2060ರವರೆಗೂ ಅತ್ಯಧಿಕ ಜನಸಂಖ್ಯಾ ದೇಶವಾಗಿ ಭಾರತ: 2080ಕ್ಕೆ ವಿಶ್ವದ ಜನಸಂಖ್ಯೆ ಉತ್ತುಂಗಕ್ಕೆ! - Population Of India

2060ರವರೆಗೂ ಭಾರತದ ಜನಸಂಖ್ಯೆ ಬೆಳವಣಿಗೆಯಾಗುತ್ತಲೇ ಇರುತ್ತದೆ ಎಂದು ವಿಶ್ವಸಂಸ್ಥೆಯ ತಜ್ಞರು ಹೇಳಿದ್ದಾರೆ.

ವಿಶ್ವಸಂಸ್ಥೆ : ಮುಂದಿನ ಶತಮಾನದವರೆಗೂ ಭಾರತವು ವಿಶ್ವದ ಅತಿ ಹೆಚ್ಚು ಜನಸಂಖ್ಯೆ ಹೊಂದಿರುವ ದೇಶವಾಗಿ ಮುಂದುವರಿಯಲಿದೆ ಎಂದು ಜನಸಂಖ್ಯಾ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. 2060ರ ದಶಕದ ಮಧ್ಯಭಾಗದಲ್ಲಿ ಭಾರತದ ಜನಸಂಖ್ಯೆ ಉತ್ತುಂಗಕ್ಕೇರಿ ನಿಧಾನವಾಗಿ ಕುಸಿಯಲಿದೆ ಎಂದು ತಜ್ಞರು ಹೇಳಿದ್ದಾರೆ.

ಭಾರತವು ಪ್ರಸ್ತುತ ಜನಸಂಖ್ಯೆಯ ದೃಷ್ಟಿಯಿಂದ ವಿಶ್ವದ ಅತಿದೊಡ್ಡ ದೇಶವಾಗಿದೆ ಮತ್ತು ಇದು ಶತಮಾನದುದ್ದಕ್ಕೂ ಹಾಗೆಯೇ ಮುಂದುವರಿಯಲಿದೆ ಎಂದು ವಿಶ್ವಸಂಸ್ಥೆಯ ಹಿರಿಯ ಜನಸಂಖ್ಯಾ ವ್ಯವಹಾರಗಳ ಅಧಿಕಾರಿ ಕ್ಲೇರ್ ಮೆನೋಜಿ ಗುರುವಾರ ಯುಎನ್ ವಿಶ್ವ ಜನಸಂಖ್ಯಾ ಭವಿಷ್ಯ 2024 ಸಾರಾಂಶ (UN World Population Prospects 2024) ವರದಿಯನ್ನು ಬಿಡುಗಡೆ ಮಾಡಿದ ಸಂದರ್ಭದಲ್ಲಿ ಹೇಳಿದರು.

ಭಾರತದ ಜನಸಂಖ್ಯೆಯು 2060 ರ ದಶಕದಲ್ಲಿ ಗಾತ್ರದಲ್ಲಿ ಉತ್ತುಂಗಕ್ಕೇರುತ್ತದೆ ಮತ್ತು ನಂತರದ ಅವಧಿಯಲ್ಲಿ ಅದು ಸ್ವಲ್ಪ ಮಟ್ಟಿಗೆ ಕಡಿಮೆಯಾಗಲು ಪ್ರಾರಂಭಿಸುತ್ತದೆ. ಹೀಗಾಗಿ ಶತಮಾನದ ಅಂತ್ಯದ ವೇಳೆಗೆ ಭಾರತದ ಜನಸಂಖ್ಯೆ ಸುಮಾರು 1.5 ಬಿಲಿಯನ್ ಆಗಬಹುದು ಎಂದು ಅಂದಾಜಿಸಲಾಗಿದೆ ಎಂದು ಅವರು ಹೇಳಿದರು.

ವರದಿಯ ಪ್ರಕಾರ, ಭಾರತದ ಜನಸಂಖ್ಯೆಯು ಈಗ ಇರುವ 1.45 ಬಿಲಿಯನ್ ನಿಂದ 2064 ರಲ್ಲಿ 1.7 ಬಿಲಿಯನ್ ಗೆ ಏರಿಕೆಯಾಗುವ ನಿರೀಕ್ಷೆಯಿದೆ ಮತ್ತು 2100 ರಲ್ಲಿ 1.5 ಬಿಲಿಯನ್​ಗೆ ಅಂದರೆ ಶೇ 12 ರಷ್ಟು ಇಳಿಕೆಯಾಗಬಹುದು.

2054 ರ ವೇಳೆಗೆ ದುಡಿಯುವ ವಯಸ್ಸಿನ ಜನಸಂಖ್ಯೆಯು ಬೆಳವಣಿಗೆಯಾಗುವ ದೇಶಗಳಲ್ಲಿ ಭಾರತವೂ ಸೇರಿದೆ ಎಂದು ವರದಿ ಉಲ್ಲೇಖಿಸಿದೆ. 20 ರಿಂದ 64 ವರ್ಷ ವಯಸ್ಸಿನ ಜನಸಂಖ್ಯೆಯನ್ನು ದುಡಿಯುವ ವಯಸ್ಸಿನ ಜನಸಂಖ್ಯೆ ಎಂದು ಪರಿಗಣಿಸಲಾಗಿದೆ. ದುಡಿಯುವ ವಯಸ್ಸಿನ ಜನಸಂಖ್ಯೆಯ ಸಾಮರ್ಥ್ಯವನ್ನು ಬಳಸಿಕೊಳ್ಳಲು ದೇಶಗಳು ಶಿಕ್ಷಣ, ಆರೋಗ್ಯ ಮತ್ತು ಮೂಲಸೌಕರ್ಯಗಳಲ್ಲಿ ಹೂಡಿಕೆ ಮಾಡಬೇಕು ಮತ್ತು ಉದ್ಯೋಗಗಳನ್ನು ಸೃಷ್ಟಿಸಲು ಮತ್ತು ಸರ್ಕಾರದ ದಕ್ಷತೆಯನ್ನು ಸುಧಾರಿಸಲು ಸುಧಾರಣೆಗಳನ್ನು ಜಾರಿಗೆ ತರಬೇಕು ಎಂದು ವರದಿ ಸಲಹೆ ನೀಡಿದೆ.

2100ರ ವೇಳೆಗೆ ಭಾರತೀಯರ ಜೀವಿತಾವಧಿ 72.24ರಿಂದ 83.3ಕ್ಕೆ ಏರಿಕೆಯಾಗಲಿದೆ. ಭಾರತದ ಒಟ್ಟು ಫಲವತ್ತತೆ ದರ, ಅಂದರೆ ಮಹಿಳೆಯೊಬ್ಬಳು ಹೆರುವ ಮಕ್ಕಳ ಸಂಖ್ಯೆಯು ಪ್ರಸ್ತುತ 1.96 ರಷ್ಟಿರುವುದು ಮುಂದಿನ ಶತಮಾನದ ಆರಂಭದಲ್ಲಿ 1.69 ಕ್ಕೆ ಇಳಿಕೆಯಾಗಲಿದೆ.

ಮುಂದಿನ 30 ವರ್ಷಗಳಲ್ಲಿ, ಪಾಕಿಸ್ತಾನವು ವಿಶ್ವದ ಮೂರನೇ ಅತಿ ಹೆಚ್ಚು ಜನಸಂಖ್ಯೆ ಹೊಂದಿರುವ ದೇಶವಾಗಲಿದೆ. ಅದರ ಜನಸಂಖ್ಯೆಯು ಪ್ರಸ್ತುತ 251 ಮಿಲಿಯನ್ ನಿಂದ 2054 ರ ವೇಳೆಗೆ 389 ಮಿಲಿಯನ್​ಗೆ ಹೆಚ್ಚಾಗಲಿದೆ. ಇದು ಯುನೈಟೆಡ್ ಸ್ಟೇಟ್ಸ್ ಮತ್ತು ಇಂಡೋನೇಷ್ಯಾವನ್ನು ಹಿಂದಿಕ್ಕಲಿದೆ. ಆ ವರ್ಷ ಭಾರತದಲ್ಲಿ 1.69 ಬಿಲಿಯನ್ ಮತ್ತು ಚೀನಾದಲ್ಲಿ 1.21 ಬಿಲಿಯನ್ ಜನಸಂಖ್ಯೆ ಇರಲಿದೆ.

ಜಾಗತಿಕ ದೃಷ್ಟಿಕೋನವನ್ನು ನೋಡುವುದಾದರೆ- ವಿಶ್ವದ ಜನಸಂಖ್ಯೆಯು 2080 ರ ದಶಕದ ಮಧ್ಯದಲ್ಲಿ ಉತ್ತುಂಗಕ್ಕೇರಲಿದೆ. ಮುಂದಿನ 60 ವರ್ಷಗಳಲ್ಲಿ ವಿಶ್ವದ ಜನಸಂಖ್ಯೆಯು ಈಗಿರುವ 8.2 ಬಿಲಿಯನ್ ನಿಂದ 2080 ರ ದಶಕದ ಮಧ್ಯದಲ್ಲಿ ಸುಮಾರು 10.3 ಬಿಲಿಯನ್​ಗೆ ಏರಿಕೆಯಾಗಲಿದೆ ಮತ್ತು ನಂತರ ಶತಮಾನದ ಅಂತ್ಯದ ವೇಳೆಗೆ ಸುಮಾರು 10.2 ಬಿಲಿಯನ್​ಗೆ ಇಳಿಕೆಯಾಗಲಿದೆ ಎಂದು ವಿಶ್ವಸಂಸ್ಥೆಯ ಆರ್ಥಿಕ ಅಭಿವೃದ್ಧಿಯ ಸಹಾಯಕ ಪ್ರಧಾನ ಕಾರ್ಯದರ್ಶಿ ನವೀದ್ ಹನೀಫ್ ಹೇಳಿದ್ದಾರೆ.

ಹಿರಿಯ ನಾಗರಿಕರ ಸಂಖ್ಯೆಯು ಚಿಕ್ಕವರನ್ನು ಮೀರಿಸುವ ಜನಸಂಖ್ಯಾ ಪ್ರವೃತ್ತಿಯ ಬಗ್ಗೆಯೂ ವರದಿಯಲ್ಲಿ ಪ್ರಸ್ತಾಪಿಸಲಾಗಿದೆ. 2070 ರ ದಶಕದ ಅಂತ್ಯದ ವೇಳೆಗೆ, 65 ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ಜಾಗತಿಕ ಜನಸಂಖ್ಯೆಯು 2.2 ಬಿಲಿಯನ್​ಗೆ ತಲುಪುವ ನಿರೀಕ್ಷೆಯಿದೆ. ಇದು 18 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳ ಸಂಖ್ಯೆಗಿಂತ ಹೆಚ್ಚಾಗಿರುತ್ತದೆ ಮತ್ತು 2030 ರ ಮಧ್ಯದ ವೇಳೆಗೆ, 80 ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನವ ಜನಸಂಖ್ಯೆ 265 ಮಿಲಿಯನ್ ಆಗಿರಲಿದೆ ಎಂದು ಅದು ಹೇಳಿದೆ.

ಇದನ್ನೂ ಓದಿ :ಜುಲೈ 11ರಂದು ವಿಶ್ವ ಜನಸಂಖ್ಯಾ ದಿನಾಚರಣೆ: ಈ ದಿನದ ಮಹತ್ವವೇನು? - World Population Day