ്ഞനുമായിരുന്നു കലാം. കുട്ടികളുമായി ഇടപഴകുക എന്നതായിരുന്നു അദ്ദേഹത്തിന്‍റെ ഏറ്റവും പ്രിയപ്പെട്ട പ്രവർത്തനങ്ങളിലൊന്ന്. ഇതിനായി അദ്ദേഹം രാജ്യത്തുടനീളം സഞ്ചരിച്ചു, സ്‌കൂളുകളും കോളേജുകളും സർവകലാശാലകളും സന്ദർശിച്ചിരുന്നു, വിവിധ പരിപാടികളിലും അഭിമുഖങ്ങളിലുമായി വിദ്യാർഥികളുടെ എല്ലാ ചോദ്യങ്ങൾക്കും അദ്ദേഹം ഉത്തരം നൽകി, വലിയ സ്വപ്‌നങ്ങൾ കാണാൻ വിദ്യാര്‍ഥികളെ അദ്ദേഹം പ്രേരിപ്പിച്ചു.
വിദ്യാര്‍ഥികളുമായുള്ള അദ്ദേഹത്തിന്‍റെ ഇടപെടലുകള്‍ അദ്ദേഹത്തിന്‍റെ ജീവിതത്തിലെ ഹൃദയസ്‌പർശിയായ നിമിഷങ്ങളായി ഓർമിക്കപ്പെടുന്നു. അധ്യാപനത്തിലൂടെ തന്നെ ലോകം ഓർക്കണമെന്നായിരുന്നു അദ്ദേഹം ആഗ്രഹിച്ചത്. ഇന്ത്യയിലും വിദേശത്തുമായി 48 സർവകലാശാലകളിൽ നിന്ന് ഓണററി ഡോക്‌ടറേറ്റുകൾ കലാം സ്വന്തമാക്കിയിരുന്നു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക