ಕಾಶಿದರ್ಶನ: ತಮಿಳುನಾಡು ಪ್ರವಾಸಿಗರಿಗೆ ವಂಚನೆ, ದುಬಾರಿ ವಸ್ತುಗಳೊಂದಿಗೆ ಗೈಡ್​ ಪರಾರಿ - Kashi Vishwanath Dham Tour

ವಾರಾಣಸಿಯಲ್ಲಿ ತಮಿಳುನಾಡು ಪ್ರವಾಸಿಗರಿಗೆ ಅಲ್ಲಿನ ಗೈಡವೊಬ್ಬರು ವಂಚಿಸಿರುವ ಆರೋಪ ಕೇಳಿ ಬಂದಿದೆ. ವಂಚನೆಗೆ ಒಳಗಾಗಿರುವುದನ್ನು ಅರಿತ ಪ್ರವಾಸಿ ತಂಡ ಜ್ಞಾನವ್ಯಾಪಿ ಕಂಟ್ರೋಲ್​ ರೂಮ್​ನಲ್ಲಿ ಈ ಸಂಬಂಧ ದೂರು ಸಲ್ಲಿಸಿದ್ದಾರೆ.

ವಾರಾಣಸಿ: ಕಾಶಿ ದೇಗುಲ ದರ್ಶನಕ್ಕೆ ತೆರಳಿದ್ದ ತಮಿಳುನಾಡಿನ 40 ಪ್ರವಾಸಿಗರ ತಂಡಕ್ಕೆ ವ್ಯಕ್ತಿಯೊಬ್ಬ ವಂಚಿಸಿದ್ದು, ಅವರ ಮೊಬೈಲ್​, ವಾಚ್​ ಸೇರಿದಂತೆ ದುಬಾರಿ ವಸ್ತುಗಳನ್ನು ಎತ್ತಿಕೊಂಡು ಪರಾರಿಯಾಗಿದ್ದಾನೆ. ದೂರದ ಊರಿನಲ್ಲಿ ವಂಚನೆಗೆ ಒಳಗಾದ ಜನರು ಇದೀಗ ಸಂಕಷ್ಟಕ್ಕೆ ಸಿಲುಕಿದ್ದು, ಈ ಸಂಬಂಧ ಪೊಲೀಸ್​ ಠಾಣೆಯಲ್ಲಿ ದೂರು ದಾಖಲಿಸಲಾಗಿದೆ.

ಏನಿದು ಪ್ರಕರಣ?: ತಮಿಳುನಾಡಿನಿಂದ ಕಾಶಿಯ ದರ್ಶನಕ್ಕೆ ತೆರಳಿದ ತಂಡಕ್ಕೆ ಮಾರ್ಗದರ್ಶನ ನೀಡುತ್ತೇನೆ ಎಂದು ವ್ಯಕ್ತಿಯೊಬ್ಬ ಪರಿಚಯಿಸಿಕೊಂಡಿದ್ದ. ಬುಧವಾರ ಕಾಶಿ ವಿಶ್ವನಾಥ ಮತ್ತು ಮಠ ವಿಶಾಲಕ್ಷ್ಮಿ ದೇಗುಲ ದರ್ಶನಕ್ಕೆ ಮಾರ್ಗದರ್ಶನ ಮಾಡಿಸಿ, ಪ್ರವೇಶಕ್ಕೆ ಸುಲಭ ಅವಕಾಶ ಕಲ್ಪಿಸಿಕೊಡುತ್ತೇನೆ ಎಂದು ನಂಬಿಸಿದ್ದಾನೆ. ಈತನ ಮಾತು ನಂಬಿದ ಅವರು, ಆತನ ಮಾರ್ಗದರ್ಶನ ಪಡೆದು, ವಿಶ್ವನಾಥ ದೇಗುಲ ದರ್ಶನ ಮಾಡಿದ್ದಾರೆ. ಬಳಿಕ ಲಹೋರಿ ತೊಲ ಮೂಲಕ ವಿಶಾಲಾಕ್ಷ್ಮಿ ದೇಗುಲ ದರ್ಶನಕ್ಕೆ ಕರೆದುಕೊಂಡು ಹೋಗಿದ್ದಾನೆ.

ಈ ವೇಳೆ ದೇಗುಲದ ಆವರಣ ತಲುಪುತ್ತಿದ್ದಂತೆ, ತಾನು ದರ್ಶನಕ್ಕೆ ಬರುವುದಿಲ್ಲ. ದೇವಸ್ಥಾನದ ಹೊರಗೆ ಇರುತ್ತೇನೆ ನೀವು ಹೋಗಿ ಬನ್ನಿ ಎಂದು ವ್ಯವಸ್ಥೆ ಕಲ್ಪಿಸಿಕೊಟ್ಟಿದ್ದಾನೆ. ದೇಗುಲದಲ್ಲಿ ಮೊಬೈಲ್​ ಸೇರಿದಂತೆ ಮೌಲ್ಯಯುತ ವಸ್ತುಗಳನ್ನು ಕೊಂಡೊಯ್ಯಲು ಅವಕಾಶವಿಲ್ಲ. ಈ ಹಿನ್ನೆಲೆಯಲ್ಲಿ ನನ್ನ ಬಳಿ ನೀಡಿ. ದರ್ಶನದ ಬಳಿಕ ವಾಪಸ್​ ಕೊಡುತ್ತೇನೆ ಎಂದು ನಂಬಿಸಿ, ಅವರಿಂದ ಎಲ್ಲ ವಸ್ತುಗಳನ್ನು ಪಡೆದು ಕೇಸರಿ ಬಣ್ಣದ ಟವೆಲ್​ನಲ್ಲಿ ಸುತ್ತಿಕೊಂಡಿದ್ದಾನೆ.

ಪ್ರವಾಸಿಗರು ಆತನ ಮಾತು ನಂಬಿ ದೇಗುಲದ ಲಾಕರ್​ನಲ್ಲಿ ಇಡುವ ಬದಲಾಗಿ ವಸ್ತುಗಳನ್ನು ಆತನ ಕೈಗೆ ನೀಡಿದ್ದಾರೆ. 17 ಮೊಬೈಲ್​, ಸ್ಮಾರ್ಟ್​ ವಾಚ್​ ಸೇರಿದಂತೆ ದುಬಾರಿ ವಸ್ತುಗಳನ್ನು ಆತನ ಸುಪರ್ದಿಗೆ ಕೊಟ್ಟು ನಿಶ್ಚಿಂತೆಯಿಂದ ದೇವರ ದರ್ಶನಕ್ಕೆ ತೆರಳಿದ್ದಾರೆ. ದರ್ಶನ ಮುಗಿಸಿ ಮರಳಿ ಬಂದಾಗ ಪ್ರವಾಸಿ ಗೈಡ್​​ಗಾಗಿ ಎಲ್ಲೆಡೆ ಹುಡಕಾಟ ನಡೆಸಿದ್ದಾರೆ. ಆದರೆ, ಎಲ್ಲಿಯೂ ಪತ್ತೆಯಾಗಿಲ್ಲ.

ತಕ್ಷಣಕ್ಕೆ ತಾವು ವಂಚನೆಗೆ ಒಳಗಾಗಿರುವುದನ್ನು ಅರಿತ ಪ್ರವಾಸಿ ತಂಡ ಜ್ಞಾನವ್ಯಾಪಿ ಕಂಟ್ರೋಲ್​ ರೂಮ್​ನಲ್ಲಿ ದೂರು ಸಲ್ಲಿಸಿದ್ದಾರೆ. ಪ್ರಕರಣ ದಾಖಲಿಸಿರುವ ಪೊಲೀಸರು ಸಿಸಿಟಿವಿ ಫುಟೇಜ್​ ಮೂಲಕ ವ್ಯಕ್ತಿಯನ್ನು ಗುರುತಿಸಿದ್ದಾರೆ. ಸ್ಥಳೀಯ ಪೊಲೀಸರ ಸಹಾಯದಿಂದ ವ್ಯಕ್ತಿಯ ಮಾಹಿತಿಯನ್ನು ಜ್ಞಾನವ್ಯಾಪಿ ಪೊಲೀಸರು ಪಡೆದಿದ್ದಾರೆ. ಸದ್ಯ ಆರೋಪಿಯ ಹುಡುಕಾಟಕ್ಕೆ ಪೊಲೀಸರು ಮುಂದಾಗಿದ್ದು, ಇತ್ತ ಭಕ್ತರು ತಮ್ಮ ವಸ್ತುಗಳು ಸಿಗುವ ಭರವಸೆಯಲ್ಲಿ ಕಾದಿದ್ದಾರೆ.

ಇದನ್ನೂ ಓದಿ: ತಪ್ಪಾಗಿ ಖಾತೆಗೆ ಜಮೆಯಾಯ್ತು 1 ಕೋಟಿ ರೂಪಾಯಿ; ಕೇವಲ 24 ಗಂಟೆಯಲ್ಲೇ ಹಣ ಹಿಂದಿರುಗಿಸಿ ಪ್ರಾಮಾಣಿಕತೆ ಮೆರೆದ ಅರ್ಚಕ