ತಿರುವನಂತಪುರಂ(ಕೇರಳ): ಆನ್‌ಲೈನ್‌ನಲ್ಲಿ ನಕಲಿ ಲಾಟರಿ ಮಾರಾಟ ನಿಲ್ಲಿಸುವಂತೆ ಗೂಗಲ್ ಮತ್ತು ಮೆಟಾಗೆ ಕೇರಳ ಪೊಲೀಸರು ನೋಟಿಸ್ ನೀಡಿದ್ದಾರೆ. ಪ್ಲೇ ಸ್ಟೋರ್‌ನಿಂದ ನಕಲಿ ಲಾಟರಿ ಟಿಕೆಟ್‌ಗಳನ್ನು ಮಾರಾಟ ಮಾಡುವ ಅಪ್ಲಿಕೇಶನ್‌ಗಳನ್ನು ತೆಗೆದುಹಾಕುವಂತೆ ಸೂಚಿಸಿದ್ದಾರೆ. ಅದೇ ರೀತಿ, ಫೇಸ್‌ಬುಕ್‌ನಿಂದಲೂ ಅಂತಹ ಲಾಟರಿ ಜಾಹೀರಾತುಗಳನ್ನು ತೆಗೆದುಹಾಕುವಂತೆ ತಿಳಿಸಿದ್ದಾರೆ.
ಇತ್ತೀಚೆಗೆ ಕೇರಳ ಪೊಲೀಸರ ಸೈಬರ್ ವಿಭಾಗ ಆನ್‌ಲೈನ್ ಲಾಟರಿಗಳನ್ನು ಮಾರಾಟ ಮಾಡುವ 60 ನಕಲಿ ಅಪ್ಲಿಕೇಶನ್‌ಗಳನ್ನು ಪತ್ತೆ ಮಾಡಿತ್ತು. ಈ ಪೈಕಿ 25 ಫೇಸ್‌ಬುಕ್ ಪ್ರೊಫೈಲ್‌ಗಳು ಮತ್ತು 20 ವೆಬ್‌ಸೈಟ್‌ಗಳು ನಕಲಿ ಲಾಟರಿ ಟಿಕೆಟ್‌ಗಳನ್ನು ಮಾರಾಟ ಮಾಡಿವೆ. ಈ ವಂಚನೆಯಲ್ಲಿ ಭಾಗಿಯಾಗಿರುವವರ ವಿರುದ್ಧ ಕಠಿಣ ಕಾನೂನು ಕ್ರಮ ಜರುಗಿಸಲಾಗುವುದು ಎಂದು ಎಚ್ಚರಿಸಿದ್ದಾರೆ.
ಕಳೆದ ಕೆಲವು ದಿನಗಳಿಂದ ಲಾಟರಿ ಹೆಸರಿನಲ್ಲಿ ನಕಲಿ ಜಾಹೀರಾತು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಎರಡು ಲಾಟರಿಗಳನ್ನು 'ಮೆಗಾ ಮಿಲಿಯನ್ ಲಾಟರಿ' ಮತ್ತು 'ಕೇರಳ ಸಮ್ಮರ್ ಧಮಾಕಾ' ಎಂದು ಪ್ರಚಾರ ಮಾಡಲಾಗುತ್ತಿತ್ತು. ಇದರಲ್ಲಿ ಕೇರಳ ರಾಜ್ಯ ಲಾಟರಿ ಹೆಸರು ಉಲ್ಲೇಖಿಸಲಾಗಿದೆ. ವಾಟ್ಸ್‌ಆ್ಯಪ್, ಟೆಲಿಗ್ರಾಂ, ಇನ್‌ಸ್ಟಾಗ್ರಾಂನಲ್ಲಿ ಜಾಹೀರಾತುಗಳು ಹರಡಿವೆ. ಕೇರಳ ಸರ್ಕಾರ ಆನ್‌ಲೈನ್ ಲಾಟರಿ ಮಾರಾಟ ಆರಂಭಿಸಿದೆ ಎಂದು ಉಲ್ಲೇಖಿಸಲಾಗಿತ್ತು. ಟಿಕೆಟ್ ಬೆಲೆ 40 ರೂಪಾಯಿ ಆಗಿದ್ದು, ಬಹುಮಾನ ಮೌಲ್ಯ 12 ಕೋಟಿ ರೂಪಾಯಿ ಎಂದು ತಿಳಿಸಲಾಗಿತ್ತು.