ಆರ್ಥಿಕ ನೀತಿ ನಿರೂಪಣೆಯಲ್ಲಿ ಗ್ರಾಹಕ ವಿಶ್ವಾಸ ಸೂಚ್ಯಂಕದ ಪಾತ್ರ: ಒಂದು ವಿಶ್ಲೇಷಣೆ - Consumer Confidence Index

ದೇಶದ ಆರ್ಥಿಕ ನೀತಿ ನಿಯಮಗಳನ್ನು ರೂಪಿಸುವಲ್ಲಿ ಗ್ರಾಹಕ ವಿಶ್ವಾಸ ಸೂಚ್ಯಂಕದ ಪಾತ್ರದ ಬಗ್ಗೆ ಒಂದು ಅವಲೋಕನ ಇಲ್ಲಿದೆ.

2023 ರ ಏಪ್ರಿಲ್​ನಲ್ಲಿ 61,112.44 ಮಟ್ಟದಲ್ಲಿದ್ದ ಬಿಎಸ್​ಇ ಸೆನ್ಸೆಕ್ಸ್​ 2024 ರ ಏಪ್ರಿಲ್ ಹೊತ್ತಿಗೆ 74,482.78 ಕ್ಕೆ ಅಂದರೆ ಸುಮಾರು 22 ಪ್ರತಿಶತದಷ್ಟು ಏರಿಕೆ ಕಂಡಿರುವುದು ಭಾರತೀಯ ಆರ್ಥಿಕತೆಯ ಬಗ್ಗೆ ದೃಢವಾದ ಆಶಾವಾದವನ್ನು ಪ್ರತಿಬಿಂಬಿಸುತ್ತದೆ. ವಿಶ್ವದ ಇತರ ಭಾಗಗಳಲ್ಲಿನ ನಿರಾಶಾದಾಯಕ ಮತ್ತು ನಿಧಾನಗತಿಯ ಬೆಳವಣಿಗೆಯ ದರಗಳ ನಡುವೆ 2024 ಮತ್ತು 2025ರ ವರ್ಷಗಳ ಸ್ಥಿತಿಸ್ಥಾಪಕ ಭಾರತವನ್ನು ಪ್ರಸ್ತುತಪಡಿಸುವ ಏಪ್ರಿಲ್ 2024 ರ ವಿಶ್ವ ಆರ್ಥಿಕ ದೃಷ್ಟಿಕೋನದ ಅಂದಾಜುಗಳು ಇದನ್ನು ದೃಢಪಡಿಸುತ್ತವೆ.

ಹೀಗಾಗಿ, ಭಾರತವು 2024 ರಲ್ಲಿ ವಾರ್ಷಿಕ ಶೇಕಡಾ 6.8 ರಷ್ಟು ನೈಜ ಒಟ್ಟು ದೇಶೀಯ ಉತ್ಪನ್ನ (ಜಿಡಿಪಿ)ದ ಬೆಳವಣಿಗೆಯ ದರವನ್ನು ಸಾಧಿಸುವ ನಿರೀಕ್ಷೆಯಿದೆ. ನಂತರ ಇದು 2025 ರ ವರ್ಷದಲ್ಲಿ ಶೇಕಡಾ 6.5 ಕ್ಕೆ ಸ್ವಲ್ಪ ಕುಸಿತವಾಗಲಿದೆ. ಇದು ಚೀನಾ ಸೇರಿದಂತೆ ಪ್ರಮುಖ ಆರ್ಥಿಕತೆಗಳನ್ನು ಮೀರಿಸಿದ ಆರ್ಥಿಕ ಬೆಳವಣಿಗೆಯಾಗಿರಲಿದೆ.

ಇಷ್ಟಾದರೂ ಒಂದು ಪ್ರಮುಖ ಪ್ರಶ್ನೆ ಉದ್ಭವಿಸುತ್ತದೆ. ಅದೇನೆಂದರೆ - ಪ್ರಸಕ್ತ ವರ್ಷದಲ್ಲಿ ಮತ್ತು ಮುಂದಿನ ವರ್ಷದಲ್ಲಿ ಭಾರತೀಯ ಆರ್ಥಿಕತೆಯು ಈ ಯೋಜಿತ ಬೆಳವಣಿಗೆಯ ದರಗಳನ್ನು ಹಾಗೆಯೇ ಉಳಿಸಿಕೊಳ್ಳುತ್ತದೆ ಎಂದು ಎಷ್ಟರಮಟ್ಟಿಗೆ ನಾವು ನಂಬಬಹುದು ಎಂಬುದು.

ಗ್ರಾಹಕರ ವಿಶ್ವಾಸ ಮತ್ತು ಭಾರತೀಯ ಗ್ರಾಹಕರ ಭಾವನೆಗಳನ್ನು ಹೆಚ್ಚಿಸುವ ಮೂಲಕ ಆರ್ಥಿಕತೆ ಹೆಚ್ಚಿಸುವಲ್ಲಿ ಗ್ರಾಹಕ ವಿಶ್ವಾಸ ಸೂಚ್ಯಂಕದ ಪಾತ್ರದ ಬಗ್ಗೆ ಸಾಕಷ್ಟು ಗಮನ ಹರಿಸಲಾಗುತ್ತಿಲ್ಲ ಎಂಬ ಭಾವನೆ ಮೂಡುತ್ತಿದೆ. ಗ್ರಾಹಕರ ಇಂಥ ವಿಶ್ವಾಸವನ್ನು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (ಆರ್​ಬಿಐ) ದ್ವೈಮಾಸಿಕ ಆಧಾರದ ಮೇಲೆ ಟ್ರ್ಯಾಕ್ ಮಾಡುತ್ತದೆ.

ಆರ್​ಬಿಐನ ಈ ಟ್ರ್ಯಾಕಿಂಗ್ ಗ್ರಾಹಕರ ಪ್ರಸ್ತುತ ಗ್ರಹಿಕೆಗಳ ಬಗ್ಗೆ (ಒಂದು ವರ್ಷದ ಹಿಂದೆ ಹೋಲಿಸಿದರೆ) ಮತ್ತು ಸಾಮಾನ್ಯ ಆರ್ಥಿಕ ಪರಿಸ್ಥಿತಿ, ಉದ್ಯೋಗ ಸನ್ನಿವೇಶ, ಒಟ್ಟಾರೆ ಬೆಲೆ ಪರಿಸ್ಥಿತಿ, ಸ್ವಂತ ಆದಾಯ ಮತ್ತು ವೆಚ್ಚದ ಬಗ್ಗೆ ಒಂದು ವರ್ಷದ ಮುಂಚಿತ ನಿರೀಕ್ಷೆಗಳ ಬಗ್ಗೆ ನಿರ್ದಿಷ್ಟ ಮಾದರಿಯ ಪ್ರಶ್ನೆಗಳನ್ನು ಒಳಗೊಂಡಿರುತ್ತದೆ.

ಹೀಗಾಗಿ ಗ್ರಾಹಕ ವಿಶ್ವಾಸ ಸೂಚ್ಯಂಕವು ಪ್ರಮುಖ ಸೂಚಕವಾಗಿದ್ದು, ಕುಟುಂಬಗಳ ಬಳಕೆ ಮತ್ತು ಉಳಿತಾಯಕ್ಕೆ ಸಂಬಂಧಿಸಿದಂತೆ ಭವಿಷ್ಯದ ಬೆಳವಣಿಗೆಗಳ ಬಗ್ಗೆ ನೀತಿ ನಿರೂಪಕರಿಗೆ ಅಗತ್ಯವಾದ ಅಂಕಿ - ಅಂಶಗಳನ್ನು ನೀಡುತ್ತದೆ. ಈ ಸೂಚ್ಯಂಕದಲ್ಲಿ 100 ಕ್ಕಿಂತ ಹೆಚ್ಚಿನ ಅಂಕವು ಆಶಾವಾದ ಮತ್ತು ಉಳಿಸುವ ಬದಲು ಖರ್ಚು ಮಾಡುವ ಪ್ರವೃತ್ತಿಯನ್ನು ಸೂಚಿಸುತ್ತದೆ, ಆದರೆ, 100 ಕ್ಕಿಂತ ಕಡಿಮೆ ಅಂಕವು ನಿರಾಶಾವಾದ ಚಾಲ್ತಿಯಲ್ಲಿರುವುದನ್ನು ಸೂಚಿಸುತ್ತದೆ.

ಭಾರತದಲ್ಲಿ ಮಾರ್ಚ್ 2-11, 2024 ರ ಅವಧಿಯಲ್ಲಿ ನಡೆಸಲಾದ ಇತ್ತೀಚಿನ ಸಮೀಕ್ಷೆಯು 19 ನಗರಗಳಲ್ಲಿನ 6,083 ಜನರನ್ನು ಒಳಗೊಂಡಿದೆ. ಈ ಸಮೀಕ್ಷೆಯಲ್ಲಿ ಶೇಕಡಾ 58ರಷ್ಟು ಮಹಿಳೆಯರ ಅಭಿಪ್ರಾಯಗಳನ್ನು ಪಡೆದುಕೊಂಡಿರುವುದು ವಿಶೇಷವಾಗಿದೆ. ಸಮೀಕ್ಷೆಯು ಆರ್ಥಿಕತೆಯ ಭವಿಷ್ಯದ ಸ್ಥಿತಿಯ ಬಗ್ಗೆ ಪ್ರಮುಖ ಒಳನೋಟಗಳನ್ನು ಹೊಂದಿದೆ. ಸಮೀಕ್ಷಾ ವರದಿಯನ್ನು ನೋಡಿದರೆ ಪ್ರಸ್ತುತ ಪರಿಸ್ಥಿತಿಯ ಬಗ್ಗೆ ಗ್ರಾಹಕರ ವಿಶ್ವಾಸ ಹೆಚ್ಚಾಗಿದೆ ಮತ್ತು 2019 ರ ಮಧ್ಯದಿಂದ ಇದು ಅತ್ಯುನ್ನತ ಮಟ್ಟದಲ್ಲಿದೆ.

ಗ್ರಾಹಕ ವಿಶ್ವಾಸ ಸೂಚ್ಯಂಕವು ಮೇ 2021 ರಲ್ಲಿ 48.5 ಕ್ಕೆ ಇಳಿಕೆಯಾಗಿತ್ತು. ಇದು ಒಂದು ದಶಕದಲ್ಲಿಯೇ ಅತ್ಯಂತ ಕಡಿಮೆಯಾಗಿತ್ತು. ಪ್ರಸ್ತುತ ಇದು 98.5 ರಷ್ಟಿದೆ. ಇಷ್ಟಾದರೂ ಸೂಚ್ಯಂಕವು 100 ರ ಗರಿಷ್ಠ ಮಿತಿ, ಅಂಕಿ - ಅಂಶಕ್ಕಿಂತ ಕಡಿಮೆಯಾಗಿದೆ. ಅಂದರೆ ಇದು ಆರ್ಥಿಕತೆಯಲ್ಲಿ ನಿರಾಶಾದಾಯಕ ಪರಿಸ್ಥಿತಿ ಇರುವುದನ್ನು ಸೂಚಿಸುತ್ತದೆ. ಭವಿಷ್ಯದ ನಿರೀಕ್ಷೆಗಳ ಸೂಚ್ಯಂಕವು 125.2 ರಷ್ಟಿದ್ದು, ಗ್ರಾಹಕರು ಮುಂದಿನ ವರ್ಷದ ಬಗ್ಗೆ ಹೆಚ್ಚು ವಿಶ್ವಾಸ ಹೊಂದಿದ್ದಾರೆ ಎಂಬುದು ಕಂಡು ಬರುತ್ತದೆ. ಈ ಮಟ್ಟವು 2019 ರ ಮಧ್ಯ ಅವಧಿಯ ನಂತರ ಮತ್ತೆ ಗರಿಷ್ಠವಾಗಿದೆ. ಮೇ 2021 ರಲ್ಲಿ, ಈ ಅಂಕಿ ಅಂಶವು 96.4 ಮೌಲ್ಯದೊಂದಿಗೆ ನಿರಾಶಾದಾಯಕ ಮಟ್ಟಕ್ಕೆ ಜಾರಿತ್ತು.

ಗ್ರಾಹಕರ ಭಾವನೆಗಳನ್ನು ಆಳವಾದ ಅರ್ಥಮಾಡಿಕೊಂಡಲ್ಲಿ ಅದು ಮಿಶ್ರ ಚಿತ್ರಣವನ್ನು ಬಹಿರಂಗಪಡಿಸುತ್ತದೆ. ಮಾರ್ಚ್ 2023 ರಿಂದ ಜನವರಿ 2024 ರ ನಡುವೆ ನಕಾರಾತ್ಮಕವಾಗಿದ್ದ ಪ್ರಸ್ತುತ ಆರ್ಥಿಕ ಪರಿಸ್ಥಿತಿಯ ಬಗ್ಗೆ ಗ್ರಹಿಕೆಗಳು ಮಾರ್ಚ್ 2024 ರಲ್ಲಿ ಸಕಾರಾತ್ಮಕವಾಗಲು ಸುಧಾರಿಸಿವೆ. ಮಾರ್ಚ್ 2023 ರಿಂದ ಜನವರಿ 2024 ರವರೆಗೆ ನಕಾರಾತ್ಮಕವಾಗಿದ್ದ ಉದ್ಯೋಗಕ್ಕೆ ಸಂಬಂಧಿಸಿದ ಗ್ರಹಿಕೆಗಳು ಮಾರ್ಚ್ 2024 ರಲ್ಲಿ ತಟಸ್ಥ (ಶೂನ್ಯ) ಆಗಿದ್ದರೆ, ಬೆಲೆ ಮಟ್ಟ ಮತ್ತು ಹಣದುಬ್ಬರ ಎರಡಕ್ಕೂ ಸಂಬಂಧಿಸಿದ ಗ್ರಹಿಕೆಗಳು ಮಾರ್ಚ್ 2024 ರಲ್ಲಿಯೂ ನಕಾರಾತ್ಮಕವಾಗಿ ಉಳಿದಿವೆ. ಆದಾಗ್ಯೂ ಕಳೆದ ಅವಧಿಗೆ ಹೋಲಿಸಿದರೆ ನಕಾರಾತ್ಮಕ ಭಾವನೆಗಳ ಮಟ್ಟ ಕಡಿಮೆಯಾಗಿದೆ.

ಪ್ರಸ್ತುತ ವೆಚ್ಚದ ಬಗ್ಗೆ ಗ್ರಹಿಕೆಗಳು ಸಕಾರಾತ್ಮಕವಾಗಿದ್ದರೂ, ನವೆಂಬರ್ 2023 ರ ನಂತರ ಕಡಿಮೆಯಾಗಿವೆ ಮತ್ತು ಸೆಪ್ಟೆಂಬರ್ 2023 ರಲ್ಲಿ ಇದ್ದಂತೆಯೇ ಇವೆ. ಗ್ರಾಹಕರು ಅಗತ್ಯ ವಸ್ತುಗಳ ಮೇಲೆ ಖರ್ಚು ಮಾಡುವ ಬಗ್ಗೆ ಆಶಾವಾದಿಗಳಾಗಿದ್ದಾರೆ, ಆದರೆ ಅಗತ್ಯವಲ್ಲದ ವಸ್ತುಗಳ ಮೇಲಿನ ವೆಚ್ಚದ ಬಗ್ಗೆ ನಿರಾಶಾವಾದಿಗಳಾಗಿದ್ದಾರೆ. ಆದಾಯಕ್ಕೆ ಸಂಬಂಧಿಸಿದ ಗ್ರಹಿಕೆಯಲ್ಲಿ ಮಾತ್ರ ನಾವು ಸ್ಪಷ್ಟ ಆಶಾವಾದವನ್ನು ಗ್ರಹಿಸಬಹುದು.

ಇತರ ಆರ್ಥಿಕ ಅಂಕಿ ಅಂಶಗಳು ಕೂಡ ಈ ಪ್ರವೃತ್ತಿಗಳನ್ನು ಬೆಂಬಲಿಸುತ್ತಿರುವಂತೆ ಕಾಣಿಸುತ್ತದೆ. ಉದಾಹರಣೆಗೆ, ಏಪ್ರಿಲ್ 26, 2024 ರಂದು ಸರ್ಕಾರ ಬಿಡುಗಡೆ ಮಾಡಿದ ಮಾಹಿತಿಯ ಪ್ರಕಾರ, ಗ್ರಾಮೀಣ ಪ್ರದೇಶಗಳಲ್ಲಿ ಕೇಂದ್ರದ ಮಹಾತ್ಮ ಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಕಾಯ್ದೆ 2005 (ಮನರೇಗಾ) ಅಡಿ ಖಾತರಿಪಡಿಸಿದ ಗ್ರಾಮೀಣ ಉದ್ಯೋಗದ ಪ್ರಮಾಣವು 2022-23ರ ಆರ್ಥಿಕ ವರ್ಷದಲ್ಲಿ ಕಡಿಮೆಯಾಗಿದೆ.

ಅಂದರೆ ಮನರೇಗಾ ಅಡಿ ಪ್ರತಿ ಕುಟುಂಬಕ್ಕೆ ಸಿಕ್ಕ ಸರಾಸರಿ ಉದ್ಯೋಗದ ದಿನಗಳು 2022-203ರ ಹಣಕಾಸು ವರ್ಷದಲ್ಲಿ 47.84 ಕ್ಕೆ ಇಳಿಕೆಯಾಗಿವೆ. ಇದು ಐದು ವರ್ಷಗಳ ಕನಿಷ್ಠವಾಗಿದೆ. ಪರ್ಚೇಸಿಂಗ್ ಮ್ಯಾನೇಜರ್ಸ್​ ಇಂಡೆಕ್ಸ್​ನಿಂದ ಅಳೆಯಲಾಗುವ, ಲಭ್ಯವಾದ ಮತ್ತೊಂದು ಅಂಕಿ ಅಂಶಗಳ ಪ್ರಕಾರ ಉದ್ಯಮ ವಲಯದ ವಿಶ್ವಾಸವು ಹೆಚ್ಚಾಗಿದೆ. ಇದು 2024ರ ಏಪ್ರಿಲ್​ನಲ್ಲಿ ಗರಿಷ್ಠ 58.8 ಮಟ್ಟಕ್ಕೆ ತಲುಪಿದೆ. ಏಪ್ರಿಲ್ ಪಿಎಂಐ ಮೌಲ್ಯವು ಹಿಂದಿನ ತಿಂಗಳ ಅಂಕಿ ಅಂಶವಾದ 59.1 ಕ್ಕಿಂತ ಕಡಿಮೆಯಿದ್ದರೂ, ಬಲವಾದ ಬೇಡಿಕೆ ಪರಿಸ್ಥಿತಿಗಳಿಂದ ವ್ಯಾಪಾರ ಭಾವನೆಗಳು ಬಲಗೊಳ್ಳುತ್ತಿರುವುದನ್ನು ಸೂಚಿಸುತ್ತದೆ. ಇದು ಕಳೆದ ಮೂರೂವರೆ ವರ್ಷಗಳಲ್ಲಿಯೇ ಅತ್ಯುತ್ತಮವಾಗಿದೆ.

ಭಾರತವು ಹೆಚ್ಚಾಗಿ ಬಳಕೆ-ಚಾಲಿತ ಆರ್ಥಿಕತೆಯಾಗಿದ್ದು, ದೇಶದ ನಾಮಿನಲ್ ಜಿಡಿಪಿಯಲ್ಲಿ ಇದರ ಪ್ರಮಾಣವೇ ಶೇ 60ರಷ್ಟಿದೆ. ಇಂಥ ಬಳಕೆಯು ಹೆಚ್ಚಾಗಿ ಗ್ರಾಹಕರ ಖರ್ಚು ಮಾಡಬಹುದಾದ ಆದಾಯವನ್ನು ಅವಲಂಬಿಸಿರುತ್ತದೆ. ಆದಾಗ್ಯೂ, ಇದು ಗ್ರಾಹಕರ ವಿಶ್ವಾಸವನ್ನು ಸಹ ಅವಲಂಬಿಸಿರುತ್ತದೆ. ಇದು ಅನಿಶ್ಚಿತ ಸಮಯಗಳಲ್ಲಿ ಬಳಕೆಯಲ್ಲಿ ಕುಸಿತಕ್ಕೆ ಕಾರಣವಾಗುವ ಪ್ರಮುಖ ಅಂಶವಾಗುತ್ತದೆ ಹಾಗೂ ಇತರ ಬಾಹ್ಯ ಪರಿಸ್ಥಿತಿಗಳ ಕಾರಣದಿಂದಾಗಿ ಅಭಿವೃದ್ಧಿ ಹೊಂದುತ್ತಿರುವ ಆರ್ಥಿಕ ಹಿಂಜರಿತದ ಪರಿಸ್ಥಿತಿಗಳನ್ನು ಹೆಚ್ಛಾಗುವಂತೆ ಮಾಡುತ್ತದೆ. ಹೀಗಾಗಿ ನೀತಿ ನಿರೂಪಕರು ಜಾಗರೂಕರಾಗಿರಬೇಕು ಮತ್ತು ಗ್ರಾಹಕರ ವಿಶ್ವಾಸ ಸೂಚ್ಯಂಕದ ಅಂಶಗಳು ನೀತಿ ನಿರೂಪಕರ ಆರ್ಥಿಕ ಮೌಲ್ಯಮಾಪನಗಳು ಮತ್ತು ಘೋಷಣೆಗಳಿಗೆ ಪೂರಕವಾಗಿರುವುದನ್ನು ಖಚಿತಪಡಿಸಿಕೊಳ್ಳಬೇಕು.

ಲೇಖನ: ತುಳಸಿ ಜಯಕುಮಾರ್, ಪ್ರಾಧ್ಯಾಪಕರು, ಹಣಕಾಸು ಮತ್ತು ಅರ್ಥಶಾಸ್ತ್ರ ಮತ್ತು ಕಾರ್ಯನಿರ್ವಾಹಕ ನಿರ್ದೇಶಕ, ಸೆಂಟರ್ ಫಾರ್ ಫ್ಯಾಮಿಲಿ ಬಿಸಿನೆಸ್ & ಎಂಟರ್ ಪ್ರೆನ್ಯೂರ್​ಶಿಪ್, ಎಸ್​ಪಿಜೆಐಎಂಆರ್

(ಲೇಖನದಲ್ಲಿ ವ್ಯಕ್ತಪಡಿಸಲಾದ ಅಭಿಪ್ರಾಯಗಳು ಲೇಖಕರ ವೈಯಕ್ತಿಕ ಅಭಿಪ್ರಾಯಗಳಾಗಿವೆ)

ಇದನ್ನೂ ಓದಿ : ವ್ಯೂಹಾತ್ಮಕ ತಂತ್ರಗಾರಿಕೆ: ಸೇನಾ ಪಡೆಗಳ ಪುನರ್​ರಚನೆ ಮಾಡಿದ ಚೀನಾ - China Military