ನವದೆಹಲಿ:ರಾಜಧಾನಿ ಸಿಯೋಲ್ ಅನ್ನು ತನ್ನ ಉಪನಗರಗಳೊಂದಿಗೆ ಸಂಪರ್ಕಿಸುವ ಗ್ರೇಟ್ ಟ್ರೈನ್ ಎಕ್ಸ್‌ಪ್ರೆಸ್ (ಜಿಟಿಎಕ್ಸ್) ಎಂಬ ಹೊಸ ಹೈಸ್ಪೀಡ್ ರೈಲು ಯೋಜನೆಯನ್ನು ದಕ್ಷಿಣ ಕೊರಿಯಾ ಪ್ರಾರಂಭಿಸಿದೆ. ಜನರು ಕುಟುಂಬದೊಂದಿಗೆ ಸಮಯ ಕಳೆಯಲು ಇದನ್ನು ಜಾರಿ ಮಾಡಲಾಗಿದೆ. ಹೆಚ್ಚು ಮಕ್ಕಳ ಜನನಕ್ಕೆ ಈ ಯೋಜನೆ ಸಹಾಯ ಮಾಡುತ್ತದೆ.
ವರದಿಗಳ ಪ್ರಕಾರ, ಅಧ್ಯಕ್ಷ ಯೂನ್ ಸುಕ್ ಯೋಲ್ ಅವರು, ಗ್ರೇಟ್ ಟ್ರೈನ್ ಎಕ್ಸ್‌ಪ್ರೆಸ್ನ ಮೊದಲ ಹಂತದ ಯೋಜನೆ ಶುಕ್ರವಾರ ಉದ್ಘಾಟಿಸಿದರು. ಇದು ರಾಜಧಾನಿಯಲ್ಲಿರುವ ಸೂಸಿಯೊವನ್ನು ಉಪ ನಗರವಾದ ಡಾಂಗ್ಟಾನ್‌ನೊಂದಿಗೆ ಸಂಪರ್ಕಿಸುತ್ತದೆ. ಬಸ್‌ನಲ್ಲಿ ಪ್ರಯಾಣದ ಸಮಯವನ್ನು 80 ನಿಮಿಷಗಳಿಂದ 20 ನಿಮಿಷಗಳಿಗೆ ಕಡಿಮೆ ಮಾಡುತ್ತದೆ. ಜಿಟಿಎಕ್ಸ್ ಸುಸಿಯೊ-ಡಾಂಗ್ಟಾನ್ ಯೋಜನೆ ಆರಂಭಿಸುವುದು ಜನರ ಜೀವನವು ಗಮನಾರ್ಹವಾಗಿ ಬದಲಾಗುತ್ತದೆ" ಎಂದು ಯೂನ್ ಹೇಳಿಕೆ ಉಲ್ಲೇಖಿಸಿ ಯೋನ್ಹಾಪ್ ಸುದ್ದಿ ಸಂಸ್ಥೆಯು ವರದಿ ಮಾಡಿದೆ.
ಸುಸಿಯೊ ಮತ್ತು ಡೊಂಗ್ಟಾನ್ ನಡುವೆ ಇಂಟರ್‌ಸಿಟಿ ಬಸ್ 80 ನಿಮಿಷಗಳಿಗಿಂತ ಹೆಚ್ಚು ಸಮಯ ತೆಗೆದುಕೊಳ್ಳುತ್ತದೆ. ಈಗ ಅದನ್ನು 20 ನಿಮಿಷಗಳಿಗೆ ಇಳಿಸಲಾಗುತ್ತದೆ. ಕಷ್ಟದ ಪ್ರಯಾಣದಲ್ಲಿ ಒಂದು ಗಂಟೆಗಿಂತ ಹೆಚ್ಚು ಸಮಯ ಕಡಿಮೆ ಆಗಲಿದೆ. ಒಂದು ಗಂಟೆಯ ಕಡಿತವು ವಿತ್ತೀಯ ದೃಷ್ಟಿಯಿಂದ ತಿಂಗಳಿಗೆ 1.14 ಮಿಲಿಯನ್ ವೋನ್ (848 ಡಾಲರ್)ಗೆ ಸಮನಾಗಿರುತ್ತದೆ ಎಂದು ಸಂಶೋಧನೆಯನ್ನು ಉಲ್ಲೇಖಿಸಿ, ಕುಟುಂಬದ ಸಮಯ ಮತ್ತು ಕೆಲಸದ-ಜೀವನದ ಸಮತೋಲನವನ್ನು ಮರುಪಡೆಯುವುದು ಹೆಚ್ಚು ಅರ್ಥಪೂರ್ಣವಾಗಿದೆ ಎಂದು ಯೂನ್ ಹೇಳಿದರು. ಇದಕ್ಕೂ ಮೊದಲು, ಈ ವರ್ಷದ ಜನವರಿಯಲ್ಲಿ, ಹೆಚ್ಚಿನ ಸಿಯೋಲ್ ಪ್ರದೇಶದಲ್ಲಿ ವಾಸಿಸುವ ಜನರಿಗೆ ಪ್ರಯಾಣದ ಸಮಯವನ್ನು 30 ನಿಮಿಷಗಳವರೆಗೆ ಕಡಿಮೆ ಮಾಡುವುದಾಗಿ ಯೂನ್ ಭರವಸೆ ನೀಡಿದ್ದರು.
ಜಿಯೊಂಗಿ ಪ್ರಾಂತ್ಯದ ಉಯಿಜಿಯೊಂಗ್‌ಬುನಲ್ಲಿ ನಡೆದ ಟೌನ್ ಹಾಲ್ ಸಭೆಯಲ್ಲಿ ಯೂನ್ ಅವರ ಹೇಳಿಕೆ ಉಲ್ಲೇಖಿಸಿ ವರದಿ ಮಾಡಿದ ಕೊರಿಯಾ ಟೈಮ್ಸ್, ದೇಶಾದ್ಯಂತ ಪ್ರಮುಖ ಮೆಟ್ರೋಪಾಲಿಟನ್ ಪ್ರದೇಶಗಳ ನಿವಾಸಿಗಳು ದಿನಕ್ಕೆ ಸರಾಸರಿ ಎರಡು ಗಂಟೆಗಳ ಸಮಯವನ್ನು ಪ್ರಯಾಣಕ್ಕೆ ಮೀಸಲಿಡುತ್ತಾರೆ ಎಂದು ಹೇಳಿದರು.
ನಿರ್ದಿಷ್ಟವಾಗಿ ಹೇಳುವುದಾದರೆ, ಜಿಯೊಂಗಿ ಪ್ರಾಂತ್ಯ ಮತ್ತು ಇಂಚಿಯಾನ್‌ನಲ್ಲಿ ವಾಸಿಸುವ ಜನರಿಗೆ, ಸಿಯೋಲ್‌ನಿಂದ ರೌಂಡ್ ಟ್ರಿಪ್ ಎರಡೂವರೆ ಗಂಟೆಗಳಿಗಿಂತ ಹೆಚ್ಚು ಬೇಕಾಗುತ್ತದೆ.
ಸರಿಯಾದ ಸಾರಿಗೆ ಮೂಲಸೌಕರ್ಯದಿಂದ ಜನರು ಹೆಚ್ಚು ನಿದ್ರೆ ಮಾಡಲು ಅಥವಾ ಸ್ವಯಂ ಸುಧಾರಣೆಗೆ ಹೆಚ್ಚುವರಿ ಸಮಯವನ್ನು ಕಳೆಯಲು ಸಾಧ್ಯವಾಗುತ್ತದೆ. ಅತ್ಯಂತ ಮುಖ್ಯವಾದ ವಿಷಯವೆಂದರೆ, ಅದು ತನ್ನ ಕುಟುಂಬದೊಂದಿಗೆ ಹೆಚ್ಚು ಸಮಯ ಕಳೆಯಲು ಅವಕಾಶ ನೀಡುತ್ತದೆ ಎಂದು ಯೂನ್ ಅಭಿಪ್ರಾಯಪಟ್ಟಿದ್ದಾರೆ.
ಹೆರಿಗೆ ಸಂಖ್ಯೆ ಶೇ 8ರಷ್ಟು ಕುಸಿತ:ದಕ್ಷಿಣ ಕೊರಿಯಾವು ವಿಶ್ವದಲ್ಲೇ ಅತ್ಯಂತ ಕಡಿಮೆ ಜನನ ಪ್ರಮಾಣವನ್ನು ಹೊಂದಿದೆ. ದಕ್ಷಿಣ ಕೊರಿಯಾದ ಸರ್ಕಾರದ ಇತ್ತೀಚಿನ ಮಾಹಿತಿಯು 2023ರಲ್ಲಿ ದೇಶದ ಫಲವತ್ತತೆ ದರದಲ್ಲಿ ಆತಂಕಕಾರಿ ಕುಸಿತವನ್ನು ಬಹಿರಂಗಪಡಿಸಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಹೆರಿಗೆ ಸಂಖ್ಯೆ ಶೇ 8ರಷ್ಟು ಕುಸಿದಿದೆ. ಪ್ರಸ್ತುತ ಕಡಿಮೆ ಜನನ ಪ್ರಮಾಣ ಮುಂದುವರಿದರೆ, ಈ ಶತಮಾನದ ಅಂತ್ಯದ ವೇಳೆಗೆ ದಕ್ಷಿಣ ಕೊರಿಯಾದ 51 ಮಿಲಿಯನ್ ಜನಸಂಖ್ಯೆಯು ಅರ್ಧದಷ್ಟು ಕಡಿಮೆಯಾಗಬಹುದು ಎಂದು ತಜ್ಞರು ಎಚ್ಚರಿಸಿದ್ದಾರೆ.
ಸರಾಸರಿ ದಕ್ಷಿಣ ಕೊರಿಯಾದ ಮಹಿಳೆ ತನ್ನ ಜೀವಿತಾವಧಿಯಲ್ಲಿ ಕೇವಲ 0.72 ಮಕ್ಕಳಿಗೆ ಜನ್ಮ ನೀಡುವ ನಿರೀಕ್ಷೆಯಿದೆ ಎಂದು ಡೇಟಾ ತಿಳಿಸುತ್ತದೆ. ಇದು 2022 ರಲ್ಲಿ 0.78 ರಿಂದ ಗಮನಾರ್ಹವಾಗಿ ಕಡಿಮೆಯಾಗಿದೆ. ಇದಲ್ಲದೆ, ಈ ಫಲವತ್ತತೆ ದರವು 2024 ರ ವೇಳೆಗೆ 0.68 ಕ್ಕೆ ಮತ್ತಷ್ಟು ಕುಸಿಯಬಹುದು ಎಂದು ಅಂಕಿ ಅಂಶಗಳು ಸೂಚಿಸುತ್ತವೆ.
ಜನನ ಪ್ರಮಾಣ ಏಕೆ ಕಡಿಮೆಯಾಗಿದೆ?:ಜನನ ದರಗಳಲ್ಲಿನ ಈ ತೀಕ್ಷ್ಣವಾದ ಕುಸಿತವು ದಕ್ಷಿಣ ಕೊರಿಯಾದ ಜನಸಂಖ್ಯಾ ಬಿಕ್ಕಟ್ಟಿನ ತೀವ್ರತೆಯನ್ನು ಎತ್ತಿ ತೋರಿಸುತ್ತದೆ. ಮತ್ತು ದೇಶದ ಫಲವತ್ತತೆ ದರ ಕುಸಿಯಲು ಕಾರಣವಾಗಿರುವ ಸಾಮಾಜಿಕ, ಆರ್ಥಿಕ ಮತ್ತು ನೀತಿ ಅಂಶಗಳನ್ನು ಪರಿಹರಿಸುವ ತುರ್ತು ಅಗತ್ಯವಿದೆ. ಈ ಪ್ರವೃತ್ತಿಯನ್ನು ಹಿಮ್ಮೆಟ್ಟಿಸಲು ವಿಫಲವಾದರೆ ದೇಶದ ಭವಿಷ್ಯದ ಕಾರ್ಯಪಡೆ, ಆರ್ಥಿಕ ಉತ್ಪಾದಕತೆ ಮತ್ತು ಸಾಮಾಜಿಕ ವ್ಯವಸ್ಥೆಗಳ ಮೇಲೆ ಹೆಚ್ಚಿನ ಅಡ್ಡ ಪರಿಣಾಮಗಳನ್ನು ಉಂಟುಮಾಡಬಹುದು.
ಹಾಗಾದರೆ, ದಕ್ಷಿಣ ಕೊರಿಯಾದಲ್ಲಿ ಜನನ ಪ್ರಮಾಣ ಏಕೆ ಕಡಿಮೆಯಾಗಿದೆ? ಪೂರ್ವ ಏಷ್ಯಾದ ರಾಷ್ಟ್ರವು ಅತ್ಯಂತ ಸ್ಪರ್ಧಾತ್ಮಕ ಉದ್ಯೋಗ ಮಾರುಕಟ್ಟೆ ಮತ್ತು ದೀರ್ಘಾವಧಿಯ ಕೆಲಸದ ಸಮಯವನ್ನು ಹೊಂದಿದೆ. ಇದರಿಂದಾಗಿ ದಂಪತಿಗಳು ಕೆಲಸ ಮತ್ತು ಕುಟುಂಬ ಜೀವನವನ್ನು ಸಮತೋಲನಗೊಳಿಸುವುದು ಕಷ್ಟಕರವಾಗಿದೆ. ಹೆಚ್ಚಿನ ವಸತಿ ಮತ್ತು ಶಿಕ್ಷಣದ ವೆಚ್ಚಗಳು ಮಕ್ಕಳನ್ನು ಹೊಂದಲು ಕೆಲವು ಜನರನ್ನು ನಿರುತ್ಸಾಹಗೊಳಿಸಿವೆ.
ಅನೇಕ ಅಭಿವೃದ್ಧಿ ಹೊಂದಿದ ದೇಶಗಳಂತೆ, ದಕ್ಷಿಣ ಕೊರಿಯಾವು ಹೆಚ್ಚು ವೈಯಕ್ತಿಕ ಮೌಲ್ಯಗಳತ್ತ ಬದಲಾವಣೆಯನ್ನು ಕಂಡಿದೆ. ಅಲ್ಲಿ ಮದುವೆ ಮತ್ತು ಮಕ್ಕಳನ್ನು ಹೊಂದುವುದು ಕೆಲವು ಜನರಿಗೆ ಕಡಿಮೆ ಆದ್ಯತೆಯಾಗಿದೆ. ಕೇವಲ ಒಂದು ಮಗುವನ್ನು ಹೊಂದುವ ಅಥವಾ ಮಕ್ಕಳಿಲ್ಲದೆ ಉಳಿಯುವ ಕಲ್ಪನೆಯು ಹೆಚ್ಚು ಸ್ವೀಕಾರಾರ್ಹವಾಗಿದೆ. ಮಹಿಳಾ ಉದ್ಯೋಗಿಗಳ ಭಾಗವಹಿಸುವಿಕೆಯ ಹೆಚ್ಚಳದ ಹೊರತಾಗಿಯೂ, ದಕ್ಷಿಣ ಕೊರಿಯಾದ ಸಮಾಜವು ಇನ್ನೂ ತಂದೆಗಿಂತ ತಾಯಂದಿರ ಮೇಲೆ ಮಗುವಿನ ಆರೈಕೆಯ ಹೆಚ್ಚಿನ ಹೊರೆಯನ್ನು ಹಾಕುತ್ತದೆ. ಇದು ವೃತ್ತಿ ಮತ್ತು ಕುಟುಂಬವನ್ನು ಸಂಯೋಜಿಸಲು ಸವಾಲಾಗುವಂತೆ ಮಾಡುತ್ತದೆ. ಈ ವರ್ಷದ ಫೆಬ್ರವರಿಯಲ್ಲಿ ಅಲ್ ಜಜೀರಾ ವರದಿಯು ಇದನ್ನು ದೃಢಪಡಿಸಿತ್ತು. ಶಿಶುಪಾಲನಾ ನೆರವು, ಪೋಷಕರ ರಜೆ ಇತ್ಯಾದಿಗಳ ಮೂಲಕ ಹೆಚ್ಚಿನ ಫಲವತ್ತತೆಯನ್ನು ಉತ್ತೇಜಿಸುವಲ್ಲಿ ದಕ್ಷಿಣ ಕೊರಿಯಾದ ನೀತಿಗಳು ಸಂಪೂರ್ಣವಾಗಿ ಪರಿಣಾಮಕಾರಿಯಾಗಿಲ್ಲ ಎಂದು ಕೆಲವರು ವಾದಿಸುತ್ತಾರೆ.
ಕೆ.ಯೋಹೋಮ್ ಹೇಳಿಕೆ:ಶಿಲ್ಲಾಂಗ್ ಮೂಲದ ಥಿಂಕ್ ಟ್ಯಾಂಕ್ ಏಷ್ಯನ್ ಕನ್ಫ್ಲೂಯೆನ್ಸ್‌ನ ಸಹವರ್ತಿ ಮತ್ತು ಪೂರ್ವ ಏಷ್ಯಾದ ಸಮಸ್ಯೆಗಳ ವೀಕ್ಷಕ ಕೆ. ಯೋಹೋಮ್ ಅವರು ಈಟಿವಿ ಭಾರತದೊಂದಿಗೆ ಮಾತನಾಡಿ, ಇದು ಪೂರ್ವ ಏಷ್ಯಾ ಮತ್ತು ಇಟಲಿಯಂತಹ ಪಶ್ಚಿಮ ಯುರೋಪ್‌ನ ಅನೇಕ ದೇಶಗಳು ಎದುರಿಸುತ್ತಿರುವ ಸವಾಲು ಎಂದು ಹೇಳಿದರು. ಏನಾಗುತ್ತಿದೆ ಎಂದರೆ 50 ವರ್ಷಕ್ಕಿಂತ ಮೇಲ್ಪಟ್ಟವರು ಹೆಚ್ಚಾಗುತ್ತಿದ್ದರೆ, 35 ವರ್ಷಕ್ಕಿಂತ ಕೆಳಗಿನವರ ಸಂಖ್ಯೆ ಕಡಿಮೆಯಾಗುತ್ತಿದೆ. ಕಡಿಮೆ ಜನನ ದರದ ಸವಾಲನ್ನು ಎದುರಿಸುತ್ತಿರುವ ದೇಶಗಳು ಈಗ ವಿದೇಶಿ ಕಾರ್ಮಿಕ ಬಲವನ್ನು ಪಡೆಯಲು ನೀತಿ ಕ್ರಮಗಳನ್ನು ಆಶ್ರಯಿಸುತ್ತಿವೆ ಎಂದು ಹೇಳಿದರು.
ಅಂತಿಮವಾಗಿ, ದೇಶದ ಆರ್ಥಿಕತೆಯ ಬೆಳವಣಿಗೆಯನ್ನು ಕಾಪಾಡಿಕೊಳ್ಳಲು, ಅಂತರವನ್ನು ತುಂಬಲು ನಿಮಗೆ ಕಾರ್ಮಿಕ ಶಕ್ತಿಯ ಅಗತ್ಯವಿದೆ. ಪೂರ್ವ ಏಷ್ಯಾದ ಮತ್ತೊಂದು ದೇಶವಾದ ತೈವಾನ್ ಈ ವರ್ಷದ ಆರಂಭದಲ್ಲಿ ಆ ದೇಶದ ಆರ್ಥಿಕತೆಯ ವಿವಿಧ ಕ್ಷೇತ್ರಗಳಲ್ಲಿ ಸಹಾಯ ಮಾಡಲು ಭಾರತೀಯ ವಲಸೆ ಕಾರ್ಮಿಕರನ್ನು ನೇಮಿಸಿಕೊಳ್ಳುವ ಒಪ್ಪಂದಕ್ಕೆ ಸಹಿ ಹಾಕಿತ್ತು ಎಂಬುದು ಇಲ್ಲಿ ಗಮನಾರ್ಹ. ಆದರೆ, ಒಂದು ಕಳವಳವೆಂದರೆ ವಿದೇಶಿ ಕಾರ್ಮಿಕ ಬಲವು ಪ್ರಮುಖ ಸಾಮಾಜಿಕ ಮತ್ತು ಸಾಂಸ್ಕೃತಿಕ ಪರಿಣಾಮಗಳನ್ನು ಬೀರುತ್ತದೆ ಎಂದು ಯೋಹೋಮ್ ಹೇಳಿದರು.
ಮಗು ಪಡೆಯಲು ನಿರ್ಧರಿಸಿದ ಉದ್ಯೋಗಿಗಳಿಗೆ ಬೋನಸ್:ಕಡಿಮೆ ಜನನ ಪ್ರಮಾಣವನ್ನು ಎದುರಿಸುತ್ತಿರುವ ದೇಶಗಳು ದಂಪತಿಗಳಿಗೆ ಪ್ರೋತ್ಸಾಹ ನೀಡುವ ಮೂಲಕ ಮಕ್ಕಳನ್ನು ಹೊಂದಲು ಪ್ರೇರೇಪಿಸುತ್ತಿವೆ. ಕೆಲವು ದೇಶಗಳು ಗಂಡಂದಿರಿಗೂ ಹೆರಿಗೆ ರಜೆ ನೀಡುತ್ತಿವೆ. ಇದಕ್ಕೆ ಅನುಗುಣವಾಗಿ, ದಕ್ಷಿಣ ಕೊರಿಯಾದ ಸರ್ಕಾರವಲ್ಲದೆ, ಆ ದೇಶದ ಖಾಸಗಿ ವಲಯವೂ ಉದ್ಯೋಗಿಗಳಿಗೆ ಮಕ್ಕಳನ್ನು ಹೊಂದಲು ಪ್ರೋತ್ಸಾಹಿಸುತ್ತಿದೆ. ಅಂತಹ ಒಂದು ಉದಾಹರಣೆಯೆಂದರೆ ದಕ್ಷಿಣ ಕೊರಿಯಾದ ನಿರ್ಮಾಣ ಸಂಸ್ಥೆ ಬೂಯುಂಗ್ ಗ್ರೂಪ್. ಈ ತಿಂಗಳ ಆರಂಭದಲ್ಲಿ ಬೂಯುಂಗ್ ಸಿಇಒ ಲೀ ಜೊಂಗ್-ಕ್ಯುನ್ ಅವರು, ಮಗು ಪಡೆಯಲು ನಿರ್ಧರಿಸಿದ ಉದ್ಯೋಗಿಗಳಿಗೆ ಸುಮಾರು 76,000 ಡಾಲರ್ ಬೋನಸ್ ಅನ್ನು ನೀಡಲು ಘೋಷಣೆ ಮಾಡಿದ್ದಾರೆ.
ಕಡಿಮೆ ಜನನ ದರದ ಪ್ರಸ್ತುತ ಪರಿಸ್ಥಿತಿ ಮುಂದುವರಿದರೆ, ನಾವು ಉದ್ಯೋಗಿಗಳ ಕುಸಿತ ಮತ್ತು ರಾಷ್ಟ್ರೀಯ ಭದ್ರತೆಗೆ ಅಗತ್ಯವಾದ ರಕ್ಷಣಾ ಮಾನವಶಕ್ತಿಯ ಕೊರತೆಯಂತಹ ರಾಷ್ಟ್ರೀಯ ಅಸ್ತಿತ್ವವಾದದ ಬಿಕ್ಕಟ್ಟನ್ನು ಎದುರಿಸಬೇಕಾಗುತ್ತದೆ ಎಂದು ಯುನಿಲಾಡ್ ಯುವ ಸುದ್ದಿ ವೆಬ್‌ಸೈಟ್ ಲೀ ಹೇಳಿದ್ದಾರೆ. ಕಡಿಮೆ ಜನನ ಪ್ರಮಾಣವು ಆರ್ಥಿಕ ಹೊರೆ ಮತ್ತು ಕೆಲಸ ಮತ್ತು ಕುಟುಂಬ ಜೀವನವನ್ನು ಸಮತೋಲನಗೊಳಿಸುವಲ್ಲಿನ ತೊಂದರೆಗಳ ಪರಿಣಾಮವಾಗಿದೆ. ಅದಕ್ಕಾಗಿಯೇ ನಾವು ಅಂತಹ ಕಠಿಣ ಹೆಜ್ಜೆಯನ್ನು ತೆಗೆದುಕೊಳ್ಳಲು ನಿರ್ಧರಿಸಿದ್ದೇವೆ ಎಂದಿದ್ದಾರೆ.
ಶುಕ್ರವಾರ ಸಿಯೋಲ್‌ನಲ್ಲಿ ನಡೆದ ಹೈಸ್ಪೀಡ್ ರೈಲು ಸಂಪರ್ಕ ಉದ್ಘಾಟನೆ ಕುರಿತು ಪ್ರತಿಕ್ರಿಯಿಸಿ ಯೊಹೋಮ್, ''ಕಡಿಮೆ ಜನನ ದರಗಳ ಸವಾಲನ್ನು ಎದುರಿಸುತ್ತಿರುವ ದೇಶಗಳಿಗೆ ನವೀನ ನೀತಿಗಳನ್ನು ರಚಿಸುವುದನ್ನು ಬಿಟ್ಟು ಬೇರೆ ಆಯ್ಕೆಗಳಿಲ್ಲ. ಜನನ ಪ್ರಮಾಣವನ್ನು ಹೆಚ್ಚಿಸಲು ಮೂಲಸೌಕರ್ಯಗಳನ್ನು ನಿರ್ಮಿಸಲು ಕೊರಿಯಾ ಸರ್ಕಾರದ ಇಂದಿನ ಉಪಕ್ರಮವು ಬಹುಶಃ ಇದೇ ಮೊದಲನೆಯದು. ಇತರ ಅಭಿವೃದ್ಧಿ ಹೊಂದಿದ ದೇಶಗಳು ಸಹ ಇದನ್ನು ಅನುಕರಿಸಬಹುದು'' ಎಂದು ಹೇಳಿದರು.
ಜನನ ದರದಲ್ಲಿನ ಕುಸಿತ ತಡೆಯಲು ಸಲಹೆ:ಏತನ್ಮಧ್ಯೆ, ಹರ್ಮಿಟ್ ಕಿಂಗ್ಡಮ್ ಉತ್ತರ ಕೊರಿಯಾ ಕೂಡ ಅದೇ ಸಮಸ್ಯೆಯನ್ನು ಎದುರಿಸುತ್ತಿದೆ. ಕಳೆದ ವರ್ಷ ಡಿಸೆಂಬರ್‌ನಲ್ಲಿ, ಉತ್ತರ ಕೊರಿಯಾದ ನಾಯಕ ಕಿಮ್ ಜಾಂಗ್-ಉನ್ ತನ್ನ ದೇಶದ ಮಹಿಳೆಯರನ್ನು ಹೆಚ್ಚು ಮಕ್ಕಳನ್ನು ಹೊಂದಲು ಮತ್ತು ಅವರನ್ನು ಸರ್ವಾಧಿಕಾರಿ ರಾಜ್ಯವನ್ನು ಪ್ರೀತಿಸುವಂತೆ ಸಲಹೆ ನೀಡಿದ್ದರು.
ರಾಷ್ಟ್ರೀಯ ತಾಯಂದಿರ ಸಭೆಯನ್ನು ಉದ್ದೇಶಿಸಿ ಮಾತನಾಡಿದ್ದ ಉತ್ತರ ಕೊರಿಯಾದ ಸರ್ವಾಧಿಕಾರಿ, ಜನನ ದರದಲ್ಲಿನ ಕುಸಿತವನ್ನು ನಿಲ್ಲಿಸುವುದು ಮತ್ತು ಮಕ್ಕಳನ್ನು ಚೆನ್ನಾಗಿ ನೋಡಿಕೊಳ್ಳುವುದು ನಮ್ಮ ಮನೆಗೆಲಸದ ಕರ್ತವ್ಯಗಳಾಗಿವೆ. ಅದು ತಾಯಂದಿರೊಂದಿಗೆ ಕೆಲಸ ಮಾಡುವಾಗ ನಾವು ನಿರ್ವಹಿಸಬೇಕಾಗಿದೆ. ದಕ್ಷಿಣ ಕೊರಿಯಾದ 0.72 ಕ್ಕಿಂತ ಉತ್ತರ ಕೊರಿಯಾದಲ್ಲಿ ಮಹಿಳೆಯ ಜೀವಿತಾವಧಿಯಲ್ಲಿ ಜನಿಸಿದ ಮಕ್ಕಳ ಸರಾಸರಿ ಸಂಖ್ಯೆ 1.79ರಷ್ಟು ಹೊಂದಿದೆ.
ಇದನ್ನೂ ಓದಿ:ಪರಿಸರ ನಾಶ ಮತ್ತು ಹೆಚ್ಚುತ್ತಿರುವ ನೈಸರ್ಗಿಕ ವಿಕೋಪಗಳು: ಒಂದು ವಿಶ್ಲೇಷಣೆ - Chipko movement
