ಬೆಂಗಳೂರು : ನಗರದ ಲಾಲ್ಬಾಗ್ನಲ್ಲಿ 2024ನೇ ಸಾಲಿನ ಮಾವು-ಹಲಸು ಮೇಳಕ್ಕೆ ಶುಕ್ರವಾರ ಚಾಲನೆ ಸಿಕ್ಕಿದ್ದು, ಗ್ರಾಹಕರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ನಿನ್ನೆ 4ನೆಯ ಶನಿವಾರ ಮತ್ತು ಇಂದು ಭಾನುವಾರ ರಜಾ ದಿನವಾಗಿರುವುದರಿಂದ ಬೆಂಗಳೂರಿನ ಮತ್ತು ಪರ ಊರಿನ ಗ್ರಾಹಕರು ಕಿಕ್ಕಿರಿದು ತುಂಬಿದ್ದರು. ಮಕ್ಕಳಿಗೆ ಬೇಸಿಗೆ ರಜೆ ಇರುವುದು ಕೂಡ ಮೇಳದ ವ್ಯಾಪಾರಕ್ಕೆ ಇನ್ನಷ್ಟು ಇಂಬು ನೀಡಿದೆ.
ಈಟಿವಿ ಭಾರತ ಮಾವು ಮೇಳದ ಗ್ರೌಂಡ್ ರಿಪೋರ್ಟ್ ವೇಳೆ ಮಾತನಾಡಿದ ಕೋಲಾರ್ ಮ್ಯಾಂಗೋಸ್ನ ಮಾಲೀಕ ರಾಘವೇಂದ್ರ, ''ಸುಮಾರು 15 ವರ್ಷಗಳಿಂದ ಮಾವು ಮೇಳದಲ್ಲಿ ಭಾಗವಹಿಸುತ್ತಿದ್ದೇವೆ. ಬಹುತೇಕ ವಿಧದ ಮಾವಿನ ಹಣ್ಣುಗಳನ್ನು ನೈಸರ್ಗಿಕವಾಗಿ ನಮ್ಮ ತೋಟದಲ್ಲಿಯೇ ಬೆಳೆದು ಮಾರಾಟ ಮಾಡುತ್ತಿದ್ದೇವೆ. ಯಾವುದೇ ಕೃತಕ ಮಾವಿನ ಹಣ್ಣುಗಳನ್ನು ಗ್ರಾಹಕರಿಗೆ ನೀಡಲಾಗುತ್ತಿಲ್ಲ'' ಎಂದು ಹೇಳಿದರು.
''ಏಪ್ರಿಲ್ 15 ರಿಂದ ಮಾವಿನ ಹಣ್ಣಿನ ಫಸಲು ಮಾರುಕಟ್ಟೆಗೆ ಬಂದಿವೆ. ಸದ್ಯಕ್ಕೆ 15 ವಿಧದ ಮಾವಿನ ಹಣ್ಣುಗಳನ್ನು ಮಾರಾಟ ಮಾಡುತ್ತಿದ್ದೇವೆ. ಕಿಂಗ್ ಆಫ್ ಮ್ಯಾಂಗೋ ಆಪೋಸ್ ಹಣ್ಣಿಗೆ ಹೆಚ್ಚಿನ ಬೇಡಿಕೆಯಿದೆ. ಇಮಾಮ್ ಪಸಂದ್ ಹಣ್ಣು ಕೂಡ ಅಷ್ಟೇ ರುಚಿಕರವಾಗಿದೆ. ಈ ಒಂದು ವಾರ ಒಳ್ಳೆಯ ವ್ಯಾಪಾರ ನಡೆಯುತ್ತದೆ. ಮುಂದಿನ ವಾರದಿಂದ ಶಾಲಾ ಕಾಲೇಜುಗಳು ಪ್ರಾರಂಭವಾಗಲಿವೆ. ಆಗ ಸ್ವಲ್ಪ ವ್ಯಾಪಾರ ಇಳಿಮುಖವಾಗುವ ಸಾಧ್ಯತೆ ಇದೆ'' ಎಂದು ಅಭಿಪ್ರಾಯಪಟ್ಟರು.