ಶೀಘ್ರದಲ್ಲೇ MSMEಗಳಿಗಾಗಿ ₹100 ಕೋಟಿ ವರೆಗಿನ ಸಾಲ ಖಾತ್ರಿ ಯೋಜನೆ ಜಾರಿ: ನಿರ್ಮಲಾ ಸೀತಾರಾಮನ್

ಸಂಪುಟ ಸಭೆ ಅನುಮೋದನೆ ಸಿಕ್ಕ ಕೂಡಲೇ ಬ್ಯಾಂಕ್ ಮೂಲಕ ಸಾಲ ಖಾತ್ರಿ ಯೋಜನೆ ಜಾರಿಯಾಗಲಿದೆ ಎಂದು ಕೇಂದ್ರ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ತಿಳಿಸಿದ್ದಾರೆ.

ಬೆಂಗಳೂರು: ಶೀಘ್ರದಲ್ಲೇ ಎಂಎಸ್ಎಂಇಗಳಿಗಾಗಿ(ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಉದ್ಯಮ) 100 ಕೋಟಿ ರೂ. ವರೆಗಿನ ಸಾಲ ಖಾತ್ರಿ ಯೋಜನೆ ಜಾರಿಯಾಗಲಿದೆ ಎಂದು ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ತಿಳಿಸಿದರು. ನಗರದಲ್ಲಿ ನಡೆದ ಎಂಎಸ್ಎಂಇ ಕ್ಲಸ್ಟರ್ ಔಟ್ ರೀಚ್ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಕೇಂದ್ರ ಬಜೆಟ್ ಘೋಷಣೆಯಂತೆ 100 ಕೋಟಿ ರೂ. ಸಾಲ ಖಾತ್ರಿಯ ಯೋಜನೆ ಮುಂದಿನ ಕೇಂದ್ರ ಸಂಪುಟ ಸಭೆಯಲ್ಲಿ ಚರ್ಚೆಗೆ ಬರಲಿದೆ ಎಂದರು.

ಸಂಪುಟ ಸಭೆ ಅನುಮೋದನೆ ಸಿಕ್ಕ ಕೂಡಲೇ ಬ್ಯಾಂಕ್ ಮೂಲಕ ಈ ಯೋಜನೆ ಜಾರಿಯಾಗಲಿದೆ. 100 ಕೋಟಿ ರೂ. ಸಾಲ ಖಾತ್ರಿಯ ಯೋಜನೆ ಮೂಲಕ ಎಂಎಸ್ಎಂಇಗಳಿಗೆ ಅವಧಿ ಸಾಲ ನೀಡಲಾಗುವುದು. ಯಂತ್ರೋಪಕರಣಗಳ ಸ್ಥಾಪನೆಗಾಗಿ ಈ ಅವಧಿ ಸಾಲ ನೀಡಲಾಗುವುದು. 100 ಕೋಟಿ ರೂ. ವರೆಗಿನ ಈ ಸಾಲಕ್ಕೆ ಯಾವುದೇ ಮೂರನೇ ವ್ಯಕ್ತಿಯ ಶ್ಯೂರಿಟಿ ಅವಶ್ಯಕತೆ ಇಲ್ಲ. ಸರ್ಕಾರವೇ ಖಾತ್ರಿ ನೀಡಲಿದೆ ಎಂದು ತಿಳಿಸಿದರು.

ಕರ್ನಾಟಕದಲ್ಲಿ ಎಂಎಸ್ಎಂಇ ಪಾಲು ದೊಡ್ಡದಿದೆ. ಸಣ್ಣ ಕೈಗಾರಿಕೆಗಳು ಅಗತ್ಯತೆ ಬಗ್ಗೆ ಬ್ಯಾಂಕ್​ಗಳು ಈಗ ತಿಳಿದುಕೊಂಡಿವೆ. ಸಣ್ಣ ಕೈಗಾರಿಕೆಗಳ ಅಭಿವೃದ್ಧಿ ಬ್ಯಾಂಕ್(ಎಸ್​ಐಡಿಬಿಐ) ಸಣ್ಣ ಕೈಗಾರಿಕೆಗಳನ್ನು ಚೆನ್ನಾಗಿ ಅರಿತು ಕೊಂಡಿದೆ. ಎಸ್​ಐಡಿಬಿಐ ಎಂಎಸ್ಎಂಇಯ ಸಾಲದ ಅಗತ್ಯತೆಯ ಬಗ್ಗೆ ತಿಳಿದು ಕೊಂಡಿದೆ. ಹೀಗಾಗಿ ಎಂಎಸ್ಎಂಇ ಕ್ಲಸ್ಟರ್​ನಲ್ಲಿ ಎಸ್​ಐಡಿಬಿಐ ಉಪಸ್ಥಿತಿ ದೊಡ್ಡ ಪ್ರಮಾಣದ ಅನುಕೂಲವಾಗಲಿದೆ. ಮುಂದಿನ ಎರಡು ವರ್ಷದಲ್ಲಿ ಎಸ್​ಐಡಿಬಿಐ ಎಲ್ಲಾ ಎಂಎಸ್ಎಂಇ ಕ್ಲಸ್ಟರ್​ನಲ್ಲಿ ಭೌತಿಕವಾಗಿ ಇರಲಿದೆ ಎಂದರು.

ಕರ್ನಾಟಕದಲ್ಲಿ 35 ಲಕ್ಷ ಎಂಎಸ್ಎಂಇಗಳಿದ್ದು, ಸುಮಾರು 1.65 ಕೋಟಿ ಮಂದಿಗೆ ಉದ್ಯೋಗ ನೀಡುತ್ತಿದೆ. ದೇಶದಲ್ಲಿ ಎಂಎಎಸ್ಇ ಸುಮಾರು 21 ಕೋಟಿ ಉದ್ಯೋಗ ನೀಡುತ್ತಿದೆ ಎಂದು ತಿಳಿಸಿದರು.

6 ವರ್ಷದಲ್ಲಿ 6.50 ಕೋಟಿ ಉದ್ಯೋಗ ಸೃಷ್ಟಿ:ಇದೇ ವೇಳೆ, ಮಾತನಾಡಿದ ಎಂಎಸ್ಎಂಇ ಕೇಂದ್ರ ರಾಜ್ಯ ಖಾತೆ ಸಚಿವೆ ಶೋಭಾ ಕರಂದ್ಲಾಜೆ, ಇಪಿಎಫ್ ಅಂಕಿ - ಅಂಶದ ಪ್ರಕಾರ ದೇಶದಲ್ಲಿ ಆರು ವರ್ಷದಲ್ಲಿ ದೇಶದಲ್ಲಿ ಸುಮಾರು 6.50 ಕೋಟಿ ಹೊಸ ಉದ್ಯೋಗ ಸೃಷ್ಟಿಯಾಗಿದೆ. 6.50 ಕೋಟಿ ಹೊಸ ಉದ್ಯೋಗಿಗಳು ಇಎಸ್ಐ, ಪಿಎಫ್​ಗೆ ಸೇರ್ಪಡೆಯಾಗಿದ್ದಾರೆ ಎಂದು ಮಾಹಿತಿ ನೀಡಿದರು.

ದೆಹಲಿಯಲ್ಲಿ ಎನ್ಎಸ್ಐಸಿ ತರಬೇತಿ ಕೇಂದ್ರ ಇದೆ. ಆದರೆ, ಅಲ್ಲಿ ಕೇವಲ ಉತ್ತರ ಭಾರತದ ಜನರು ಮಾತ್ರ ತರಬೇತಿಗೆ ಬರುತ್ತಿದ್ದಾರೆ. ದಕ್ಷಿಣ ಭಾರತದಲ್ಲಿ ಈ ತರಬೇತಿ ಕೇಂದ್ರ ಇಲ್ಲ. ಹೀಗಾಗಿ ಇದನ್ನು ದಕ್ಷಿಣ ಭಾರತದಲ್ಲಿ ಆರಂಭಿಸಲು ನಿರ್ಧರಿಸಿ, ಅಧಿಕಾರಿಗಳನ್ನು ಬೆಂಗಳೂರಿಗೆ ಕಳುಹಿಸಿದ್ದೆ. ಈಗ ಪೀಣ್ಯದಲ್ಲಿ ಎನ್ಎಸ್ಐಸಿ ಎರಡನೇ ಕೇಂದ್ರ ಆರಂಭಿಸಲು ಮುಂದಾಗಿದ್ದೇವೆ. ರಾಜ್ಯ ಸರ್ಕಾರ ಜಮೀನು ಹಂಚಿಕೆ ಮಾಡಿದೆ. ಕೂಡಲೇ ಅದನ್ನು ಆರಂಭಿಸಲಿದ್ದೇವೆ ಎಂದರು.

ಇದನ್ನೂ ಓದಿ:ಕೋವಿಡ್ ಹಗರಣ: ಕ್ಯಾಬಿನೆಟ್​ನಲ್ಲಿ ಚರ್ಚಿಸಿ ಪ್ರಾಸಿಕ್ಯೂಷನ್​ಗೆ ಅನುಮತಿ ನೀಡುವ ಬಗ್ಗೆ ತೀರ್ಮಾನ - ಸಿಎಂ