ಕೊರ್ಬಾ, ಛತ್ತೀಸ್‌ಗಢ: ಇಲ್ಲಿನ ರೈಲ್ವೆ ವಿಭಾಗದಲ್ಲಿ ಮಹಿಳಾ ಸಹಾಯಕ ಲೋಕೋ ಪೈಲಟ್ ನೇಮಕಗೊಂಡಿದ್ದು, ಮಹಿಳೆಯರಿಗೆ ಮಾದರಿಯಾಗಿದ್ದಾರೆ. ಅವರ ಕಥೆ ಮಹಿಳೆಯರಿಗೆ ಸ್ವಾವಲಂಬಿಯಾಗಲು ಕಲಿಸುತ್ತದೆ. ಕೊರ್ಬಾ ರೈಲ್ವೆ ವಿಭಾಗದಲ್ಲಿ ರೀಮಾ ಶುಕ್ಲಾ ಅವರು 4 ವರ್ಷಗಳಿಂದ ಸಹಾಯಕ ಲೋಕೋ ಪೈಲಟ್ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಈಟಿವಿ ಭಾರತ ತಂಡವು ಅವರನ್ನು ಸಂದರ್ಶಿಸಿದೆ. ಈ ವೇಳೆ ಅವರು, ಮಹಿಳಾ ಲೋಕೋ ಪೈಲಟ್‌ಗಳು ಎದುರಿಸಬೇಕಾದ ಸವಾಲುಗಳು ಮತ್ತು ಸಮಸ್ಯೆಗಳನ್ನು ತಿಳಿಸಲು ಪ್ರಯತ್ನಿಸಿದರು.
"ಈ ಕಾರ್ಯ ಸ್ವಲ್ಪ ಕಷ್ಟ": ಸಹಾಯಕ ಲೋಕೋ ಪೈಲಟ್ ರೀಮಾ ಶುಕ್ಲಾ ಮಾತನಾಡಿ, "ಲೋಕೋ ಪೈಲಟ್‌ನ ಕೆಲಸವನ್ನು ಸಾಮಾನ್ಯವಾಗಿ ಪುರುಷ ಪ್ರಾಬಲ್ಯದ ಕೆಲಸ ಎಂದು ಪರಿಗಣಿಸಲಾಗುತ್ತದೆ. ಇದು ಖಂಡಿತವಾಗಿಯೂ ಸ್ವಲ್ಪ ಕಷ್ಟಕರವಾಗಿದೆ. ಒಬ್ಬರು ದಿನದ 12 ಗಂಟೆಗಳು ಕೆಲಸ ಮಾಡಬೇಕು. ಇದಾದ ನಂತರ ಮನೆಗೆ ಹೋದ ಮೇಲೂ ಅಡ್ಜಸ್ಟ್ ಮಾಡಿಕೊಳ್ಳಬೇಕು. ಆದರೆ, ಮಹಿಳೆಯರು ಯಾವುದೇ ಕ್ಷೇತ್ರದಲ್ಲಿ ಯಾರ ಹಿಂದೆಯೂ ಇಲ್ಲ. ನಿರಂತರವಾಗಿ ಸಬಲರಾಗುತ್ತಿದ್ದಾರೆ. ಈಗ ಯಾವ ಕೆಲಸವನ್ನೂ ಮಾಡುವುದರಲ್ಲಿ ಹಿಂದೆ ಬಿದ್ದಿಲ್ಲ. ಮಹಿಳೆಯರು ದೃಢಸಂಕಲ್ಪ ಇದ್ದರೆ ಎಂಥಾ ಕೆಲಸಗಳನ್ನಾದರೂ ಮಾಡಬಹುದು ಎಂದು ಹೇಳಿದರು.
ಕುಟುಂಬದಿಂದ ಬೆಂಬಲ: "ಈ ಕೆಲಸವು ಖಂಡಿತವಾಗಿಯೂ ಪುರುಷ ಪ್ರಾಬಲ್ಯ ಹೊಂದಿದೆ. ಆದರೆ, ಸಹೋದ್ಯೋಗಿಗಳು ನಮಗೆ ಬೆಂಬಲ ನೀಡಿದರೆ ಮತ್ತು ನಾವು ಸಂಪೂರ್ಣವಾಗಿ ವೃತ್ತಿಪರರಾಗಿ ಉಳಿದಿದ್ದರೆ ಹೆಚ್ಚಿನ ಸಮಸ್ಯೆ ಇಲ್ಲ. ಕುಟುಂಬ ಸದಸ್ಯರ ಬೆಂಬಲವಿದ್ದರೆ ಕೆಲಸ ಸುಲಭವಾಗುತ್ತದೆ. ನಮ್ಮ ಕೆಲಸವು ಸುಮಾರು 12 ಗಂಟೆಗಳವರೆಗೆ ಇರುತ್ತದೆ ಎಂದು ರೀಮಾ ಶುಕ್ಲಾ ಹೇಳುತ್ತಾರೆ.
‘ಮಗುವಿಗೆ ಹೆಚ್ಚು ಸಮಯ ಕೊಡಲಾಗಲಿಲ್ಲ’:ಕುಟುಂಬದ ಬಗ್ಗೆ ಮಾತನಾಡಿದ ರೀಮಾ, ಕುಟುಂಬದಲ್ಲಿ ಪುಟ್ಟ ಮಗಳೂ ಇದ್ದಾಳೆ. 12 ಗಂಟೆ ದುಡಿದು ಮನೆಗೆ ಮರಳಿದಾಗ ಮಗಳಿಗೂ ಕೂಡ ಸಮಯ ಕೊಡಬೇಕು. ಇದು ಮುಖ್ಯವಾಗುತ್ತದೆ. ಮಕ್ಕಳಿಗೆ 24 ಗಂಟೆಯೂ ಕಡಿಮೆ. ಮಕ್ಕಳು ನಮಗೆ ತುಂಬಾ ಹತ್ತಿರವಾಗಿದ್ದಾರೆ. ಅವರಿಗೆ ಕಡಿಮೆ ಸಮಯ ನೀಡಲು ಸಾಧ್ಯವಾಗುತ್ತಿಲ್ಲ ಎಂಬ ನೋವು ಖಂಡಿತವಾಗಿಯೂ ಮನಸ್ಸಿನಲ್ಲಿ ಕಾಡುತ್ತಿರುತ್ತದೆ. ಆದರೆ, ಅವರು ಅರ್ಥಮಾಡಿಕೊಳ್ಳುವ ದಿನ ಬರುತ್ತದೆ. ನನ್ನ ಕೆಲಸದ ಕಷ್ಟದಿಂದಾಗಿ, ಅವಳು ನನ್ನ ಜವಾಬ್ದಾರಿ ಅರ್ಥಮಾಡಿಕೊಳ್ಳುತ್ತಾಳೆ. ಆಗ ಆಕೆ ನನ್ನ ಬಗ್ಗೆ ಹೆಮ್ಮೆಪಡುತ್ತಾಳೆ. ಮಕ್ಕಳು ತಮ್ಮ ತಂದೆ-ತಾಯಿ ಕೆಲಸ ಮಾಡುವುದನ್ನು ನೋಡುವುದು ಮತ್ತು ಅವರ ಕೆಲಸದ ಬಗ್ಗೆ ಹೆಮ್ಮೆ ಪಡುವುದು ಬಹಳ ಮುಖ್ಯ ಎನ್ನುತ್ತಾರೆ ರೀಮಾ.
450ರಲ್ಲಿ 8 ಮಹಿಳಾ ಲೋಕೋ ಪೈಲಟ್‌ಗಳು:ಹಲವಾರು ಬಾರಿ ಗ್ರೀನ್ ಸಿಗ್ನಲ್ ಸಿಗದಿದ್ದಾಗ ಎಂಜಿನ್‌ನಲ್ಲಿ ಗಂಟೆಗಟ್ಟಲೆ ಕುಳಿತುಕೊಳ್ಳಬೇಕಾಗುತ್ತದೆ. ಶಾಖದ ಜೊತೆಗೆ ಹಲವಾರು ಅನಾನುಕೂಲತೆಗಳಿವೆ. ಆದರೆ, ಈಗ ವ್ಯವಸ್ಥೆಯು ಸಾಕಷ್ಟು ಬಂದಿದೆ. ಒಬ್ಬರು ಹೆಚ್ಚು ಕಾಯಬೇಕಾಗಿಲ್ಲ. ಹೆಚ್ಚಿನ ಲೋಕೋ ಪೈಲಟ್‌ಗಳು ಪುರುಷರು, ಆದರೆ ಅವರೆಲ್ಲರೂ ಸಹೋದ್ಯೋಗಿಗಳು ಮತ್ತು ಸಹಾಯ ಮಾಡುತ್ತಾರೆ. ಇದರಿಂದ ಕೆಲಸವೂ ಸುಲಭವಾಗುತ್ತದೆ. ಒಟ್ಟು 450 ಲೋಕೋ ಪೈಲಟ್‌ಗಳು ಕೊರ್ಬಾದಲ್ಲಿ ಕೆಲಸ ಮಾಡುತ್ತಾರೆ. ಅದರಲ್ಲಿ ಮಹಿಳೆಯರ ಸಂಖ್ಯೆ ಕೇವಲ 8 ರಿಂದ 10. ಆದರೆ ಎಲ್ಲರೂ ಅವರವರ ಕೆಲಸವನ್ನು ಚೆನ್ನಾಗಿ ಮಾಡುತ್ತಾರೆ. ನಮಗೆ ನಮ್ಮ ಕೆಲಸದ ಬಗ್ಗೆ ಹೆಮ್ಮೆ ಇದೆ. ಅದನ್ನು ಮಾಡುವುದು ತುಂಬಾ ಮಜವಾಗಿರುತ್ತದೆ ಮತ್ತು ಈ ಗಡಿಬಿಡಿಯಲ್ಲಿ ನಮ್ಮ ಜೀವನ ಸಾಗುತ್ತಿದೆ. ಇದರಲ್ಲಿ ನನಗೆ ಸಂತೋಷ ಇದೆ ಅಂತಾ ಸಹಾಯಕ ಲೋಕೋ ಪೈಲಟ್ ರೀಮಾ ಹೇಳುತ್ತಾರೆ.
ನಿತ್ಯ ಸರಾಸರಿ 50 ರೇಕ್ ಕಲ್ಲಿದ್ದಲು ಕೊರ್ಬಾದಿಂದ ದೇಶದ ಅನೇಕ ರಾಜ್ಯಗಳಿಗೆ ರವಾನೆಯಾಗುತ್ತದೆ ಎಂಬುದು ಗಮನಾರ್ಹ. ಇದರಿಂದ ಅಲ್ಲಿನ ವಿದ್ಯುತ್ ಸ್ಥಾವರಗಳು ನಿರಂತರವಾಗಿ ಕಾರ್ಯನಿರ್ವಹಿಸುತ್ತವೆ ಮತ್ತು ಜನರಿಗೆ ವಿದ್ಯುತ್ ಸಿಗುತ್ತದೆ. ಈ ಕಲ್ಲಿದ್ದಲು ಸರಕುಗಳನ್ನು ಸರಕು ರೈಲುಗಳ ಮೂಲಕ ತರಲಾಗುತ್ತದೆ. ಈ ಕಾರ್ಯದಲ್ಲಿ ಮಹಿಳೆಯರೂ ಪುರುಷರಿಗೆ ಹೆಗಲಿಗೆ ಹೆಗಲು ಕೊಟ್ಟು ಕಾರ್ಯ ನಿರ್ವಹಿಸುತ್ತಿದ್ದಾರೆ. ಕೊರ್ಬಾದಲ್ಲಿ ಮಹಿಳಾ ಲೋಕೋ ಪೈಲಟ್‌ಗಳ ಸಂಖ್ಯೆ ಕಡಿಮೆಯಾಗಿದೆ, ಆದರೆ, ಅವರ ಕೊಡುಗೆ ಪುರುಷರಿಗಿಂತ ಕಡಿಮೆಯಿಲ್ಲ ಎಂಬುದು ಗಮನಾರ್ಹ.
ಓದಿ:ಇನ್ನಷ್ಟು ಕೆಲಸ ಮಾಡಲು ದೊಡ್ಡ ವೇದಿಕೆ ಸಿಗುತ್ತಿರುವುದಕ್ಕೆ ಸಂತಸವಾಗ್ತಿದೆ: ಸುಧಾ ಮೂರ್ತಿ
