ಕನ್ನಡ ಕಿರುತೆರೆಯ ಜನಪ್ರಿಯ ಕಾರ್ಯಕ್ರಮ 'ಬಿಗ್ ಬಾಸ್ ಸೀಸನ್ 11' ಆರನೇ ವಾರಾಂತ್ಯದಲ್ಲಿದೆ. ವೀಕೆಂಡ್ ಬಂತಂದ್ರೆ ಸುದೀಪ್ ಸಾರಥ್ಯದ ಸ್ಪೆಷಲ್ ಶೋಗಳನ್ನು ವೀಕ್ಷಿಸಲು ಅಪಾರ ಸಂಖ್ಯೆಯ ಅಭಿಮಾನಿಗಳು ಕಾತರರಾಗಿರುತ್ತಾರೆ. ಅದರಂತೆ ಇಂದು ವಾರದ ಕಥೆ ಕಿಚ್ಚನ ಜೊತೆ, ನಾಳೆ ವೀಕೆಂಡ್ ವಿತ್ ಸುದೀಪ ಕಾರ್ಯಕ್ರಮಗಳು ಪ್ರಸಾರ ಕಾಣಲಿದೆ. ಈ ಎರಡೂ ಸಂಚಿಕೆಗಳನ್ನು ವೀಕ್ಷಿಸಲು ಅಪಾರ ಸಂಖ್ಯೆಯ ಪ್ರೇಕ್ಷಕರು ಕಾತರರಾಗಿದ್ದಾರೆ.
'ಹನುಮಂತ ಮುಗ್ದಾನಾ?' ವಾರದ ಕತೆ ಕಿಚ್ಚನ ಜೊತೆ. ಇಂದು ರಾತ್ರಿ 9ಕ್ಕೆ ಎಂಬ ಕ್ಯಾಪ್ಷನ್ನೊಂದಿಗೆ ಬಿಗ್ ಬಾಸ್ ಇಂದಿನ ಪ್ರೋಮೋ ಅನಾವರಣಗೊಳಿಸಿದೆ. ಅದರಲ್ಲಿ, ಹನುಮಂತು ಅವರ ಮುಗ್ಧತೆ ಬಗ್ಗೆ ಪ್ರಶ್ನೆ ಎದ್ದಿದೆ. ಸಹ ಸ್ಪರ್ಧಿಗಳು ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ. ಹನುಮಂತು ಕೊಟ್ಟ ಜಾಣ್ಮೆಯ ಉತ್ತರ ನೋಡುಗರಿಗೆ ಹಿಡಿಸಿದಂತಿದೆ. ಆಶ್ಚರ್ಯ ಕೂಡಾ ಆಗಿದೆ.
ಕಿಚ್ಚ ಸುದೀಪ್ ಅವರು ಸುರೇಶ್ ಬಳಿ ಪ್ರಶ್ನೆ ಕೇಳಿದ್ದಾರೆ. ಯಾರೇ ನಾಮಿನೇಟ್ ಮಾಡಿದ್ರು ಜಗಳ ಆಡ್ತೀರಿ. ಹನುಮಂತು ಬಳಿ ಸುಮ್ಮನಿರುತ್ತೀರಿ, ಅದೇಗೆ ಸಾಧ್ಯ? ಎಂದು ಕೇಳಿದ್ದಾರೆ. ಅದಕ್ಕೆ ಪ್ರತಿಕ್ರಿಯಿಸಿದ ಸುರೆಶ್, ನನ್ನ ಸಮಯದಲ್ಲಿ ನಾನು ಹೇಳಿದ್ದೇನೆ, ನಿಮ್ಮ ಬಾರಿ ಬಂದಾಗ ನಿಮ್ಮ ಕಾರಣಗಳನ್ನು ಕೊಡಿ ಎಂದು ಹೇಳಿಬಿಡ್ತಾರೆ. ಹಾಗಾಗಿ ಹೆಚ್ಚೇನು ಮಾತನಾಡಲು ಸಾಧ್ಯ ಇಲ್ಲ ಎಂದು ತಿಳಿಸಿದ್ದಾರೆ.
ಇದನ್ನೂ ಓದಿ: ಯಶ್ 'ಟಾಕ್ಸಿಕ್'ಗಾಗಿ ಭಾರತಕ್ಕೆ ಬಂದ ಹಾಲಿವುಡ್ ಸ್ಟಂಟ್ ಮ್ಯಾನ್: ರಾಕಿಂಗ್ ಸ್ಟಾರ್ ಹಾಡಿ ಹೊಗಳಿದ ಜೆ.ಜೆ ಪೆರಿ
ನಂತರ, ಒಬ್ಬೊಬ್ಬರೇ ತಮ್ಮ ಅನಿಸಿಕೆಗಳನ್ನು ಕೊಡಲು ಶುರು ಮಾಡಿದ್ದಾರೆ. ಮೋಕ್ಷಿತಾ ಮಾತನಾಡಿ, ಇನೋಸೆಂಟ್ ಆಗಿ ಕಾಣಿಸ್ತಾರೆ ಅವರು ಆದ್ರೆ ಅವರು ಇನೋಸೆಂಟ್ ಅಲ್ಲಾ. ಅವರಿಗೆ ಮೈಂಡ್ ಗೇಮ್ ಹೇಗೆ ಆಡೋದು ಅನ್ನೋದು ಚೆನ್ನಾಗಿ ಗೊತ್ತಿದೆ ಎಂದು ತಿಳಿಸಿದ್ದಾರೆ. ತ್ರಿವಿಕ್ರಮ್ ಮಾತನಾಡಿ, ಅವರನ್ನು ನೋಡಿದ್ರೆ ಮುಗ್ಧ ಅನಿಸುತ್ತೆ. ಆದ್ರೆ ಅವರು ಬುದ್ಧಿವಂತ ಎಂದು ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ. ನಂತರ ಚೈತ್ರಾ ಮಾತನಾಡಿ, ಹೊರಗಡೆ ತೋರಿಕೊಳ್ಳುತ್ತಿರುವಷ್ಟು ಇನೋಸೆಂಟ್ ಅಲ್ಲಾ ಎಂದು ತಿಳಿಸಿದ್ದಾರೆ.
ಇದನ್ನೂ ಓದಿ: 12 ವರ್ಷಗಳಲ್ಲಿ 80 ಸಿನಿಮಾ: ಸ್ಯಾಂಡಲ್ವುಡ್ ಉನ್ನತಿಯ ಕನಸು ಕಂಡಿದ್ದ ಶಂಕರ್ ನಾಗ್ ಜನ್ಮದಿನ
ನಂತರ ಹನುಮಂತು ಮಾತನಾಡಿ, ಬಂದವರೆಲ್ಲರೂ ಇನೋಸೆಂಟ್ ಇದ್ದಾರೆ. ಏನು ಗೊತ್ತಿಲ್ಲದಂಗೆ ಎಲ್ಲರೂ ನಾಟಕ ಮಾಡ್ತಾರೆ. ಆದ್ರೆ ನನ್ನ ಹಿಡ್ಕೊಂಡಿದ್ದಾರಷ್ಟೇ ಈ ವಿಷಯಕ್ಕೆ ಎಂದು ಸಹಸ್ಪರ್ಧಿಗಳು ಹುಬ್ಬೇರಿಸುವಂತ ಉತ್ತರ ಕೊಟ್ಟಿದ್ದಾರೆ. ಸದ್ಯ ಸೋಷಿಯಲ್ ಮೀಡಿಯಾದಲ್ಲಿ ಪ್ರೋಮೋ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದ್ದು, ಪ್ರೇಕ್ಷಕರು ತಮ್ಮ ಅಭಿಪ್ರಾಯಗಳನ್ನು ವ್ಯಕ್ತಪಡಿಸುತ್ತಿದ್ದಾರೆ. ಜೊತೆಗೆ ಸಂಪೂರ್ಣ ಸಂಚಿಕೆ ವೀಕ್ಷಿಸುವ ಕಾತರದಲ್ಲಿದ್ದಾರೆ.
