ನವದೆಹಲಿ: ರಾಷ್ಟ್ರೀಯ ಮಹಿಳಾ ಆಯೋಗವು (ಎನ್ಸಿಡಬ್ಲ್ಯೂ) ಕೌಟುಂಬಿಕ ಕಲಹ, ಕಿರುಕುಳ, ಅತ್ಯಾಚಾರ ಪ್ರಕರಣ ಸೇರಿ ವಿವಿಧ ಘಟನೆಗಳಿಗೆ ಸಂಬಂಧಿಸಿದಂತೆ ಈ ವರ್ಷ ಇದುವರೆಗೆ ಬರೋಬ್ಬರಿ 12,600 ಮಹಿಳಾ ದೂರುಗಳನ್ನು ಸ್ವೀಕರಿಸಿದೆ ಎಂದು ತಿಳಿಸಿದೆ. ಅದರಲ್ಲಿ ಉತ್ತರ ಪ್ರದೇಶದಿಂದಲೇ ಅತೀ ಹೆಚ್ಚು ದೂರುಗಳು ದಾಖಲಾಗಿರುವುದು ಆತಂಕಕ್ಕೀಡು ಮಾಡಿದೆ.
ಈ ಸಂಬಂಧ ಅಂಕಿ ಅಂಶ ಬಿಡುಗಡೆ ಮಾಡಿರುವ ಆಯೋಗವು, ಕಿರುಕುಳ ಘಟನೆಗೆ ಸಂಬಂಧಿಸಿದಂತೆ ಒಟ್ಟು 3,107 ದೂರುಗಳು ದಾಖಲಾಗಿವೆ. ಕೌಟುಂಬಿಕ ದೌರ್ಜನ್ಯ ವಿಚಾರಕ್ಕೆ ಸಂಬಂಧಿಸಿದಂತೆ 3,544 ದೂರುಗಳು, ವರದಕ್ಷಿಣೆ ಕಿರುಕುಳ 1,957, ಕಿರುಕುಳ 817, ಮಹಿಳಾ ದೂರುಗಳ ಬಗ್ಗೆ ಪೊಲೀಸರ ನಿರಾಸಕ್ತಿ 518, ಅತ್ಯಾಚಾರ ಮತ್ತು ಅತ್ಯಾಚಾರ ಯತ್ನಕ್ಕೆ ಸಂಬಂಧಿಸಿದಂತೆ ಒಟ್ಟು 657, ಲೈಂಗಿಕ ಕಿರುಕುಳ 493, ಸೈಬರ್ ಅಪರಾಧ 339, ಹಿಂಬಾಲಿಸಿದ ಪ್ರಕರಣ 345, ಮರ್ಯಾದಾ ಹತ್ಯೆ 206 ಪ್ರಕರಣಗಳು ದಾಖಲಾಗಿವೆ ಎಂದು ಆಯೋಗ ತಿಳಿಸಿದೆ.
ರಾಜ್ಯವಾರು ಅಂಕಿಅಂಶಗಳ ಪ್ರಕಾರ, ಉತ್ತರ ಪ್ರದೇಶದಲ್ಲಿ 6,470 ಅತೀ ಹೆಚ್ಚು ದೂರುಗಳು ದಾಖಲಾಗಿದ್ದರೇ, ದೆಹಲಿಯಲ್ಲಿ 1,113, ಮಹಾರಾಷ್ಟ್ರದಲ್ಲಿ 762, ಬಿಹಾರ 584, ಮಧ್ಯಪ್ರದೇಶ 514, ಹರಿಯಾಣ 506, ರಾಜಸ್ಥಾನ 408, ತಮಿಳುನಾಡು 301, ಪಶ್ಚಿಮ ಬಂಗಾಳ 306, ಕರ್ನಾಟಕದಿಂದ 305 ದೂರುಗಳು ದಾಖಲಾಗಿವೆ.