ಭೀಮ್​ ಸೇನಾ​ ಮುಖ್ಯಸ್ಥನಿಗೆ ಜೀವ ಬೆದರಿಕೆ; ಲಾರೆನ್ಸ್​​ ಬಿಷ್ಣೋಯಿ ಸಹೋದರನ ವಿರುದ್ಧ ಪ್ರಕರಣ ದಾಖಲು

ಅಮೆರಿಕದಲ್ಲಿ ತಲೆಮರೆಸಿಕೊಂಡಿರುವ ಅನ್ಮೋಲ್​ ಬಿಷ್ಣೋಯಿಯ ಸುಳಿವು ನೀಡಿದವರಿಗೆ 10 ಲಕ್ಷ ರೂ ಬಹುಮಾನ ನೀಡುವುದಾಗಿ ರಾಷ್ಟ್ರೀಯ ತನಿಖಾ ಸಂಸ್ಥೆ(ಎನ್ಐಎ) ಈಗಾಗಲೇ ಘೋಷಿಸಿದೆ.

ಗುರುಗ್ರಾಮ್​(ಹರಿಯಾಣ):ವಿದೇಶದಿಂದಲೇ ಭೀಮ್​ ಸೇನಾ ಮುಖ್ಯಸ್ಥ ಸತ್ಪಾಲ್​ ತನ್ವಾರ್ ಎಂಬವರಿಗೆ ಜೀವ ಬೆದರಿಕೆ ಹಾಕಿದ ಆರೋಪದಡಿ ಗ್ಯಾಂಗ್​ಸ್ಟರ್​ ಲಾರೆನ್ಸ್​ ಬಿಷ್ಣೋಯಿ ಸಹೋದರ ಅನ್ಮೊಲ್​ ಬಿಷ್ಣೋಯಿ ವಿರುದ್ಧ ಗುರುಗ್ರಾಮ್​ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಜಿಂಬಾಬ್ವೆ ಮತ್ತು ಕೀನ್ಯಾ ದೇಶಗಳ ಸಂಖ್ಯೆಗಳನ್ನು ಬಳಸಿಕೊಂಡು ಯುಎಸ್ಎ ಮತ್ತು ಕೆನಡಾದಿಂದ ಬೆದರಿಕೆ ಕರೆಗಳನ್ನು ಮಾಡುತ್ತಿದ್ದಾನೆ ಎಂದು ಆರೋಪಿಸಲಾಗಿದೆ. ಈ ದೂರಿನ ಹಿನ್ನೆಲೆಯಲ್ಲಿ ಪೊಲೀಸರು ತನಿಖೆಗಾಗಿ ಎಸ್‌ಟಿಎಫ್, ಕ್ರೈಂ ಮತ್ತು ಸೈಬರ್ ಕ್ರೈಂ ಘಟಕಗಳ ಸದಸ್ಯರ ತಂಡ ರಚಿಸಿದ್ದಾರೆ. ಅನ್ಮೋಲ್​ ಬಿಷ್ಣೋಯಿಯನ್ನು ಭಾರತಕ್ಕೆ ಕರೆತರಲು ಪ್ರಯತ್ನಿಸಲಾಗುತ್ತಿದೆ ಎಂದು ಪೊಲೀಸರು ಹೇಳಿದ್ದಾರೆ.

ಅಕ್ಟೋಬರ್​​ 30ರಂದು ಸತ್ಪಾಲ್ ತನ್ವಾರ್​​ಗೆ ಕರೆ ಮಾಡಿ, ಆತನನ್ನು ತುಂಡು ತುಂಡಾಗಿ ಕತ್ತರಿಸುವುದಾಗಿ ಬೆದರಿಕೆ ಹಾಕಿದ್ದಾರೆ. 6 ನಿಮಿಷ 41 ಸೆಕೆಂಡ್​ಗಳ ಕಾಲ ಕರೆ ಮಾಡಲಾಗಿದ್ದು, ಮೊದಲಿಗೆ ತನ್ವರ್ ಅವರ ಮಹಿಳಾ ಸೆಕ್ರೆಟರಿ ಫೋನ್​ ಸ್ವೀಕರಿಸಿದ್ದಾರೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ.

ಸೆಕ್ಟರ್​ 37 ಪೊಲೀಸ್​ ಠಾಣೆಯಲ್ಲಿ ಅನ್ಮೋಲ್​ ಬಿಷ್ಣೋಯಿ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆ ಅಡಿ ಪ್ರಕರಣ ದಾಖಲಿಸಲಾಗಿದೆ.

ಅಮೆರಿಕದಲ್ಲಿ ತಲೆಮರೆಸಿಕೊಂಡಿರುವ ಅನ್ಮೋಲ್​ ಬಿಷ್ಣೋಯಿ ಸುಳಿವು ನೀಡಿದವರಿಗೆ/ಆತನನ್ನು ಸೆರೆ ಹಿಡಿಯಲು ಸಹಾಯ ಮಾಡಿದವರಿಗೆ 10 ಲಕ್ಷ ರೂ ಬಹುಮಾನ ನೀಡುವುದಾಗಿ ರಾಷ್ಟ್ರೀಯ ತನಿಖಾ ಸಂಸ್ಥೆ ಘೋಷಿಸಿದೆ.(ಪಿಟಿಐ)

ಇದನ್ನೂ ಓದಿ: ಚಲಿಸುತ್ತಿದ್ದ ಖಾಸಗಿ ಸ್ಲೀಪರ್ ಬಸ್‌ನಲ್ಲಿ ಬೆಂಕಿ; ಕಿಟಕಿಯಿಂದ ಹಾರಿ ಪ್ರಯಾಣಿಕರು ಬಚಾವ್