ಬೆಂಗಳೂರಲ್ಲಿ ನೂತನ NCA ಲೋಕಾರ್ಪಣೆ: ಇನ್ಮುಂದೆ ಮಳೆ ಬಂದರೂ ನೋ ಟೆನ್ಶನ್, ಇದರಲ್ಲಿವೆ ಅತ್ಯಾಧುನಿಕ ಸೌಲಭ್ಯ! - New National Cricket Academy

ಬಿಸಿಸಿಐ ಹೊಸದಾಗಿ ಇಂದು ಬೆಂಗಳೂರಿನಲ್ಲಿ ರಾಷ್ಟ್ರೀಯ ಕ್ರಿಕೆಟ್​ ಅಕಾಡೆಮಿಯನ್ನು ಲೋಕಾರ್ಪಣೆಗೊಳಿಸಿದೆ. ಇದು ಈಜುಕೊಳ ಸೇರಿದಂತೆ ಅತ್ಯಾಧುನಿಕ ಸೌಲಭ್ಯಗಳನ್ನು ಹೊಂದಿದೆ.

ಬೆಂಗಳೂರು: ದೇಶದಲ್ಲಿ ಕ್ರಿಕೆಟ್ ಅನ್ನು ಮತ್ತಷ್ಟು ಅಭಿವೃದ್ಧಿಪಡಿಸುವ ದೃಷ್ಟಿಯಿಂದ ಅತ್ಯಾಧುನಿಕ ಸೌಲಭ್ಯಗಳನ್ನೊಳಗೊಂಡ ನೂತನ ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿಯನ್ನು (NCA) ಬಿಸಿಸಿಐ ಇಂದು ಬೆಂಗಳೂರಿನಲ್ಲಿ ಲೋಕಾರ್ಪಣೆಗೊಳಿಸಿದೆ. ವಿಶ್ವದರ್ಜೆಯ ಸೌಲಭ್ಯಗಳನ್ನು ಹೊಂದಿರುವ ಈ ಎನ್​ಸಿಎ ದೇಶದ ಕ್ರಿಕೆಟ್ ಬೆಳವಣಿಗೆಯಲ್ಲಿ ಕ್ರಾಂತಿಕಾರಕ ಬದಲಾವಣೆಗಳನ್ನು ತರಲಿದೆ ಎಂದು ಬಿಸಿಸಿಐ ಆಶಿಸಿದೆ. ಹಾಗಾದ್ರೆ ಹೊಸದಾಗಿ ಆರಂಭವಾಗಿರುವ ಈ ನೂತನ ಕ್ರಿಕೆಟ್​ ಅಕಾಡೆಮಿಯಲ್ಲಿ ಇರುವಂತಹ ಅತ್ಯಾಧುನಿಕ ಸೌಲಭ್ಯಗಳು ಯಾವುವು ಅನ್ನೋದನ್ನು ತಿಳಿದುಕೊಳ್ಳೋಣ..

ಎನ್​​ಸಿಎಯಲ್ಲಿನ ಸೌಲಭ್ಯಗಳು:40 ಎಕರೆಯಲ್ಲಿ ನಿರ್ಮಾಣಗೊಂಡಿರುವ ಎನ್​ಸಿಎ, ಮೂರು ವಿಶ್ವ ದರ್ಜೆಯ ಕ್ರೀಡಾ ಮೈದಾನಗಳು, ಒಳಾಂಗಣ ಮತ್ತು ಹೊರಾಂಗಣ ಸೇರಿದಂತೆ ಒಟ್ಟು 86 ಪಿಚ್​ಗಳನ್ನು ಹೊಂದಿದೆ. ಗ್ರೌಂಡ್ A ನಲ್ಲಿರುವ ಮೈದಾನವು 85 ಗಜ ಸುತ್ತಳತೆಯ ಬೌಂಡರಿಯನ್ನು ಹೊಂದಿದ್ದು, ಇದರಲ್ಲಿ ಮುಂಬೈನ ಕೆಂಪು ಮಣ್ಣು ಬಳಸಲಾಗಿದೆ. ಜತೆಗೆ ಅತ್ಯಾಧುನಿಕ ಫ್ಲಡ್ ಲೈಟಿಂಗ್​ನೊಂದಿಗೆ ಪ್ರಸಾರ ಸೌಲಭ್ಯಗಳು ಇಲ್ಲಿವೆ. ಫ್ಲಡ್ ಲೈಟ್‌ಗಳ ಮೂಲಕವೇ ಪಂದ್ಯಗಳನ್ನು ನಡೆಸಬಹುದಾಗಿದೆ. ಇನ್ನು B, C ಮೈದಾನದ ಬೌಂಡರಿಯ ಸುತ್ತಳತೆ 75 ಗಜಗಳಷ್ಟಿದ್ದು, ಇದು ಅಭ್ಯಾಸದ ಮೈದಾನವಾಗಿ ಕಾರ್ಯನಿರ್ವಹಿಸಲಿದೆ. ಇವುಗಳಲ್ಲಿ ಮಂಡ್ಯದ ಮಣ್ಣು ಮತ್ತು ಒಡಿಶಾದ ಕಪ್ಪು ಹತ್ತಿ ಮಣ್ಣು ಬಳಕೆ ಮಾಡಲಾಗಿದೆ.

ನೂತನ NCA ಲೋಕಾರ್ಪಣೆಗೊಳಿಸಿದ ಬಿಸಿಸಿಐ (ETV Bharat)

ಮಳೆ ಬಂದರೂ ನೋ ಟೆನ್ಷನ್:ಹೊಸ ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿಯಲ್ಲಿ ಸಬ್ ಸರ್ಫೇಸ್ ಡ್ರೈನೇಜ್ ವ್ಯವಸ್ಥೆಯನ್ನು ಅಳವಡಿಸಲಾಗಿದ್ದು, ಮೈದಾನದಲ್ಲಿ ಮಳೆ ಬಂದರೂ ಕ್ಷಣಾರ್ಧದಲ್ಲೇ ನೀರು ಹೀರಿಕೊಳ್ಳಲಿದೆ. ವೈಟ್ ಪಿಕೆಟ್ ಫೆನ್ಸಿಂಗ್ ಕೂಡ ಹಾಕಲಾಗಿದ್ದು, ಈ ಮೈದಾನಗಳು ಇಂಗ್ಲಿಷ್ ಕೌಂಟಿ ಪಿಚ್‌ನಂತೆ ಕಾಣುತ್ತವೆ. ಅಲ್ಲದೇ 45 ಔಟ್​ಡೋರ್​ ನೆಟ್​ ಪ್ರಾಕ್ಟಿಸ್​ ಪಿಚ್​ಗಳು ಇವೆ. ಇವುಗಳಲ್ಲಿ UKಯಿಂದ ತರಲಾದ ಸೇಫ್ಟಿ ನೆಟ್ಸ್​ ಬಳಕೆ ಮಾಡಲಾಗಿದೆ. ಇದರ ಜೊತೆಗೆ ಆರು ಹೊರಾಂಗಣ ರನ್ನಿಂಗ್ ಟ್ರ್ಯಾಕ್‌ಗಳನ್ನು ಸ್ಥಾಪಿಸಲಾಗಿದೆ.

ಮಳೆಗಾಲದಲ್ಲಿ ಒಳಾಂಗಣ ಪಿಚ್‌ಗಳಲ್ಲಿ ಆಟಗಾರರು ಅಭ್ಯಾಸ ನಡೆಸಬಹುದಾಗಿದೆ. ಇದು ಗಾಜಿನ ಫಲಕಗಳಿಂದ ಕೂಡಿದ್ದು ನೈಸರ್ಗಿಕ ಬೆಳಕನ್ನು ಒದಗಿಸುತ್ತದೆ. ಜತೆಗೆ ಇದರಲ್ಲಿ ಅಳವಡಿಸಿರುವ ಅತ್ಯಾಧುನಿಕ ಕ್ಯಾಮರಾಗಳ ಮೂಲಕ ಆಟವನ್ನು ಸೆರೆಹಿಡಿಯಬಹುದಾಗಿದೆ.

ಬೃಹತ್​ ಆಕಾರದ ಡ್ರೆಸ್ಸಿಂಗ್​ ರೂಮ್​:NCA ಸುಮಾರು 3,000 ಚದರ್​ ಅಡಿ ವಿಸ್ತೀರ್ಣದ ದೊಡ್ಡ ಡ್ರೆಸ್ಸಿಂಗ್ ರೂಮ್ ಅನ್ನು ಹೊಂದಿದೆ. ಇದರಲ್ಲಿ ಪ್ರತ್ಯೇಕ ಕೋಣೆಗಳು, ಲಾಂಜ್, ಮಸಾಜ್ ರೂಮ್, ಕಿಟ್ ರೂಮ್, ವಿಶ್ರಾಂತಿ ಕೊಠಡಿಗಳು ಇರಲಿವೆ. ಅತ್ಯಾಧುನಿಕ ಸೌಲಭ್ಯಗಳೊಂದಿಗೆ ಕಾಮೆಂಟರಿ, ಮ್ಯಾಚ್ ರೆಫರಿ ಕೊಠಡಿಗಳು, ಮಾಧ್ಯಮಗೋಷ್ಟಿ ಪ್ರತ್ಯೇಕ ಸ್ಥಳ, ವಿಐಪಿ ಲಾಂಜ್, ಊಟದ ಸ್ಥಳ ಮತ್ತು ಆಡಳಿತ ಕಟ್ಟಡಗಳನ್ನೊಳಗೊಂಡಿದೆ.

ಜಿಮ್, ಈಜುಕೊಳ:ಸ್ಪೋರ್ಟ್ಸ್​​ ಸೈನ್ಸ್​ ಆ್ಯಂಡ್​ ಮೆಡಿಸಿನ್ ಬ್ಲಾಕ್​ನಲ್ಲಿ 16,000 ಚದರ್​ ಅಡಿಯ ಜಿಮ್ ಕೂಡ ಇದೆ. ಇದು ಅತ್ಯಾಧುನಿಕ ಉಪಕರಣಗಳನ್ನು ಹೊಂದಿದೆ. ಅಲ್ಲದೆ, ನಾಲ್ಕು ಅಥ್ಲೆಟಿಕ್ ಟ್ರ್ಯಾಕ್‌ಗಳು, ಫಿಸಿಯೋಥೆರಪಿ ರಿಹ್ಯಾಬ್ ಜಿಮ್, ಇತ್ತೀಚಿನ ತಂತ್ರಜ್ಞಾನದೊಂದಿಗೆ ಕ್ರೀಡಾ ವಿಜ್ಞಾನ ಮತ್ತು ಮೆಡಿಸಿನ್ ಲ್ಯಾಬ್, ಪೂಲ್ ಸ್ಪಾ, ಕೋಲ್ಡ್ ಶವರ್ ಮುಂತಾದ ಸೌಲಭ್ಯಗಳಿವೆ. ಜತೆಗೆ 25x12 ಮೀಟರ್ ಉದ್ದದ ಈಜುಕೊಳವನ್ನೂ ಹೊಂದಿದೆ.