ಏಕಕಾಲದಲ್ಲಿ ಕನ್ನಡ, ಇಂಗ್ಲಿಷ್​ನಲ್ಲಿ ಚಿತ್ರೀಕರಣಗೊಳ್ಳುತ್ತಿದೆ 'ಟಾಕ್ಸಿಕ್' ​: ಪ್ರಪಂಚದಾದ್ಯಂತದ ಪ್ರೇಕ್ಷಕರನ್ನು ತಲುಪುವ ಗುರಿ

ಬಹುನಿರೀಕ್ಷಿತ ಟಾಕ್ಸಿಕ್​​ ಚಿತ್ರ ಕನ್ನಡ ಮತ್ತು ಇಂಗ್ಲಿಷ್​ನಲ್ಲಿ ಏಕಕಾಲದಲ್ಲಿ ಚಿತ್ರೀಕರಣಗೊಳ್ಳುತ್ತಿದ್ದು, ಹಿಂದಿ, ತೆಲುಗು, ಮಲಯಾಳಂ ಮತ್ತು ತಮಿಳು ಭಾಷೆಗಳಲ್ಲೂ ಬಿಡುಗಡೆಯಾಗಲಿದೆ.

'ಕೆಜಿಎಫ್'​ ಫ್ರ್ಯಾಂಚೈಸಿ ಮೂಲಕ ಗ್ಲೋಬಲ್​ ಸ್ಟಾರ್​ ಆಗಿ ಬೆಳೆದಿರುವ ಯಶ್​ ಅವರ ಮುಂದಿನ ಬಹುನಿರೀಕ್ಷಿತ ಚಿತ್ರ 'ಟಾಕ್ಸಿಕ್​​​' ಹೆಚ್ಚಿನ ಸಂಖ್ಯೆಯ ಪ್ರೇಕ್ಷಕರನ್ನು ತಲುಪುವ ಗುರಿಯನ್ನು ಹೊಂದಿರುವಂತೆ ತೋರುತ್ತಿದೆ. ಅಷ್ಟರ ಮಟ್ಟಿಗೆ ನಿರ್ಮಾಣಗೊಳ್ಳುತ್ತಿದೆ ಈ ಸಿನಿಮಾ. ಬಿಗ್​ ಬಜೆಟ್​​ ಪ್ರಾಜೆಕ್ಟ್​​​​​ ಕನ್ನಡ ಮತ್ತು ಇಂಗ್ಲಿಷ್​ ಎರಡರಲ್ಲೂ ಏಕಕಾಲದಲ್ಲಿ ಚಿತ್ರೀಕರಣಗೊಳ್ಳುತ್ತಿದ್ದು, ದೀರ್ಘಾವಧಿಯ ಶೂಟಿಂಗ್​ ವೇಳಾಪಟ್ಟಿಯನ್ನು ಹೊಂದಿದೆ ಎಂದು ತಿಳಿದುಬಂದಿದೆ.

ಮನರಂಜನಾ ಮಾಧ್ಯಮವೊಂದು ಈ ವಿಷಯವನ್ನು ಖಚಿತಪಡಿಸಿದೆ. ಹೌದು, ಭಾರತೀಯ ಹಾಗೂ ಗ್ಲೋಬಲ್​ ಆಡಿಯನ್ಸ್​​ಗೆ ಕನೆಕ್ಟ್​​ ಆಗುವ ರೀತಿ ಚಿತ್ರದ ನಿರೂಪಣೆಯನ್ನು ರಚಿಸಲಾಗಿದೆ ಎಂದು ಟಾಕ್ಸಿಕ್​​​ಗೆ ಆ್ಯಕ್ಷನ್​​ ಕಟ್​ ಹೇಳುತ್ತಿರುವ ಗೀತು ಮೋಹನ್​​ ದಾಸ್​​​ ತಿಳಿಸಿದ್ದಾರೆ. ಕೆಜಿಎಫ್​ ಮೂಲಕ ವಿಶ್ವದಾದ್ಯಂತ ಸಖತ್​ ಸದ್ದು ಮಾಡಿ ಜಾಗತಿಕ ಮಟ್ಟದಲ್ಲೂ ಅಭಿಮಾನಿಗಳನ್ನು ಸಂಪಾದಿಸಿರುವ ಯಶ್​​​ ಅವರ ಯಶಸ್ಸನ್ನು ದ್ವಿಗುಣಗೊಳಿಸುವ ಗುರಿ ಹೊಂದಿರುವ ಸಿನಿಮಾ ಇದಾಗಿರುವುದರಿಂದ ಹೆಚ್ಚಿನ ಸಂಖ್ಯೆಯ ಪ್ರೇಕ್ಷಕರನ್ನು ತಲುಪೋದು ಚಿತ್ರತಂಡದ ಪ್ರಮುಖ ಧ್ಯೇಯವಾಗಿದೆ. ಮನರಂಜನೆ ಒದಗಿಸುವುದು ಮಾತ್ರವಲ್ಲದೇ ಪ್ರಪಂಚದಾದ್ಯಂತ ಪ್ರೇಕ್ಷಕರ ಹೃದಯದೊಂದಿಗೆ ಸಂಪರ್ಕ ಸಾಧಿಸುವ ಕಥೆಯನ್ನು ರಚಿಸುತ್ತಿದ್ದೇವೆ ಎಂದು ಸಹ ನಿರ್ದೇಶಕರು ತಿಳಿಸಿದ್ದಾರೆ.

ಮಾನ್ಸ್ಟರ್​​ ಮೈಂಡ್​ ಕ್ರಿಯೇಷನ್ಸ್​​​ ಅಡಿ ರಾಕಿಂಗ್​ ಸ್ಟಾರ್​ ಹಾಗೂ ವೆಂಕಟ್​ ಕೆ ನಾರಾಯಣ್​​ ಅವರ ಕೆವಿಎನ್​​ ಪ್ರೊಡಕ್ಷನ್ಸ್​​​​ ಬಂಡವಾಳ ಹೂಡುತ್ತಿರುವ ಈ ಚಿತ್ರ ಕನ್ನಡ, ಇಂಗ್ಲಿಷ್​ನಲ್ಲಿ ಚಿತ್ರೀಕರಣಗೊಳ್ಳುತ್ತಿದ್ದು, ಹಿಂದಿ, ತೆಲುಗು, ಮಲಯಾಳಂ ಮತ್ತು ತಮಿಳು ಭಾಷೆಗಳಲ್ಲಿ ಡಬ್ ಮಾಡಿ ಬಿಡುಗಡೆ ಮಾಡಲಿದೆ ಚಿತ್ರತಂಡ. ಚಿತ್ರ ಬಿಗ್​ ಬಜೆಟ್​ನಲ್ಲಿ ನಿರ್ಮಾಣಗೊಳ್ಳುತ್ತಿದೆ ಎಂದು ವರದಿಯಾಗಿದೆ.

ಭಾರತದ ಖ್ಯಾತ ಸಿನಿಮಾ ವಿಮರ್ಷಕ ತರಣ್ ಆದರ್ಶ್ ಪೋಸ್ಟ್​ ಶೇರ್ ಮಾಡಿ, "ಇದು ಅಧಿಕೃತ. ಯಶ್ ಅವರ ಮುಂದಿನ ಚಿತ್ರ 'ಟಾಕ್ಸಿಕ್' ಕನ್ನಡ ಮತ್ತು ಇಂಗ್ಲಿಷ್‌ನಲ್ಲಿ ಚಿತ್ರೀಕರಣಗೊಳ್ಳುತ್ತಿದೆ. ಯಶ್ ಮುಖ್ಯಭೂಮಿಕೆಯ 'ಟಾಕ್ಸಿಕ್: ಎ ಫೇರಿ ಟೇಲ್ ಫಾರ್ ಗ್ರೋನ್ ಅಪ್ಸ್' ಇಂಗ್ಲಿಷ್ ಮತ್ತು ಕನ್ನಡ ಎರಡರಲ್ಲೂ ಏಕಕಾಲದಲ್ಲಿ ಪರಿಕಲ್ಪನೆ, ಬರವಣಿಗೆ ಮತ್ತು ಚಿತ್ರೀಕರಣಗೊಂಡ ಮೊದಲ ಭಾರತೀಯ ಚಲನಚಿತ್ರವಾಗಿದ್ದು, ಜಾಗತಿಕ ಮಟ್ಟದಲ್ಲಿ ಒಂದೊಳ್ಳೆ ಸಿನಿ ಅನುಭವಕ್ಕೆ ದಾರಿ ಮಾಡಿಕೊಡಲಿದೆ. ಈ ಚಿತ್ರವನ್ನು ಹಿಂದಿ, ತೆಲುಗು, ತಮಿಳು ಮತ್ತು ಮಲಯಾಳಂ ಸೇರಿದಂತೆ ಭಾರತೀಯ ಮತ್ತು ಅಂತಾರಾಷ್ಟ್ರೀಯ ಭಾಷೆಗಳಲ್ಲಿ ಡಬ್ ಮಾಡಲಾಗುವುದು. ಗೀತು ಮೋಹನ್‌ ದಾಸ್ ನಿರ್ದೇಶನದ ಸಿನಿಮಾವನ್ನು ವೆಂಕಟ್ ಕೆ ನಾರಾಯಣ್​ ಮತ್ತು ಯಶ್ ಜಂಟಿಯಾಗಿ ನಿರ್ಮಿಸುತ್ತಿದ್ದಾರೆ" ಎಂದು ಬರೆದುಕೊಂಡಿದ್ದಾರೆ.

ಇದನ್ನೂ ಓದಿ:Ind vs Pak: ಸ್ಟೇಡಿಯಂನಲ್ಲಿ ಊರ್ವಶಿ ರೌಟೇಲಾ ಬರ್ತ್​​ಡೇ ಸೆಲೆಬ್ರೇಷನ್​​; ನಟಿಯೊಂದಿಗೆ 'ಪುಷ್ಪ' ಡೈರೆಕ್ಟರ್​

ಕಳೆದ ತಿಂಗಳು ರಾಕಿಂಗ್​ ಸ್ಟಾರ್​ನ 39ನೇ ಹುಟ್ಟುಹಬ್ಬದ ಸಂದರ್ಭ 'ಟಾಕ್ಸಿಕ್: ಎ ಫೇರಿ ಟೇಲ್ ಫಾರ್ ಗ್ರೋನ್ ಅಪ್ಸ್‌'ನ ನಿರ್ಮಾಪಕರು ಗ್ಲಿಂಪ್ಸ್​ ಒಂದನ್ನು ಅನಾವರಣಗೊಳಿಸಿದ್ದರು. ಈ ವಿಡಿಯೋ ನಾಯಕ ನಟನ ಒಂದು ನೋಟವನ್ನು ಅಭಿಮಾನಿಗಳಿಗೆ ಒದಗಿಸಿತ್ತು. ಒಂದೇ ಒಂದು ಡೈಲಾಗ್​ ಇರದ ಈ ವಿಡಿಯೋ ಅದ್ಭುತ ಹಿನ್ನೆಲೆ ಸಂಗೀತ ಹೊಂದಿದ್ದು, ಕೆಜಿಎಫ್​ ಸ್ಟಾರ್​​ನ ಟಾಕ್ಸಿಕ್​ ಅವತಾರ ಫ್ಯಾನ್ಸ್​ ಅನ್ನು ಹುಚ್ಚೆದ್ದು ಕುಣಿಯುವಂತೆ ಮಾಡಿತ್ತು.

ಇದನ್ನೂ ಓದಿ:ಛಾವಾ: 10 ದಿನಗಳಲ್ಲಿ 326 ಕೋಟಿ ಕಲೆಕ್ಷನ್​ ಮಾಡಿದ ಸಂಭಾಜಿ ಮಹಾರಾಜರ ಜೀವನಾಧಾರಿತ ಚಿತ್ರ

2025ರ ಬಹುನಿರೀಕ್ಷಿತ 'ಟಾಕ್ಸಿಕ್​​' ಚಂದನವನದ ಬಹುಬೇಡಿಕೆ ತಾರೆ ನಟಿಸುತ್ತಿರುವ 19ನೇ ಚಿತ್ರ. ಕೆಜಿಎಫ್ 2 ಎಂಬ ಬ್ಲಾಕ್​ಬಸ್ಟರ್ ಚಿತ್ರ 2022ರಲ್ಲಿ ತೆರೆಕಂಡಿತ್ತು. ಬಹಳ ಗ್ಯಾಪ್​ ತೆಗೆದುಕೊಂಡಿದ್ದಾರೆ ಅನ್ನೋ ಅಭಿಪ್ರಾಯಗಳು ವ್ಯಕ್ತವಾದ್ರೂ ಯಶ್ ಸಿನಿಪ್ರಿಯರಿಗೆ ಭರ್ಜರಿ ಸಿನಿಮೀಯ ಅನುಭವ ಒದಗಿಸುವ ಪಣ ತೊಟ್ಟಿದ್ದಾರೆ. "ಟಾಕ್ಸಿಕ್​​: ಎ ಫೇರಿ ಟೇಲ್ ಫಾರ್ ಗ್ರೋನ್ ಅಪ್ಸ್" ಏಪ್ರಿಲ್ 10ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ ಎಂದು ನಿರ್ಮಾಪಕರು ಈ ಹಿಂದೆ ತಿಳಿಸಿದರಾದರೂ ಬಿಡುಗಡೆಗೆ ಸಮಯ ಹಿಡಿಯಬಹುದು ಎಂದು ತೋರುತ್ತಿದೆ.