ರೆಫರಿ ಕೊಟ್ಟ ತೀರ್ಪಿಗೆ ಹಾರಿಹೋಯ್ತು 100 ಜನರ ಪ್ರಾಣ: ಫುಟ್ಬಾಲ್​ ಮೈದಾನವಾಯ್ತು ರಣಾಂಗಣ; ಬೆಚ್ಚಿಬೀಳಿಸುವ ವಿಡಿಯೋ ವೈರಲ್​!

ಪುಟ್ಬಾಲ್​ ಪಂದ್ಯದ ವೇಳೆ ರೆಫರಿ ಕೊಟ್ಟ ವಿವಾದಾತ್ಮಕ ತೀರ್ಪಿನಿಂದ 100ಕ್ಕೂ ಹೆಚ್ಚು ಜನರು ಸಾವನ್ನಪ್ಪಿರುವ ಘಟನೆ ನಡೆದಿದೆ.

Fans clash during football match: ಆಫ್ರಿಕನ್​ ದೇಶವಾದ ಗಿನಿಯಾದಲ್ಲಿ ಘೋರ ದುರಂತವೊಂದು ನಡೆದಿದೆ. ಫುಟ್ಬಾಲ್ ಪಂದ್ಯದ ವೇಳೆ ಅಭಿಮಾನಿಗಳು ಮಧ್ಯೆ ಘರ್ಷಣೆ ಉಂಟಾಗಿ ಪರಸ್ಪರ ಹೊಡೆದಾಡಿಕೊಂಡಿದ್ದಾರೆ. ಈ ವೇಳೆ 100ಕ್ಕೂ ಹೆಚ್ಚು ಜನರು ಸಾವನ್ನಪ್ಪಿದ್ದಾರೆ. ಗಿನಿಯಾದ ಎರಡನೇ ದೊಡ್ಡ ನಗರವಾದ ಜೆರೆಕೋರ್‌ನಲ್ಲಿ ಭಾನುವಾರ ನಡೆದ ಫುಟ್ಬಾಲ್​ ಪಂದ್ಯದ ವೇಳೆ ಈ ಘಟನೆ ನಡೆದಿದೆ.

ಈ ಘಟನೆಯ ಬಳಿಕ ಕಣ್ಣು ಹಾಯಿಸಿದಷ್ಟು ದೂರಕ್ಕೆ ಮೃತ ದೇಹಗಳು ಬಿದ್ದಿವೆ. ಅಲ್ಲದೇ ಅಲ್ಲಿಯ ಎಲ್ಲ ಆಸ್ಪತ್ರೆಗಳು ಮೃತ ದೇಹಗಳು ಮತ್ತು ಗಾಯಾಳುಗಳಿಂದ ತುಂಬಿವೆ. ಕೆಲ ಆಸ್ಪತ್ರೆಯಲ್ಲಿ ಸ್ಥಳಾವಕಾಶದ ಕೊರತೆಯಿಂದಾಗಿ ಶವಗಳನ್ನು ಕಾರಿಡಾರ್‌ಗಳಲ್ಲೇ ಇರಿಸಲಾಗಿದೆ ಎಂದು ವರದಿಯಾಗಿದೆ.

ಗಿನಿಯಾ ಪ್ರಮುಖ ನಾಯಕನಾಗಿದ್ದ ಮಮಡಿ ಡೌಮ್‌ಬಾಯ್ ಅವರ ಗೌರವಾರ್ಥವಾಗಿ ಭಾನುವಾರ ಫುಟ್ಬಾಲ್​ ಪಂದ್ಯವನ್ನು ಆಯೋಜಿಸಲಾಗಿತ್ತು. ಈ ಪಂದ್ಯದ ಮಧ್ಯದಲ್ಲಿ ರೆಫರಿ ತೆಗೆದುಕೊಂಡ ನಿರ್ಧಾರ ವಿವಾದಕ್ಕೀಡಾಗಿತ್ತು. ಇದನ್ನು ವಿರೋಧಿಸಿದ ತಂಡದ ಅಭಿಮಾನಿಗಳು ಮೈದಾನಕ್ಕೆ ನುಗ್ಗಿದ್ದಾರೆ.

ಇದೇ ವೇಳೆ, ಮತ್ತೊಂದು ತಂಡದ ಅಭಿಮಾನಿಗಳು ಅವರನ್ನು ತಡೆದಾಗ ಈ ಘರ್ಷಣೆ ಉಂಟಾಗಿದೆ. ಈ ವೇಳೆ ಸಾವಿರಾರು ಅಭಿಮಾನಿಗಳು ಪರಸ್ಪರ ಹಲ್ಲೆ ನಡೆಸಿದ್ದಾರೆ. ಮತ್ತೆ ಕೆಲವರು ಪೊಲೀಸ್ ಠಾಣೆಗೆ ಬೆಂಕಿ ಹಚ್ಚಿದ್ದಾರೆ. ಇದರಿಂದಾಗಿ ನೂರಕ್ಕೂ ಹೆಚ್ಚು ಜನರು ಸಾವನ್ನಪ್ಪಿದ್ದಾರೆ ಎಂದು ಸ್ಥಳೀಯ ಮಾಧ್ಯಮಗಳು ತಿಳಿಸಿವೆ. ಅಲ್ಲದೇ ಮೃತರ ಸಂಖ್ಯೆ ಹೆಚ್ಚಾಗುವ ಸಾಧ್ಯತೆ ಇದೆ ಎಂದೂ ಹೇಳಲಾಗುತ್ತಿದೆ.

ಈ ಘರ್ಷಣೆಯ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗಿದೆ. ವಿಡಿಯೋದಲ್ಲಿ ಸಾವಿರಾರು ಜನರು ಹೊಡೆದಾಡಿಕೊಂಡಿರುವುದು ಕಂಡು ಬಂದಿದೆ. ಅಲ್ಲದೇ ಹಲವಾರು ಜನರು ಗಂಭೀರವಾಗಿ ಗಾಯಗೊಂಡು ರಸ್ತೆಗಳಲ್ಲಿ ಬಿದ್ದು ಒದ್ದಾಡುತ್ತಿರುವುದು ಕಂಡು ಬಂದಿದೆ.

ಇದನ್ನೂ ಓದಿ:ICC ನೂತನ ಅಧ್ಯಕ್ಷ ಜಯ್​ ಶಾ ಪಡೆಯುವ ಸಂಬಳ ಎಷ್ಟು: ಯಾವೆಲ್ಲ ಸೌಲಭ್ಯಗಳಿರುತ್ತವೆ?