খিলঞ্জীয়াৰ অধিকাৰ সুৰক্ষিত কৰাটোৱেই APHLCৰ মূল উদ্দেশ্য : জন ইংতি কাথাৰ - Lok Sabha Election 2024 - LOK SABHA ELECTION 2024

ডিফু, ৯ এপ্ৰিল : সমাগত লোকসভা নিৰ্বাচনৰ প্ৰতি লক্ষ্য ৰাখি শাসকীয় বিজেপি দলে ব্যাপক প্ৰচাৰ অব্যাহত ৰখাৰ সমান্তৰালভাৱে বিৰোধী দলসমূহেও অব্যাহত ৰাখিছে তৎপৰতা ৷ মঙলবাৰে ডিফুত এক সংবাদমেল অনুষ্ঠিত কৰি অল পাৰ্টি হিলছ লীডাৰ্ছ কনফাৰেন্স চমুকৈ এ পি এইচ এল চি দলৰ সভাপতি তথা দলটোৰ এইবাৰৰ লোকসভা নিৰ্বাচনৰ প্ৰাৰ্থী জন ইংতি কাথাৰে দলৰ লক্ষ্য সম্পৰ্কে গুৰুত্বপূৰ্ণ স্থিতি প্ৰকাশ কৰে ।

নেতাগৰাকীয়ে সংবাদমেলযোগে পাৰ্বত্য জিলাকেইখনত বসবাস কৰি থকা পাৰ্বত্য জনজাতি, খিলঞ্জীয়া অসমীয়া আৰু আদিবাসীসকলৰ সুৰক্ষা সুনিশ্চিত কৰাটো দলটোৰ মূল লক্ষ্য বুলি সদৰী কৰে । জিলাকেইখনৰ এই খিলঞ্জীয়া শক্তিক বাধা দিয়াৰ উদ্দেশ্যেই বিজেপি -আৰ এছ এছ-বংগসেনাই গণ সুৰক্ষা‌ পাৰ্টীৰ প্ৰাৰ্থী থিয় কৰোৱা বুলি কাথাৰে মন্তব্য কৰে ।

আনহাতে, জিলাখনত তিনি বছৰতকৈ অধিক সময় কৰ্মৰত চৰকাৰী বিষয়াসকলক নিৰ্বাচনৰ পূৰ্বে বদলি কৰিব লাগে যদিও জিলাখনত এনে বহু চৰকাৰী বিষয়া এতিয়াও কৰ্মৰত হৈ থকা বুলি অভিযোগ কৰে । এইক্ষেত্ৰত পশ্চিম কাৰ্বি আংলং জিলাৰ আৰক্ষী অধীক্ষকক ডিমা হাচাও জিলালৈ বদলি কৰা বুলি আঙুলিয়াই দি এয়া আইনবিৰুদ্ধ আৰু ভাৰতীয় নিৰ্বাচন আয়োগৰ নিৰ্দেশৰ অৱমাননা হোৱাৰ অভিযোগ উত্থাপন কৰে ।

লগতে পঢ়ক: কংগ্ৰেছৰ দুৰ্গত ১৫ হাজাৰ ভোটত লীড ল’ব তপন গগৈয়ে !