ಛತ್ರಪತಿ ಸಂಭಾಜಿನಗರ (ಮಹಾರಾಷ್ಟ್ರ): ಮಕ್ಕಳು ಆಗಿಲ್ಲ ಎಂದು ಮಂತ್ರವಾದಿ ಬಳಿಗೆ ಹೋದ ಮಹಿಳೆಗೆ ಥಳಿಸಿದ ಆರೋಪ ಘಟನೆ ಮಹಾರಾಷ್ಟ್ರದ ಛತ್ರಪತಿ ಸಂಭಾಜಿನಗರ ಜಿಲ್ಲೆಯಲ್ಲಿ ಕೇಳಿಬಂದಿದೆ. ಈ ಸಂಬಂಧ ಮಹಿಳೆ ನೀಡಿದ ದೂರಿನ ಮೇರೆಗೆ ಆರೋಪಿ ಬಾಬಾ ಹಕೀಮ್ ಮುಕ್ತಾರ್ ಶೇಖ್ ಮತ್ತು ಆತನ ತಾಯಿ ಅಬೇದಾ ಶೇಖ್ ಎಂಬುವರ ವಿರುದ್ಧ ಗಂಗಾಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಗಂಗಾಪುರ ನಗರದ ನಿವಾಸಿಯಾದ 35 ವರ್ಷದ ವಿವಾಹಿತ ಮಹಿಳೆ ಮಕ್ಕಳಿಲ್ಲದೆ ಬಳಲುತ್ತಿದ್ದರು. ಮದುವೆಯಾಗಿ 13 ವರ್ಷ ಕಳೆದರೂ ಮಕ್ಕಳು ಆಗಿಲ್ಲ. ವಿವಿಧ ಆಸ್ಪತ್ರೆಗಳಿಗೆ ಹೋಗಿ ಚಿಕಿತ್ಸೆ ಪಡೆದಿದ್ದರು. ಇದರ ನಡುವೆ 2022ರಲ್ಲಿ ಜಾಮ್‌ಗಾಂವ್‌ ನಿವಾಸಿ ಮತ್ತು ಸಂಬಂಧಿಯಾದ ಅಬೇದಾ ಶೇಖ್, ಮಹಿಳೆಯರಲ್ಲಿ ಯಾವುದೇ ಸಮಸ್ಯೆ ಇದ್ದರೆ ನನ್ನ ಮಗನ ಬಳಿಗೆ ಬರುತ್ತಾರೆ. ಆತ ಭೂತೋಚ್ಚಾಟನೆ, ಮಾಟಮಂತ್ರದೊಂದಿಗೆ ಪರಿಹಾರ ಮಾಡುತ್ತಾನೆ. ನಿನಗೂ ಸಹ ಖಂಡಿತವಾಗಿಯೂ ಸಹಾಯ ಮಾಡಬಹುದು. ಹಾಗಾಗಿ ನೀನು ಒಮ್ಮೆ ಆತನ ಬಳಿಗೆ ಬಂದು ಮಾರ್ಗದರ್ಶನ ತೆಗೆದುಕೊ ಎಂದು ಮಹಿಳೆಗೆ ಹೇಳಿದ್ದಳು.