વાવમાં 8 મહિનાથી ધમધમતા કોલ સેન્ટરનો પર્દાફાશ, 16 યુવતી અને યુવકોની કરાઈ અટકાયત

બનાસકાંઠાના વાવ પંથકના દીપાસરા ગામે 8 મહિનાથી ભાડાના મકાનમાં ઈન્ટરનેશનલ કોલ સેન્ટર ચલાવતા પરપ્રાંતિય આરોપીઓની ભુજ સાયબર પોલીસે ધરપકડ કરીને કાર્યવાહી કરી હતી

બનાસકાંઠા:જિલ્લાના સરહદી વિસ્તાર વાવના દીપાસર ગામમા છેલ્લા 8 મહિનાથી મકાન ભાડે રાખીને પરપ્રાંતિય યુવક અને યુવતીઓ ગેરકાયદેસર ઈન્ટરનેશનલ કોલ સેન્ટર ચલાવતા હોવાની જાણકારી સાયબર સેલ ભુજ રેન્જને મળી હતી. બાતમીના આધારે સાયબર સેલ ભુજે ઓચિંતા દરોડા પાડ્યા હતા. જેમાં સમગ્ર રેકેટનો પર્દાફાશ થયો હતો. આ બનાવની જાણ સમગ્ર પંથકમાં થતા ચકચાર મચી હતી.

કોલસેન્ટર ચલાવતા આરોપીઓની ધરપકડ: મળતી માહિતી મુજબ વાવ નજીક દીપાસરા ગામમાં છેલ્લા 8 મહિનાથી આ ગેરકાયદેસર ઈન્ટરનેશનલ કોલ સેન્ટર ધમધમતું હતું. દીપાસરા ગામમાં સોલારમાં ટેન્ડર નાખવાના બહાને પરપ્રાંતિય લોકોએ મકાન ભાડે રાખ્યું હતું. જેમાં તેઓ 16 યુવતીઓ અને યુવકો આ ગેરકાયદેસર ઈન્ટરનેશનલ કોલ સેન્ટર ચલાવતા હતા. આ આરોપીઓ વિદેશમાં લોકોને ફોન કરીને લોન આપવાના બહાને તેમની સાથે ફ્રોડ કરતા હતા. બોર્ડર વિસ્તાર હોય એટલે પરપ્રાંતિય લોકો 8 મહિનાથી આવું કંઈ ચલાવતા હોય તેની સ્થાનિકોને પણ જાણ નહોતી. આરોપીઓ મકાન ભાડે રાખીને વિદેશી નાગરિકો સાથે છેતરપિંડી કરતા હતા. જેમાં નાગાલેન્ડ, ઉત્તર પ્રદેશ મિઝોરમ અને અમદાવાદ અને આણંદના આરોપી યુવક યુવતીઓ સંડોવાયેલા હતા.

રેડમાં 8.36 લાખનો મુદ્દામાલ જપ્ત: જ્યારે આ બાબત અંગે એક જાગૃત નાગરિકે આ બાબતની જાણ ભુજ સાયબર પોલીસને કરતા તેઓ સતર્ક થઈ હતી. ત્યારે ભુજ સાયબરે મકાનમાં રેડ પાડતા છેતરપિંડી કરતા 16 યુવક યુવતીઓને ઝડપી લીધા હતા અને રેડ દરમિયાન પોલીસને 25 લેપટોપ અને 30 ફોન સહિત કુલ 8.36 લાખનો મુદ્દામાલ જપ્ત કર્યો હતો. પોલીસની સવારથી લઈને સાંજ સુધી તપાસ ચાલુ હતી. સાયબર પોલીસે આ અંગે વધુ તપાસ કરતા અમદાવાદના સ્વપ્નિલ ઉર્ફે સેમ પટેલનું નામ બહાર આવ્યું છે. ત્યારે આ મામલે ભુજ રેન્જ સાયબર વધું તપાસ હાથ ધરીને આરોપીઓ સામે કાર્યવાહી હાથ ધરી છે.

આ પણ વાંચો: