ಷೇರು ಮಾರುಕಟ್ಟೆ ಅಲ್ಪ ಏರಿಕೆ: ಸೆನ್ಸೆಕ್ಸ್​ 33 ಅಂಕ ಹೆಚ್ಚಳ, 24,823ಕ್ಕೇರಿದ ನಿಫ್ಟಿ - Stock Market

ಶುಕ್ರವಾರದ ವಹಿವಾಟಿನಲ್ಲಿ ಭಾರತೀಯ ಷೇರು ಮಾರುಕಟ್ಟೆ ಅಲ್ಪ ಏರಿಕೆಯಾಗಿದೆ.

ನವದೆಹಲಿ: ವಾರಾಂತ್ಯ ಶುಕ್ರವಾರದ ವಹಿವಾಟಿನಲ್ಲಿ ಭಾರತೀಯ ಷೇರು ಮಾರುಕಟ್ಟೆಗಳು ಅಲ್ಪ ಏರಿಕೆಯೊಂದಿಗೆ ಕೊನೆಗೊಂಡಿವೆ. ಬಿಎಸ್ಇ ಸೆನ್ಸೆಕ್ಸ್ 33.02 ಪಾಯಿಂಟ್ಸ್ ಅಥವಾ ಶೇಕಡಾ 0.04 ರಷ್ಟು ಏರಿಕೆ ಕಂಡು 81,086.21 ರಲ್ಲಿ ಕೊನೆಗೊಂಡರೆ, ವಿಶಾಲ ನಿಫ್ಟಿ50 11.65 ಪಾಯಿಂಟ್ಸ್ ಅಥವಾ ಶೇಕಡಾ 0.05 ರಷ್ಟು ಏರಿಕೆ ಕಂಡು 24,823.15 ರಲ್ಲಿ ಕೊನೆಗೊಂಡಿದೆ.

ಬಿಎಸ್​ಇ ಸೆನ್ಸೆಕ್ಸ್​ನಲ್ಲಿ ಟಾಟಾ ಮೋಟಾರ್ಸ್, ಸನ್ ಫಾರ್ಮಾ, ಭಾರ್ತಿ ಏರ್ ಟೆಲ್, ಬಜಾಜ್ ಫಿನ್ ಸರ್ವ್ ಮತ್ತು ಐಸಿಐಸಿಐ ಬ್ಯಾಂಕ್ ಹೆಚ್ಚು ಲಾಭ ಗಳಿಸಿದರೆ, ಟೆಕ್ ಮಹೀಂದ್ರಾ, ಎಚ್​ಸಿಎಲ್ ಟೆಕ್, ಏಷ್ಯನ್ ಪೇಂಟ್ಸ್, ಟೈಟನ್ ಮತ್ತು ಇನ್ಫೋಸಿಸ್ ನಷ್ಟಕ್ಕೀಡಾದವು. ಬಿಎಸ್ಇ ಸೆನ್ಸೆಕ್ಸ್​ನ 30 ಷೇರುಗಳ ಪೈಕಿ 13 ಇಳಿಕೆಯಲ್ಲಿ ಕೊನೆಗೊಂಡವು.

ಹಾಗೆಯೇ, ವಿಶಾಲ ನಿಫ್ಟಿ 50 ಯಲ್ಲಿ ಬಜಾಜ್ ಆಟೋ, ಕೋಲ್ ಇಂಡಿಯಾ, ಭಾರ್ತಿ ಏರ್ ಟೆಲ್, ಟಾಟಾ ಮೋಟಾರ್ಸ್ ಮತ್ತು ಸನ್ ಫಾರ್ಮಾ ಹೆಚ್ಚು ಲಾಭ ಗಳಿಸಿದರೆ, ಎಲ್​ಟಿಐ, ವಿಪ್ರೋ, ಒಎನ್​ಜಿಸಿ, ಏಷ್ಯನ್ ಪೇಂಟ್ಸ್ ನಷ್ಟ ಅನುಭವಿಸಿದವು. ಆಟೋ ಮಾತ್ರ ವಲಯ ಲಾಭ ಗಳಿಸಿದ್ದು, ಶೇಕಡಾ 1.12 ರಷ್ಟು ಏರಿಕೆಯಾಗಿದೆ. ಇದಕ್ಕೆ ವ್ಯತಿರಿಕ್ತವಾಗಿ, ರಿಯಾಲ್ಟಿ ಸೂಚ್ಯಂಕವು ಶೇಕಡಾ 2.24 ರಷ್ಟು ಕುಸಿದರೆ, ಮಾಧ್ಯಮ ಮತ್ತು ಐಟಿ ಸೂಚ್ಯಂಕಗಳು ಶೇಕಡಾ 1 ರಷ್ಟು ಕುಸಿದವು.

ಎನ್ಎಸ್​ಡಿಎಲ್ ಅಂಕಿಅಂಶಗಳ ಪ್ರಕಾರ, ವಿದೇಶಿ ಹೂಡಿಕೆದಾರರು ಈ ತಿಂಗಳು ಆಗಸ್ಟ್ 22 ರವರೆಗೆ 16,305 ಕೋಟಿ ಮೌಲ್ಯದ ಭಾರತೀಯ ಷೇರುಗಳನ್ನು ಮಾರಾಟ ಮಾಡಿದ್ದಾರೆ. ವಿದೇಶಿ ಪೋರ್ಟ್​ಫೋಲಿಯೊ ಹೂಡಿಕೆದಾರರು ಈ ತಿಂಗಳು ಭಾರತೀಯ ಷೇರುಗಳನ್ನು ಮಾರಾಟ ಮಾಡುತ್ತಿದ್ದರೂ ಬಲವಾದ ರಿಟೇಲ್​​ ವಹಿವಾಟಿನಿಂದಾಗಿ ಭಾರತೀಯ ಷೇರು ಮಾರುಕಟ್ಟೆಯನ್ನು ಎತ್ತರಕ್ಕೇರಿಸಿದೆ.

ಡಾಲರ್​ ಎದುರು ರೂಪಾಯಿ 4 ಪೈಸೆ ಏರಿಕೆ: ಡಾಲರ್ ಎದುರು ರೂಪಾಯಿ ಶುಕ್ರವಾರ 4 ಪೈಸೆ ಏರಿಕೆ ಕಂಡು 83.89 ರಲ್ಲಿ (ತಾತ್ಕಾಲಿಕ) ವಹಿವಾಟು ನಡೆಸಿತು. ಇಂಟರ್ ಬ್ಯಾಂಕ್ ವಿದೇಶಿ ವಿನಿಮಯದಲ್ಲಿ, ರೂಪಾಯಿ 83.93 ರಲ್ಲಿ ಪ್ರಾರಂಭವಾಯಿತು ಮತ್ತು ದಿನದ ಗರಿಷ್ಠ 83.85 ಕ್ಕೆ ತಲುಪಿತ್ತು. ಅಂತಿಮವಾಗಿ ಡಾಲರ್ ಎದುರು ರೂಪಾಯಿ 83.89 ರಲ್ಲಿ (ತಾತ್ಕಾಲಿಕ) ಕೊನೆಗೊಂಡಿತು. ಇದು ಹಿಂದಿನ ಮುಕ್ತಾಯಕ್ಕಿಂತ ನಾಲ್ಕು ಪೈಸೆ ಹೆಚ್ಚಳವಾಗಿದೆ.

ಇದನ್ನೂ ಓದಿ : ಅನಿಲ್ ಅಂಬಾನಿ ಸೇರಿ 24 ಕಂಪನಿಗಳಿಗೆ ಷೇರು ಮಾರುಕಟ್ಟೆಯಿಂದ 5 ವರ್ಷ ನಿಷೇಧ - SEBI Bars Anil Ambani