ভিডিঅ’ ভাইৰেল কৰাৰ ভাবুকিৰে দলবদ্ধ ধৰ্ষণ কিশোৰীক, সাত মাহৰ পিছতহে ঘটনা পোহৰলৈ

ডিব্ৰুগড়: চাবুৱাৰ শিয়ালকাটী চাহ বাগিচাত সংঘটিত হৈছে ভয়ংকৰ ঘটনা । পাঁচটাকৈ লম্পটৰ কামনাৰ বলি হ'ল এগৰাকী কিশোৰী । চাবুৱাৰ শিয়ালকাটী চাহ বাগিচাৰ ৰঙামাটি লাইনৰ ১ নং লাইনত সংঘটিত হৈছে এই ঘটনা । কিশোৰীগৰাকী ৭ মাহৰ অন্তঃসত্বা হোৱাৰ পাছতে এই ঘটনা পোহৰলৈ আহে । 

পিতৃ-মাতৃ নথকা কিশোৰীগৰাকীৰ শৰীৰিক অৱস্থাৰ পৰিৱৰ্তন হোৱাৰ পাছতেই অঞ্চলটোৰ ৰাইজে সোধা-পোছা কৰাত সমগ্ৰ ঘটনা পোহৰলৈ আহে । ইয়াৰ পাছতে ৰাইজৰ সহযোগত চাবুৱা আৰক্ষী থানাত এজাহাৰ দাখিল কৰে ভুক্তভোগী কিশোৰী গৰাকীয়ে । এজাহাৰ লাভ কৰাৰ পাছতেই বৃহস্পতিবাৰে নিশাই চাবুৱা আৰক্ষীয়ে ৪ জনক আটক কৰিবলৈ সক্ষম হয় যদিও আন এজনে পলায়ন কৰে । চাবুৱা আৰক্ষীয়ে চাবুৱা থানাত 81/ 24 US 376(D)ITC RWSEC 60 of POCSO আইনৰ অধীনত গোচৰ ৰুজু কৰি তদন্ত আৰম্ভ কৰিছে । 

আৰক্ষীয়ে জানিবলৈ দিয়া অনুসৰি চাবুৱাৰ শিয়ালকাটী চাহ বাগিচাৰ পৰাই গ্ৰেপ্তাৰ কৰিছে কৈলাশ তাঁতী (৫৫), বিকি তাঁতী (২০) মনজিত হচদাৰ (১৮) ক ৷ ইফালে আন এজন অভিযুক্ত অমিৰ বাৰিক পলাতক হৈ আছে ৷ ঘটনাৰ লগত জড়িত আন এজন কিশোৰক আটক কৰি যোৰহাটৰ শিশুগৃহলৈ প্ৰেৰণ কৰিছে আৰক্ষীয়ে । এই কাণ্ড সংঘটিত কৰি এই পাঁচ পাষণ্ডই ভিডিঅ' প্ৰস্তুত কৰিছিল । যদি ঘটনাটোৰ বিষয়ে কাৰোবাক কয়, তেতিয়া ভিডিঅ' ভাইৰেল কৰাৰ ভাবুকি দি আছিল কিশোৰীগৰাকীক । 

লগতে পঢ়ক: ধৰ্ষণত অভিযুক্তক ফাঁচিৰ দাবীত আৰক্ষী চকী ঘেৰাও-মুণ্ডন - Lakhimpur rape case

পাৰ্টী কৰাৰ চলেৰে ল'জত ছাত্ৰীক দলবদ্ধ ধৰ্ষণ - Rape In Guwahati