ಮಕ್ಕಳ ಸ್ಕ್ರೀನ್​ ಟೈಂ ಕಡಿಮೆ ಮಾಡಿ, ಆರೋಗ್ಯಯುತ ಡಿಜಿಟಲ್​ ಬಳಕೆಗೆ ಪ್ರೋತ್ಸಾಹಿಸಲು ಇಲ್ಲಿದೆ ಪರಿಹಾರ - screen time for children

ಅತಿಯಾದ ಡಿಜಿಟಲ್​ ಬಳಕೆಯಿಂದ ಮಕ್ಕಳನ್ನು ದೂರ ಮಾಡಲು ಪೋಷಕರು ಕೂಡ ಆರೋಗ್ಯಯುತ ಗಡಿ ರೂಪಿಸುವ ಅವಶ್ಯಕತೆ ಇದೆ.

ಹೈದರಾಬಾದ್​: ಡಿಜಿಟಲ್​ ಯುಗದಲ್ಲಿ ಇಂದು ಮಕ್ಕಳು ತಮ್ಮ ಬಹುಪಾಲು ಸಮಯವನ್ನು ಸ್ಮಾರ್ಟ್​ಫೋನ್​, ಲ್ಯಾಪ್​ಟಾಪ್​ಗಳ ಜೊತೆಯೇ ಕಳೆಯುತ್ತಿದ್ದಾರೆ. ಇದರಿಂದ ಮಕ್ಕಳ ಆರೋಗ್ಯದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುತ್ತಿದೆ. ಈ ನಿಟ್ಟಿನಲ್ಲಿ ಪೋಷಕರು ಮಕ್ಕಳು ಡಿಜಿಟಲ್​ ಸಾಧನಗಳ ಬಳಕೆಗೆ ಆರೋಗ್ಯಕರ ಗಡಿ ರೂಪಿಸಬೇಕಿದೆ. ಟೆಕ್​ಗಳ ಜೊತೆಗೆ ಅವರ ಆರೋಗ್ಯ ಸಮತೋಲನ ಸಾಧಿಸಬೇಕಿದೆ. ಈ ನಿಟ್ಟಿನಲ್ಲಿ ಈ ಪ್ರಮುಖ ಆರು ಕ್ರಮಗಳನ್ನು ನಡೆಸುವ ಮೂಲಕ ತಂತ್ರಜ್ಞಾನ ಮತ್ತು ಆರೋಗ್ಯದ ನಡುವೆ ಉತ್ತಮ ಸಂಬಂಧ ಏರ್ಪಡಿಸಬಹುದು.

ಉದಾಹರಣೆಯಾಗಿ: ಮಕ್ಕಳ ಕಲಿಕೆ ತಮ್ಮ ಸುತ್ತಮುತ್ತಲಿನ ವಾತಾವರಣವನ್ನು ಆಧರಿಸಿದೆ. ಈ ಹಿನ್ನೆಲೆಯಲ್ಲಿ ಅವರಿಗೆ ಸಕಾರಾತ್ಮಕ ಉದಾಹರಣೆಯಾಗಿ ನೀವಿರಬೇಕು. ಪೋಷಕರು ಸ್ಕ್ರೀನ್​ ಟೈಮ್​ ಅನ್ನು ಸಿಮೀತಗೊಳಿಸಿ, ಮಕ್ಕಳ ಜೊತೆಗೆ ಓದುವ, ಹೊರಾಂಗಣ ಚುಟುವಟಿಕೆಯಲ್ಲಿ ಆಟವಾಡುವ ಅಥವಾ ಇನ್ನಿತರ ಹವ್ಯಾಸ ರೂಢಿಸಿಕೊಳ್ಳುವ ಮೂಲಕ ಅವರಿಗೆ ಮಾದರಿಯಾಗಬೇಕು.

ಸ್ಪಷ್ಟ ನಿಯಮ ರೂಪಿಸಿ: ಸ್ಕ್ರೀನ್​ ಟೈಮ್​ ಕುರಿತಾಗಿ ಮಕ್ಕಳಿಗೆ ಸ್ಪಷ್ಟವಾಗಿ ತಿಳಿಸಿಕೊಡಿ. ಪ್ರತಿಬಾರಿ ಅವರು ಡಿಜಿಟಲ್​ ಸಾಧನವನ್ನು ಯಾವಾಗ ಮತ್ತು ಯಾವ ಉದ್ದೇಶಕ್ಕೆ ಬಳಕೆ ಮಾಡಬಹುದು ಎಂಬ ಕುರಿತು ಮಿತಿ ರೂಪಿಸಿ. ಮಕ್ಕಳಿಗೆ ಈ ಸ್ಥಿರತೆ ಕಾಪಾಡುವ ಪ್ರಾಮುಖ್ಯತೆಯನ್ನು ಅರ್ಥಮಾಡಿಸಬೇಕು.

ಟೆಕ್​ ಫ್ರೀ ವಲಯ ರೂಪಿಸಿ: ನಿಮ್ಮ ಮನೆಯಲ್ಲಿ ಕೆಲವು ನಿರ್ದಿಷ್ಟ ಪ್ರದೇಶಗಳನ್ನು ಅಂದರೆ, ಬೆಡ್​ರೂಂ, ಡೈನಿಂಗ್​ ರೂಮ್​ನಂತಹ ಪ್ರದೇಶಗಳನ್ನು ಟೆಕ್​ ಮುಕ್ತವಲಯವಾಗಿ ಘೋಷಿಸಿ. ಇಲ್ಲಿ ಕುಟುಂಬದ ಸದಸ್ಯರು ಕೂಡ ಟೆಕ್​ ಬಳಕೆ ಮಾಡದಂತೆ ನಿಯಮ ತರುವ ಜೊತೆಗೆ ಮುಖಾಮುಖಿ ಸಂವಹನ, ವಿಶ್ರಾಂತಿಗೆ ಆದ್ಯತೆ ನೀಡಿ.

ಸಮತೋಲಿತ ಚಟುವಟಿಕೆಗೆ ಪ್ರೋತ್ಸಾಹಿಸಿ: ಸ್ಕ್ರೀನ್​ ಆಧಾರಿತ ಚಟುವಟಿಕೆ ಹೊರತಾಗಿ ಕೆಲವು ವಿವಿಧ ರೀತಿಯ ಚಟುವಟಿಕೆಗಳಿಗೆ ಅಂದರೆ ಹೊರಾಂಗಣ ಚಟುವಟಿಕೆ, ಓದುವಿಕೆ, ಕ್ರಿಯಾತ್ಮಕ ಚಟುವಟಿಕೆ ಮತ್ತು ಕುಟುಂಬ ಮತ್ತು ಸ್ನೇಹಿತರೊಂದಿಗೆ ಸಾಮಾಜಿಕ ಸಂವಹನಕ್ಕೆ ಪ್ರೇರೇಪಿಸಿ. ಅವರ ವಯಸ್ಸಿಗೆ ಅನುಗುಣವಾಗಿ ಬುಕ್​, ಕಲೆ ಸಾಮಗ್ರಿ, ಕ್ರೀಡಾ ಸಾಮಗ್ರಿಗಳನ್ನು ನೀಡುವ ಮೂಲಕ ಇದರಿಂದ ದೂರವಿಡಿ.

ಸ್ಕ್ರೀನ್​ ಟೈಮ್​ ಹೊರತಾದ ಕೆಲಸಕ್ಕೆ ರಿವಾರ್ಡ್​ ನೀಡಿ: ಸ್ಕ್ರೀನ್​ಟೈಮ್​ ಹೊರತಾಗಿ ಮಕ್ಕಳನ್ನು ತಮ್ಮ ಕೆಲಸ ಮಾಡಲು ಪ್ರೇರೇಪಿಸಿ, ಹೋಂ ವರ್ಕ್​, ದೈಹಿಕ ಚಟುವಟಿಕೆ ಪೂರೈಸಿದಲ್ಲಿ ಅದಕ್ಕೆ ಪುಟ್ಟ ಬಹುಮಾನ ನೀಡುವುದಾಗಿ ತಿಳಿಸಿ. ಈ ಕಾರ್ಯವೂ ಮಕ್ಕಳನ್ನು ಜವಾಬ್ದಾರಿಯುತವಾಗಿ ಮಾಡಲು ಸಹಾಯ ಮಾಡುತ್ತದೆ.

ಜೊತೆಯಾಗಿ ಚಟುವಟಿಕೆಯಲ್ಲಿ ಭಾಗಿಯಾಗಿ: ಮಕ್ಕಳು ಒಬ್ಬರೇ ಡಿಜಿಟಲ್​ ಬಳಕೆ ಮಾಡಲು ಬಿಡದೇ , ಈ ವೇಳೆ ಅವರ ಜೊತೆಗೆ ಪೋಷಕರು ಭಾಗಿಯಾಗುವುದು ಉತ್ತಮ. ಅವರ ಆಟ, ಸಿನಿಮಾ ಮತ್ತು ಶಿಕ್ಷಣದ ವಿಚಾರದಲ್ಲಿ ಭಾಗಿಯಾಗುವುದರಿಂದ ಅವರು ಏನು ಮಾಡುತ್ತಿದ್ದಾರೆ ಎಂಬ ಅರಿವು ಇರಲಿದೆ.

ಇದನ್ನೂ ಓದಿ: ಹೃದಯಕ್ಕೆ ಹಾನಿ; ಮಕ್ಕಳ ಮೊಬೈಲ್, ಟಿವಿ​​​​​ ವೀಕ್ಷಣೆಗೆ ಬೇಕಿದೆ ಕಡಿವಾಣ.. ಇಲ್ಲದಿದ್ದರೆ ಆಗುವ ಅವಾಂತರ ಹೇಳೋಕಾಗಲ್ಲ