ನಗುಮೊಗದ ಒಡೆಯ ಪುನೀತ್ ರಾಜ್ಕುಮಾರ್ ನಮ್ಮೆಲ್ಲರನ್ನಗಲಿ ಎರಡೂವರೆ ವರ್ಷಗಳು ಉರುಳಿವೆ. ಆದರೆ ಅವರ ನೆನಪು ಕನ್ನಡಿಗರೆದೆಯಲ್ಲಿ ಸದಾ ಜೀವಂತ. ಇಂದಿಗೂ ಕರುನಾಡಿನ ಪರಮಾತ್ಮನ ಸ್ಮರಣೆ ಮುಂದುವರಿದಿದೆ. ಅಪ್ಪು ಹೆಸರಿನಲ್ಲಿ ಮಾನವೀಯ ಕಾರ್ಯಗಳು ನಡೆಯುತ್ತಲೇ ಇದೆ. ಇದೀಗ ಟಿವಿ ಶೋ ಒಂದರಲ್ಲಿ ಅಪ್ಪು ಆಗಮನವಾಗಿದೆ. ಹೌದು, ಥೇಟ್ ಪುನೀತ್ ರಾಜ್ಕುಮಾರ್ ಅವರಂತೆ ಕಾಣುವ ವ್ಯಕ್ತಿಯ ಎಂಟ್ರಿಯಾಗುತ್ತಿದ್ದಂತೆ ವೇದಿಕೆ ಬಳಿ ಇದ್ದವರ ಕಣ್ಣು ತುಂಬಿ ಬಂದಿದೆ. ಈ ವಿಡಿಯೋ ಹೊರಬೀಳುತ್ತಿದ್ದಂತೆ ಇಡೀ ಕರುನಾಡಿನ ಮನ ಕರಗಿದೆ.
ಜನಪ್ರಿಯ ಕಿರುತೆರೆ ಕಾರ್ಯಕ್ರಮ ಕಾಮಿಡಿ ಕಿಲಾಡಿಗಳು ಪ್ರೀಮಿಯರ್ ಲೀಗ್ ಶೋನ ಸಣ್ಣ ಪ್ರೋಮೋ ಒಂದನ್ನು ನಿರೂಪಕಿ ಅನುಶ್ರೀ ಹಂಚಿಕೊಂಡಿದ್ದಾರೆ. ವಾರಾಂತ್ಯದ ರಾತ್ರಿ ಪ್ರಸಾರ ಆಗುವ ಈ ಫೇಮಸ್ ಶೋನಲ್ಲಿ ಕನ್ನಡ ಚಿತ್ರರಂಗ ಕಂಡ ಶ್ರೇಷ್ಠ ನಟ ಪುನೀತ್ ರಾಜ್ಕುಮಾರ್ ಅವರ ಸ್ಮರಣೆಯಾಗಿದೆ.
ತಂಡವೊಂದು ನಟನೆ ಮಾಡಲು ಶುರು ಮಾಡುತ್ತದೆ. ಟೈಮ್ ಮಷಿನ್ ಕಾನ್ಸೆಪ್ಟ್ ಮೂಲಕ, ಏ ಬುಜ್ಜಿ 2021ಕ್ಕೆ ಹೋಗು ಅಂತಾ ಹೇಳಿದ್ದಾರೆ. ಕಾಲಚಕ್ರ ಹಿಂದಕ್ಕೆ ಹೋಗಿ ಪುನೀತ್ ರಾಜ್ಕುಮಾರ್ ಅವರಂತೆ ಕಾಣುವ ವ್ಯಕ್ತಿಯ ಎಂಟ್ರಿಯಾಗುತ್ತಿದ್ದಂತೆ ತೀರ್ಪುಗಾರರು ಅಚ್ಚರಿಗೊಂಡಿದ್ದಾರೆ. ಅದರಲ್ಲೂ ನಿರೂಪಕಿ ಅನುಶ್ರೀ ಅವರಿಗೆ ಒಮ್ಮೆಲೆ ಶಾಕ್ ಆದಂತೆ ಆಗಿದೆ. ಕತ್ತಲ ಬಳಿಕ, ಬೆಳದಿಂಗಳ ನಡುವೆ ಬಂದ ವ್ಯಕ್ತಿಯನ್ನು ಕಂಡ ಎಲ್ಲರೂ ಏನಾಗ್ತಿದೆ ಎಂದು ಕಣ್ಣು ಮಿಟುಕಿಸದೇ ನೋಡಿದ್ದಾರೆ.
ಇದನ್ನೂ ಓದಿ:ಟಿ.ಎಸ್ ನಾಗಾಭರಣರ ಪತ್ನಿ ನಿರ್ದೇಶನದ ಚೊಚ್ಚಲ ಚಿತ್ರ 'ಜೀನಿಯಸ್ ಮುತ್ತ'ನಿಗೆ ಚಿನ್ನಾರಿಮುತ್ತ ಸಾಥ್ - Genius Mutta
ಹೌದು, ಥೇಟ್ ಪುನೀತ್ ರಾಜ್ಕುಮಾರ್ ಅವರಂತೇ ಕಾಣುವ ವ್ಯಕ್ತಿಯೋರ್ವರು ಸೂಟು ಬೂಟು, ಗ್ಲಾಸ್ ಧರಿಸಿ ಸಖತ್ ಸ್ಟೈಲಿಶ್ ಆಗಿ ವೇದಿಕೆಗೆ ಎಂಟ್ರಿ ಕೊಡ್ತಾರೆ. ಈ ವೇಳೆ ನಿನ್ನ ಕಂಗಳ ಬಿಸಿಯ ಹನಿಗಳು ನೂರು ಕಥೆಯ ಹೇಳಿವೆ ಎಂಬ ಹಾಡು ಪ್ಲೇ ಆಗಿದೆ. ತರುಣ್ ಸುಧೀರ್ ಸೇರಿದಂತೆ ವೇದಿಕೆಯಲ್ಲಿದ್ದ ತಿರ್ಪುಗಾರರು, ನಿರೂಪಕಿ ಸೇರಿ ತಂಡ ಎದ್ದು ನಿಂತು ನಮನ ಸಲ್ಲಿಸಿದ್ದಾರೆ. ಅನುಶ್ರೀ ಅವರಿಗೆ ಕಣ್ಣೀರು ತಡೆಯಲಾಗಿಲ್ಲ. ಉಳಿದವರ ಕಣ್ಣಾಲಿಗಳೂ ತೇವವಾಗಿದೆ. ಒಟ್ಟಾರೆ ಕಾಮಿಡಿ ಶೋಗೆ ಬಂದ ಎಲ್ಲರೂ ಕಣ್ಣೀರಿಟ್ಟು ಭಾವುಕರಾಗಿದ್ದಾರೆ. ನಂತರ ಆ ವ್ಯಕ್ತಿ ಥೇಟ್ ಅಪ್ಪುವಿನಂತೆಯೇ ಮಾತನಾಡಿ ಎಲ್ಲರನ್ನೂ ನಿಬ್ಬೆರಗಾಗಿಸಿದ್ದಾರೆ. ಅಪ್ಪು ಶೈಲಿಯಲ್ಲೇ ಅದ್ಭುತ ನಡೆ ನುಡಿ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ.
ಇದನ್ನೂ ಓದಿ:ಜು.29ಕ್ಕೆ 'ಕೆಡಿ' ಸಿನಿಮಾದಿಂದ ಸಿಗಲಿದೆ ಬಿಗ್ ಅಪ್ಡೇಟ್: ಧ್ರುವ ಅರ್ಜಾ ಅಭಿಮಾನಿಗಳಲ್ಲಿ ಕಾತರ - KD Movie
ತಮ್ಮ ಅಧಿಕೃತ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಈ ಪ್ರೋಮೋ ಹಂಚಿಕೊಂಡ ನಿರೂಪಕಿ ಅನುಶ್ರೀ ''ಇಂಥದ್ದೊಂದು ದಿನ ಅಭಿಮಾನಿಗಳ ಜೀವನದಲ್ಲಿ ಒಮ್ಮೆ ಬರಬಾರದೇ ?. ನಮ್ಮ ಅಪ್ಪು ಅಪ್ಪುಗೆ ನಮಗೆ ಸಿಗಬಾರದೇ! ಇದು ವಾಸ್ತವ ಅಲ್ಲ, ಆದರೆ ಈ ಮಿಥ್ಯ ಯಾಕಾಗಬಾರದು ಸತ್ಯ! ಇನ್ನೂ ಕಣ್ಣಿಗೆ ಕಟ್ಟಿದ ಹಾಗಿದೆ ಈ ಸಂಚಿಕೆ. ಕೊಂಚ ಕಾಲ ಆದರೂ ಸರಿ ನಮಗೆ ಇಂಥ ಒಂದು ಕ್ಷಣ ಕೊಟ್ಟ ಝೀ ಕನ್ನಡ ಮತ್ತು ಕಾಮಿಡಿ ಕಿಲಾಡಿ ಪ್ರೀಮಿಯರ್ ಲೀಗ್ ತಂಡಕ್ಕೆ ಕೋಟಿ ಧನ್ಯವಾದಗಳು'' ಎಂದು ಬರೆದುಕೊಂಡಿದ್ದಾರೆ. ಜೊತೆಗೆ ಮಿಸ್ ಯೂ ಅಪ್ಪು ಸರ್, ಎಂದೆಂದಿಗೂ ಅಪ್ಪು ಫ್ಯಾನ್ ಎಂದು ಬರೆದುಕೊಂಡಿದ್ದಾರೆ.
