ಹಮಾಸ್​-ಇಸ್ರೇಲ್​ ಕದನ ವಿರಾಮ, ಒತ್ತೆಯಾಳುಗಳ ಬಿಡುಗಡೆ ಒಪ್ಪಂದ ಘೋಷಣೆ: ಯುದ್ಧ ಅಂತ್ಯಗೊಳಿಸಲು ನಿರ್ಧಾರ

ಹಮಾಸ್​ ಮತ್ತು ಇಸ್ರೇಲ್​ ನಡುವಿನ ಕದನ ವಿರಾಮ ಹಾಗೂ ಒತ್ತೆಯಾಳುಗಳ ಬಿಡುಗಡೆಗೆ ಕತಾರ್​ ಮತ್ತು ಅಮೆರಿಕ ಘೋಷಣೆ ಮಾಡಿದೆ.

ದೋಹಾ: ಕಳೆದೊಂದು ವರ್ಷದಿಂದ ಸಾಗುತ್ತಿರುವ ಗಾಜಾ ಮತ್ತು ಇಸ್ರೇಲ್​ ಯುದ್ಧ ನಿಲ್ಲುವ ಭರವಸೆ ಮೂಡಿದೆ. ಹಮಾಸ್​ ಮತ್ತು ಇಸ್ರೇಲ್​ ನಡುವಿನ ಕದನ ವಿರಾಮ ಹಾಗೂ ಒತ್ತೆಯಾಳುಗಳ ಬಿಡುಗಡೆ ಕುರಿತು ಕತಾರ್​ ಮತ್ತು ಅಮೆರಿಕ ಘೋಷಣೆ ಮಾಡಿವೆ. ಈ ಕುರಿತು ನಡೆದ ಒಪ್ಪಂದದಲ್ಲಿ ಈ ನಿರ್ಣಯಕ್ಕೆ ಬರಲಾಗಿದೆ. ಆದರೆ, ಈ ಕುರಿತು ಅಂತಿಮ ಮಾತುಕತೆ ಬಾಕಿ ಇದ್ದು, ಈ ಸಂಬಂಧ ಕಾರ್ಯ ನಿರ್ವಹಿಸಲಾಗುವುದು ಎಂದು ಕೂಡ ಇಸ್ರೇಲ್​ ಪ್ರಧಾನಿ ಬೆಂಜಮಿನ್​ ನೇತನ್ಯಾಹು ತಿಳಿಸಿದ್ದಾರೆ.

ಅಮೆರಿಕ ಅಧ್ಯಕ್ಷ ಜೋ ಬಿಡೆನ್​ ಮತ್ತು ಚುನಾಯಿತ ಅಧ್ಯಕ್ಷ ಡೋನಾಲ್ಡ್​ ಟ್ರಂಪ್​ ಜೊತೆಗೆ ಬುಧವಾರ ನೇತನ್ಯಾಹು ಮಾತನಾಡಿದ್ದು, ಭದ್ರತಾ ಒಪ್ಪಂದಕ್ಕೆ ಸಹಾಯ ಮಾಡಿದ್ದಕ್ಕೆ ಧನ್ಯವಾದವನ್ನು ಸಲ್ಲಿಸಿದ್ದಾರೆ. ಈ ಒಪ್ಪಂದದಲ್ಲಿ ಇಸ್ರೇಲ್​ ಅಧ್ಯಕ್ಷ ಐಸಾಕ್ ಹೆರ್ಜೋಗ್​ ಕೂಡ ಪ್ರಮುಖ ಪಾತ್ರ ಹೊಂದಿದ್ದು, 2023ರ ಅಕ್ಟೋಬರ್​ 7ರಿಂದ ಆರಂಭವಾದ ಹಮಾಸ್​ ದಾಳಿಯಲ್ಲಿ ಒತ್ತೆಯಾಳಾಗಿರುವವರನ್ನು ಮರಳಿ ತರಲು ಇದು ಸರಿಯಾದ ಸಮಯ ಎಂದಿದ್ದಾರೆ.

2023ರ ಅಕ್ಟೋಬರ್​ 7ರಂದು ಹಮಾಸ್​ ನಡೆಸಿದ್ದ ದಾಳಿಯು ಇಸ್ರೇಲ್​ ಇತಿಹಾಸದಲ್ಲೇ ಭೀಕರ ದಾಳಿಯಾಗಿದ್ದು, ಇದರಲ್ಲಿ 1,210 ಮಂದಿ ಸಾವನ್ನಪ್ಪಿದ್ದರು ಎಂದು ಎಎಫ್​ಪಿ ತಿಳಿಸಿದೆ. ಈ ದಾಳಿಗೆ ಪ್ರತಿಯಾಗಿ ದಾಳಿ ನಿರ್ಧಾರ ಮಾಡಿದ ಇಸ್ರೇಕ್,​ ಗಾಜಾವನ್ನು ಬಹುಪಾಲು ನಾಶ ಮಾಡಿ, 46,707 ಮಂದಿ ಹತ್ಯೆ ನಡೆಸಿತು ಎಂದು ಹಮಾಸ್​ ಅಧಿಕಾರ ಹೊಂದಿರುವ ಪ್ರದೇಶದ ಆರೋಗ್ಯ ಸಚಿವರು ತಿಳಿಸಿದ್ದರು.

ಈ ಒಪ್ಪಂದ ಘೋಷಣೆಯಾದ ಬಳಿಕ ಇಸ್ರೇಲ್​ನಲ್ಲಿ ಕನಿಷ್ಠ 20 ಮಂದಿ ಸಾವನ್ನಪ್ಪಿದ್ದಾರೆ ಎಂದು ಗಾಜಾ ನಾಗರಿಕ ರಕ್ಷಣಾ ಪಡೆ ತಿಳಿಸಿದೆ.

ಭಾನುವಾರದಿಂದ ಕದನ ವಿರಾಮ ಜಾರಿ: ಈ ಒಪ್ಪಂದ ಕುರಿತು ಬುಧವಾರ ಮಾತನಾಡಿರುವ ಕತಾರ್ ಪ್ರಧಾನಿ ಶೇಖ್ ಮೊಹಮ್ಮದ್ ಬಿನ್ ಅಬ್ದುಲ್ರಹ್ಮಾನ್ ಬಿನ್ ಜಾಸಿಮ್ ಅಲ್-ಥಾನಿ, ಈ ಒಪ್ಪಂದಕ್ಕಾಗಿ ಎರಡು ನಿಯೋಗಗಳು ಗಾಜಾ ಪಟ್ಟಿ ಸೇರಿವೆ. ಕದನ ವಿರಾಮವೂ ಭಾನುವಾರದಿಂದ ಜಾರಿಯಾಗಲಿದೆ. ಇದು ಯುದ್ಧದ ಕೊನೆಯ ಪುಟ ಎಂಬ ಭರವಸೆಯನ್ನು ನಾವು ಹೊಂದಿದ್ದೇವೆ. ಈ ಒಪ್ಪಂದದ ಎಲ್ಲಾ ಷರ್ತುಗಳ ಜಾರಿಗೆ ಎಲ್ಲರೂ ಬದ್ಧವಾಗಿದ್ದಾರೆ ಎಂಬ ಭರವಸೆಯನ್ನು ನಾವು ಹೊಂದಿದ್ದೇವೆ ಎಂದಿದ್ದಾರೆ.

ಈ ನಡುವೆ ಮಾತನಾಡಿರುವ ಬಿಡೆನ್​, ಈ ದಿನ ಬಂದಿರುವುದಕ್ಕೆ ಅಗಾಧ ತೃಪ್ತಿ ಇದೆ. ಈ ಮಾತುಕತೆಯು ತನ್ನ ವೃತ್ತಿಯಲ್ಲಿನ ಕೆಲವು ಕಠಿಣಗಳಲ್ಲಿ ಒಂದಾಗಿದೆ. ಎರಡನೇ ಹಂತದ ಒಪ್ಪಂದವೂ ಯುದ್ಧವನ್ನು ಶಾಶ್ವತ ಅಂತ್ಯಕ್ಕೆ ತರುತ್ತದೆ ಎಂಬ ಕುರಿತು ಇನ್ನೂ ನಿರ್ಧಾರವಾಗಬೇಕಿದೆ. ಈ ಒಪ್ಪಂದ ಸಾಗುತ್ತದೆ ಎಂಬ ವಿಶ್ವಾಸವೂ ಇದೆ ಎಂದಿದ್ದಾರೆ.

ಕದನವಿರಾಮವೂ ಪ್ಯಾಲೇಸ್ತೇನಿಯರ ದೃಢತೆ ಮತ್ತು ಗಾಜಾ ಪಟ್ಟಿಯಲ್ಲಿ ನಮ್ಮ ಧೈರ್ಯದ ಪ್ರತಿರೋಧದ ಫಲಿತಾಂಶವಾಗಿದೆ ಎಂದು ಹಮಾಸ್​ ತಿಳಿಸಿದೆ.

ಒಪ್ಪಂದದ ಮೊದಲ 42 ದಿನ: ಕತಾರ್, ಈಜಿಪ್ಟ್ ಮತ್ತು ಅಮೆರಿಕ ಮದ್ಯವರ್ತಿಗಳು ಈ ಒಪ್ಪಂದ ಪ್ರಯತ್ನಗಳನ್ನು ತೀವ್ರಗೊಳಿಸಿದ್ದರಿಂದ, ಈ ಯುದ್ಧವೂ ಅಂತ್ಯದ ಅಂಚಿನಲ್ಲಿದೆ. ಕತಾರ್​ ಶೇಖ್​ ಮೊಹಮ್ಮದ್​ ಮಾತನಾಡಿ, ಮೂರು ದೇಶಗಳು ಕೈರೋ ಮೂಲದ ಸಂಸ್ಥೆಯ ಮೂಲಕ ಕದನ ವಿರಾಮ ಜಾರಿಗೆ ತರಲು ಮೇಲ್ವಿಚಾರಣೆ ನಡೆಸಲಿವೆ. ಕದನ ವಿರಾಮದ ಮೊದಲ 42 ದಿನದಲ್ಲಿ 33 ಒತ್ತೆಯಾಳುಗಳನ್ನು ಬಿಡುಗಡೆ ಮಾಡಲಾಗುವುದು. ಹಾಗೇ ಮೊದಲ ಹಂತದಲ್ಲಿ ಗಾಜಾದಲ್ಲಿರುವ ಇಸ್ರೇಲ್​ ಪಡೆಗಳನ್ನು ಹಿಂಪಡೆಯಲಿದೆ. ಎರಡನೇ ಹಂತದಲ್ಲಿ ಒತ್ತೆಯಾಳುಗಳ ವಿನಿಮಯವಾಗಿ ಪ್ಯಾಲೆಸ್ತೇನಿಯ ಜೈಲಿಯಲ್ಲಿರುವವರನ್ನು ಬಿಡುಗಡೆ ಮಾಡಲಾಗುವುದು. ಮೂರನೇ ಹಂತವು 42 ದಿನಗಳ ಬಳಿಕ ಅಂತಿಮಗೊಳಿಸಲಾಗುವುದು ಎಂದು ತಿಳಿಸಿದರು.

ಒತ್ತೆಯಾಳುಗಳನ್ನು ಬಿಡುಗಡೆ ಮಾಡುವಂತೆ ಆಗ್ರಹಿಸುತ್ತಿದ್ದ ಪ್ರತಿಭಟನಾಕಾರರು ಈ ಒಪ್ಪಂದ ಸುದ್ದಿ ತಿಳಿಯುತ್ತಿದ್ದಂತೆ ಗಾಜಾದಲ್ಲಿ ಸಾವಿರಾರು ಮಂದಿ ಸಂಭ್ರಮಾಚಾರಣೆ ಮಾಡಿದರು. ಈ ಕುರಿತು ಸಂತಸ ವ್ಯಕ್ತಪಡಿಸಿ ಮಾತನಾಡಿರುವ ಗಾಜಾದ 45 ವರ್ಷದ ವ್ಯಕ್ತಿ, ಕಳೆದೊಂದು ವರ್ಷದ ಕೆಟ್ಟ ಕನಸೊಂದು ಕಡೆಗೂ ಅಂತ್ಯಗೊಳ್ಳುತ್ತಿದೆ. ನಾವು ಸಾಕಷ್ಟು ಜನರನ್ನು ಮತ್ತು ಎಲ್ಲವನ್ನೂ ಕಳೆದುಕೊಂಡಿದ್ದೇವೆ ಎಂದು ಭಾವುಕರಾದರು.

ಇದನ್ನೂ ಓದಿ: ತಾಲಿಬಾನ್ - ಭಾರತ ಮಾತುಕತೆ, ಬಾಂಗ್ಲಾದೇಶ, ಪಾಕಿಸ್ತಾನಗಳಲ್ಲಿ ಬಿಕ್ಕಟ್ಟು: ದಕ್ಷಿಣ ಏಷ್ಯಾದಲ್ಲಿ ಕ್ಷಿಪ್ರ ಭೌಗೋಳಿಕ ಬೆಳವಣಿಗೆ