ಚಳಿಗಾಲದಲ್ಲಿ ಬೆಳ್ಳುಳ್ಳಿ ರಸಂ ಕೆಮ್ಮು & ನೆಗಡಿಗೆ ಸೂಪರ್ ಮನೆಮದ್ದು: ಸಿದ್ಧಪಡಿಸೋದು ತುಂಬಾ ಸರಳ

Garlic Rasam Recipe: ಕೆಮ್ಮು ಹಾಗೂ ನೆಗಡಿ ಬಂದಾಗ ನಿಮ್ಮ ಬಾಯಿಗೆ ಯಾವ ಆಹಾರ ಕೂಡ ರುಚಿಸುವುದಿಲ್ಲ. ಆದ್ರೆ, 'ಬೆಳ್ಳುಳ್ಳಿ ರಸಂ' ಕೆಮ್ಮು, ನೆಗಡಿಗೆ ಮನೆಮದ್ದು ಆಗಿ ಬಳಕೆ ಮಾಡಬಹುದು ಎಂದು ತಜ್ಞರು ತಿಳಿಸುತ್ತಾರೆ.

Garlic Rasam Recipe:ಚಳಿಗಾಲದಲ್ಲಿನ ಹವಾಮಾನದ ಬದಲಾವಣೆಗಳಿಂದ ಅನೇಕರು ಕೆಮ್ಮು, ನೆಗಡಿ ಹಾಗೂ ಜ್ವರದಂತಹ ಆರೋಗ್ಯದ ಸಮಸ್ಯೆಗಳಿಂದ ಬಳಲುತ್ತಿದ್ದಾರೆ. ಆರೋಗ್ಯ ಸರಿಯಿಲ್ಲದ ವೇಳೆಯಲ್ಲಿ ಬಾಯಿಗೆ ಏನೂ ರುಚಿ ಬರುವುದಿಲ್ಲ. ಈ ಸಂದರ್ಭದಲ್ಲಿ 'ಬೆಳ್ಳುಳ್ಳಿ ರಸಂ' ಸಿದ್ಧಪಡಿಸಿ ಸೇವಿಸಬಹುದು.

ಈ ರಸಂ ತುಂಬಾ ರುಚಿಕರ ಹಾಗೂ ಆರೋಗ್ಯಕ್ಕೂ ಒಳ್ಳೆಯದು. ಕೆಮ್ಮು, ನೆಗಡಿ ಹಾಗೂ ಜ್ವರಕ್ಕೆ ಉತ್ತಮ ಪರಿಹಾರ ಲಭಿಸುತ್ತದೆ. ಈ ರಸಂ ತಯಾರಿಸಲು ಹೆಚ್ಚಿನ ಶ್ರಮ ವಹಿಸುವ ಅಗತ್ಯವಿಲ್ಲ. ಕೆಲವೇ ನಿಮಿಷಗಳಲ್ಲಿ ಈ ರಸಂ ಅನ್ನು ತುಂಬಾ ಸುಲಭವಾಗಿ ಸಿದ್ಧಪಡಿಸಬಹುದು. ಬೆಳ್ಳುಳ್ಳಿ ರಸಂ ಹೇಗೆ ತಯಾರಿಸಬೇಕೆಂಬುದನ್ನು ಇಲ್ಲಿ ತಿಳಿಯೋಣ.

ಬೆಳ್ಳುಳ್ಳಿ ರಸಂ ರೆಡಿ ಮಾಡಲು ಬೇಕಾಗಿರುವ ಪದಾರ್ಥಗಳೇನು?:

• ಹುಣಸೆಹಣ್ಣು - ಒಂದು ಚಿಕ್ಕ ನಿಂಬೆಹಣ್ಣಿನ ಗಾತ್ರದಷ್ಟು
• ಟೊಮೆಟೊ - ಎರಡು (ಮಧ್ಯಮ ಗಾತ್ರ)
• ಕಾಳುಮೆಣಸು - ಅರ್ಧ ಟೀಸ್ಪೂನ್
• ಜೀರಿಗೆ - ಎರಡು ಟೀಸ್ಪೂನ್
• ಬೆಳ್ಳುಳ್ಳಿ ಎಸಳು - ಒಂದು ಹಿಡಿಯಷ್ಟು
• ಎಣ್ಣೆ - 1 ಟೀಸ್ಪೂನ್
• ಹಸಿಮೆಣಸಿನಕಾಯಿ - 5
• ಕರಿಬೇವು - 2 ಎಲೆಗಳು
• ಉಪ್ಪು - ರುಚಿಗೆ ಬೇಕಾಗುವಷ್ಟು
• ಅರಿಶಿನ - ಅರ್ಧ ಟೀಸ್ಪೂನ್
• ಕೊತ್ತಂಬರಿ ಸೊಪ್ಪು - ಸ್ವಲ್ಪ

ಒಗ್ಗರಣೆ ನೀಡಲು ಬೇಕಾಗುವ ಸಾಮಗ್ರಿಗಳು:

• ಎಣ್ಣೆ - 1 ಟೀಸ್ಪೂನ್
• ಮೆಂತ್ಯಕಾಳು - ಒಂದು ಚಿಟಿಕೆ
• ಜೀರಿಗೆ - ಅರ್ಧ ಟೀಸ್ಪೂನ್
• ಸಾಸಿವೆ - ಅರ್ಧ ಟೀಟೀಸ್ಪೂನ್
• ಮೆಣಸಿನಕಾಯಿ - 4
• ಕರಿಬೇವು ಎಲೆ - ಸ್ವಲ್ಪ
• ಬೆಳ್ಳುಳ್ಳಿ ಎಸಳು - 3
• ಇಂಗು - ಒಂದು ಚಿಟಿಕೆ

ಬೆಳ್ಳುಳ್ಳಿ ರಸಂ ಸಿದ್ಧಪಡಿಸುವ ವಿಧಾನ:

• ಮೊದಲು ಹುಣಸೆಹಣ್ಣನ್ನು ಚಿಕ್ಕ ಬೌಲ್​ನಲ್ಲಿ ತೊಳೆದು ಹತ್ತು ನಿಮಿಷಗಳ ಕಾಲ ನೆನೆಸಿಟ್ಟುಕೊಳ್ಳಿ.
• ಈಗ ಅಡುಗೆಗೆ ಬೇಕಾಗಿರುವ ಟೊಮೆಟೊಯನ್ನು ಮಧ್ಯಮ ಗಾತ್ರದ ಪೀಸ್​ಗಳಾಗಿ ಕಟ್​ ಮಾಡಿ ಇಟ್ಟುಕೊಳ್ಳಬೇಕಾಗುತ್ತದೆ. ಜೊತೆಗೆ ಹಸಿಮೆಣಸಿನಕಾಯಿಯನ್ನು ಉದ್ದವಾಗಿ ಹಾಗೂ ಸಣ್ಣಗೆ ಕಟ್​ ಮಾಡಿ ಇಡಬೇಕು.
• ಹುಣಸೆಹಣ್ಣು ಚೆನ್ನಾಗಿ ನೆನೆಸಿದ ಬಳಿಕ, ಅದರ ರಸವನ್ನು ತೆಗೆದುಕೊಂಡು ಪಕ್ಕಕ್ಕೆ ಇಡಿ.
• ಇದೀಗ ಮಿಕ್ಸರ್ ಜಾರ್ ತೆಗೆದುಕೊಂಡು ಮೊದಲು ಜೀರಿಗೆ ಹಾಗೂ ಮೆಣಸಿನಕಾಯಿಗಳನ್ನು ಸೇರಿಸಿ ನುಣ್ಣಗೆ ಪುಡಿ ಮಾಡಿಕೊಳ್ಳಿ. ಬಳಿಕ ಬೆಳ್ಳುಳ್ಳಿ ಎಸಳುಗಳನ್ನು ಸೇರಿಸಿ, ಅವುಗಳ ಸಣ್ಣಗೆ ಆಗುವ ತನಕ ಮತ್ತೆ ಮಿಕ್ಸರ್​ ಮಾಡಿ ಪಕ್ಕಕ್ಕೆ ಇಟ್ಟುಕೊಳ್ಳಬೇಕಾಗುತ್ತದೆ.
• ಇದಾದ ಬಳಿಕ ಒಲೆಯ ಮೇಲೆ ಒಂದು ಪಾತ್ರೆಯನ್ನು ಇಡಿ. ಅದರೊಳಗೆ ಎಣ್ಣೆ ಸೇರಿಸಿಕೊಳ್ಳಬೇಕಾಗುತ್ತದೆ. ಎಣ್ಣೆ ಬಿಸಿಯಾದ ಬಳಿಕ, ಹಸಿಮೆಣಸಿನಕಾಯಿ ಮತ್ತು ಕರಿಬೇವು ಎಲೆಗಳನ್ನು ಸೇರಿಸಿ ಸ್ವಲ್ಪ ಹೊತ್ತು ಹುರಿಯಬೇಕಾಗುತ್ತದೆ.
• ಇವೆಲ್ಲವು ಬೆಂದ ಬಳಿಕ, ಕಟ್​ ಮಾಡಿದ ಟೊಮೆಟೊ ಪೀಸ್​ಗಳನ್ನು ಹಾಕಿ. ಇವು ಮೃದುವಾಗುವವರೆಗೆ ಫ್ರೈ ಮಾಡಿ. ಹುರಿಯುವಾಗ ಉಪ್ಪು ಹಾಗೂ ಅರಿಶಿನ ಸೇರಿಸಿ.
• ಟೊಮೆಟೊ ಪೀಸ್​ಗಳು ಚೆನ್ನಾಗಿ ಬೆಂದ ಬಳಿಕ, ಈ ಮೊದಲೇ ರುಬ್ಬಿದ ಬೆಳ್ಳುಳ್ಳಿ ಮಿಶ್ರಣವನ್ನು ಇದರೊಳಗೆ ಸೇರಿಸಿ. ಎರಡು ನಿಮಿಷಗಳ ಕಾಲ ಕಡಿಮೆ ಉರಿಯಲ್ಲಿ ಫ್ರೈ ಮಾಡಬೇಕಾಗುತ್ತದೆ.
• ಮೊದಲೇ ತಯಾರಿಸಿದ ಹುಣಸೆ ರಸ ಹಾಗೂ ಒಂದೂವರೆ ಲೀಟರ್ ನೀರನ್ನು ಇದರೊಳಗೆ ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿಕೊಳ್ಳಿ. ಈ ವೇಳೆಯಲ್ಲಿ ನೀವು ಉಪ್ಪು ಹಾಗೂ ಖಾರದ ಪ್ರಮಾಣವನ್ನು ಚೆಕ್​ ಮಾಡಿಕೊಳ್ಳಿ. ಈ ರಸಂ ತುಂಬಾ ಹುಳಿಯಾಗಿದ್ದರೆ, ನೀವು ಸ್ವಲ್ಪ ನೀರನ್ನು ಸೇರಿಸಬೇಕು.
• ಇದರೊಳಗೆ ಕೊತ್ತಂಬರಿ ಸೊಪ್ಪು ಸೇರಿಸಿ ಮಧ್ಯಮ ಉರಿಯಲ್ಲಿ ಐದು ನಿಮಿಷಗಳ ಕಾಲ ಕುದಿಸಬೇಕಾಗುತ್ತದೆ.
• ಇದೀಗ, ಮತ್ತೊಂದು ಒಲೆಯ ಮೇಲೆ ಒಗ್ಗರಣೆಯನ್ನು ತಯಾರಿಸಿ. ಒಂದು ಸಣ್ಣ ಪ್ಯಾನ್ ತೆಗೆದುಕೊಂಡು ಎಣ್ಣೆ ಹಾಕಿ. ಎಣ್ಣೆ ಬಿಸಿಯಾದ ಬಳಿಕ, ಮೆಂತ್ಯ ಸೇರಿಸಿ ಫ್ರೈ ಮಾಡಬೇಕು.
• ಸ್ವಲ್ಪ ಬೆಂದ ಬಳಿಕ ಜೀರಿಗೆ, ಸಾಸಿವೆ, ಒಣ ಮೆಣಸಿನಕಾಯಿ, ಜಜ್ಜಿದ ಬೆಳ್ಳುಳ್ಳಿ ಎಸಳು, ಕರಿಬೇವು ಮತ್ತು ಇಂಗು ಸೇರಿಸಿ ಹುರಿದುಕೊಳ್ಳಬೇಕಾಗುತ್ತದಾರೆ.
• ಒಗ್ಗರಣೆ ರೆಡಿಯಾದ ಬಳಿಕ, ಇದನ್ನು ಪಕ್ಕದ ಒಲೆಯ ಮೇಲೆ ಕುದಿಯುತ್ತಿರುವ ರಸಂನಲ್ಲಿ ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿಕೊಳ್ಳಿ.
• ಅಂತಿಮವಾಗಿ ಈ ರಸಂನೊಳಗೆ, ಸ್ವಲ್ಪ ಕೊತ್ತಂಬರಿ ಸೊಪ್ಪು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿಕೊಳ್ಳಬೇಕಾಗುತ್ತದೆ. ಆಗ ರುಚಿಕರ 'ಬೆಳ್ಳುಳ್ಳಿ ರಸಂ' ಸವಿಯಲು ಸಿದ್ಧ!

ಇವುಗಳನ್ನೂ ಓದಿ: