ಬೆಳಗಾವಿ: ತಮ್ಮ ನೆಚ್ಚಿನ ಸಿನಿಮಾ ನಟರ ಹುಟ್ಟುಹಬ್ಬದ ದಿನ ಅಭಿಮಾನಿಗಳು ಕಟೌಟ್ಗೆ ಹಾಲು ಸುರಿಯುವುದು, ಆ ಕಟೌಟ್ಗೆ ಬೃಹದಾಕಾರದ ಹೂವಿನ ಮಾಲೆ ಹಾಕಿ ಆಚರಿಸುವುದನ್ನು ನಾವು, ನೀವೆಲ್ಲಾ ನೋಡಿದ್ದೇವೆ. ಆದರೆ, ಬೆಳಗಾವಿಯಲ್ಲಿ ಕಿಚ್ಚ ಸುದೀಪ್ ಅವರ ಅಭಿಮಾನಿಯೊಬ್ಬ ತನ್ನ ಗ್ರಾಮದ ಜನ‌ರ ನೀರಿನ ಭವಣೆ ನೀಗಿಸಲು ಸ್ವಂತ ಖರ್ಚಿನಲ್ಲಿ ಬೋರ್ವೆಲ್ ಕೊರೆಸುವ ಮೂಲಕ ಅಭಿಮಾನ ಮೆರೆದಿದ್ದಾನೆ.
ಹೌದು, ಬೆಳಗಾವಿ ತಾಲೂಕಿನ ವಾಘ್ವಾಡೆ ಗ್ರಾಮದ ಸುದೀಪ್ ಅವರ ಅಭಿಮಾನಿ ಆದಿ ನಾಯಕ ಎಂಬ ಯುವಕ ಬೋರ್ವೆಲ್ ಕೊರಿಸಿ ಗಮನ ಸೆಳೆದಿದ್ದಾರೆ. ಕುಡಿಯುವ ನೀರಿನ ಸಮಸ್ಯೆ ಹಿನ್ನೆಲೆಯಲ್ಲಿ ತನ್ನ ನೆಚ್ಚಿನ ಹೀರೋನ ಬರ್ತ್ ಡೇ ಅರ್ಥಪೂರ್ಣವಾಗಿ ಆಚರಿಸುವ ನಿಟ್ಟಿನಲ್ಲಿ ಈ ಮಾದರಿ ಕಾರ್ಯಕ್ಕೆ ಕೈ ಹಾಕಿದ್ದಾರೆ. ಒಂದು ಲಕ್ಷ ರೂ. ಸ್ವಂತ ಹಣ ಖರ್ಚು ಮಾಡಿ ಬೋರ್ವೆಲ್ ಕೊರೆಸಿ ವಿಶೇಷವಾಗಿ ಕಿಚ್ಚನ ಬರ್ತ್ ಡೇ ಆಚರಿಸಿರುವ ಆದಿ ನಾಯಕ್, ಬೋರ್ವೆಲ್ ಆರಂಭಕ್ಕೂ ಮುನ್ನವೇ ಕೇಕ್ ಕತ್ತರಿಸಿ ಕಿಚ್ಚನಿಗೆ ಹುಟ್ಟು ಹಬ್ಬದ ಶುಭಾಶಯ ಕೋರಿದ್ದಾರೆ. ಆದಿ ನಾಯಕ ಕಾರ್ಯಕ್ಕೆ ಇಡೀ ಗ್ರಾಮಸ್ಥರು ಶ್ಲಾಘಿಸಿದ್ದು, ಈ ಬೋರ್‌ವೆಲ್‌ನಿಂದ ಕುಡಿಯುವ ನೀರಿನ ಸಮಸ್ಯೆ ನೀಗಲಿದೆ ಎಂದು ಹರ್ಷ ವ್ಯಕ್ತಪಡಿಸಿದ್ದಾರೆ.