পঞ্চভূতত বিলীন সহপাঠীৰ আক্ৰমণত নিহত ভৱেশ ডেকাৰ নশ্বৰ দেহ - Students Murder in Sipajhar

মঙলদৈ,২৪ ছেপ্টেম্বৰ: সোমবাৰে ছিপাঝাৰৰ পদুমপুখু্ৰী উচ্চ মাধ্যমিক বিদ্যালয়ত জ্যেষ্ঠ ছাত্ৰৰ প্ৰহাৰত প্ৰাণ হেৰুৱাইছিল ভৱেশ ডেকা নামৰ ছাত্ৰজনে । অৱশেষত ভৱেশ ডেকাৰ মৃতদেহ গুৱাহাটী মেডিকেল কলেজত মৰণোত্তৰ পৰীক্ষাৰ অন্তত মঙলবাৰে নিজা বাসগৃহ সেনাপতিপাৰা গাঁৱলৈ অনা হয় ৷ মৃতদেহ স্বগৃহত উপস্থিত হোৱাৰ লগে লগে পৰিয়াল আৰু আত্মীয় স্বজন আৰু হাজাৰ হাজাৰ গাওঁবাসীৰ মাজত কান্দোনৰ ৰোল উঠে । হাজাৰ হাজাৰ সমবেত লোকে অন্তিমবাৰৰ বাবে এবাৰ চাবলৈ হেতা ওপৰা লগায় ।  

মৃতদেহ স্ব-গৃহলৈ অনাৰ পূৰ্বে মহলীয়াপাৰা চকত ছাত্ৰ সন্থা, ব্যৱসায়ী সন্থাকে ধৰি বিভিন্ন দল সংগঠনৰ হাজাৰ হাজাৰ লোকৰ উপস্থিতিত শেষ শ্ৰদ্ধাঞ্জলি জনাই ভৱেশ ডেকাক । পিছে, বিদ্যালয়ত পাঠদান চলি থকা সময়তে বিদ্যালয়খনৰ জ্যেষ্ঠ ছাত্ৰই হত্যা কৰা ভৱেশ ডেকাক শেষ শ্ৰদ্ধাঞ্জলি জনাবলৈ উপস্থিত নাথাকিল বিদ্যালয়খনৰ এজনো শিক্ষক-কৰ্মচাৰী । ঘটনা সংঘটিত হোৱাৰ ৩০ ঘন্টা অতিক্ৰম কৰাৰ পিছতো বিদ্যালয় বা মৃত ছাত্ৰগৰাকীৰ ঘৰত উপস্থিত নহ'ল বিদ্যালয়সমূহৰ পৰিদৰ্শকগৰাকী । যাক লৈ স্থানীয় ৰাইজে ক্ষোভ প্ৰকাশ কৰি এই ঘটনাৰ এক উচিত ন্যায় প্ৰদানৰ দাবী উত্থাপন কৰে ।