কাছাৰত দুই মহিলাসহ তিনিটা ড্ৰাগছ সৰবৰাহকাৰীক গ্ৰেপ্তাৰ - Drug Paddlers Arrested

হাফলং, 3 এপ্ৰিল : ড্ৰাগছৰ বিৰুদ্ধে ডিমা হাছাও আৰক্ষীয়ে অব্যাহত ৰাখিছে অভিযান ৷ প্ৰায় প্ৰতিদিনেই ডিমা হাছাও জিলাত অভিযান চলাই আৰক্ষীয়ে আটক কৰিছে ড্ৰাগছ সৰবৰাহকাৰী ৷ কিন্তু ইয়াৰ পিচতো জিলাখনত সৰৰাহকাৰীয়ে ন ন কৌশলেৰে অব্যাহত ৰাখিছে ড্ৰাগছৰ সৰবৰাহ ৷  

ইয়াৰ মাজতে শেহতীয়াকৈ কাছাৰৰ পৰা তিনিটা ড্ৰাগছ সৰবৰাহকাৰীক গ্ৰেপ্তাৰ কৰে আৰক্ষীয়ে ৷ ইয়াৰে দুগৰাকী মহিলা সৰবৰাহকাৰী ৷ বুধবাৰে বিয়লি ডিমা হাছাও জিলাৰ অতিৰিক্ত আৰক্ষী অধীক্ষক (অপৰাধ) ফাৰুক আহমেদে এক সংবাদমেল সম্বোধন কৰি জানিবলৈ দিয়ে যে, 30 মাৰ্চত শিলচৰৰ পৰা ড্ৰাগছ সৰবৰাহৰ বাবে এজন যুৱক হাফলঙলৈ আহিছিল ৷ পৰৱৰ্তী সময়ত গোপন খবৰৰ ভিত্তিত অভিযান চলাই হাফলং চহৰত ড্ৰাগছসহ শিলচৰৰ পৰা অহা ড্ৰাগছ সৰবৰাহকাৰী যুৱকৰ লগতে স্থানীয় আন এক সৰবৰাহকাৰীক গ্ৰেপ্তাৰ কৰি গোচৰ ৰুজু কৰিছিল আৰক্ষীয়ে ৷  

ইয়াৰ পিচতে এই দুই ড্ৰাগছ সৰবৰাহকাৰীক জেৰা চলাই কাছাৰ আৰক্ষীৰ সহযোগত ডিমা হাছাও আৰক্ষীয়ে শিলচৰৰ পৰা দুই মহিলাসহ তিনিটা সৰবৰাহকাৰীক গ্ৰেপ্তাৰ কৰে বুলি জানিবলৈ দিয়ে অতিৰিক্ত আৰক্ষী অধীক্ষকগৰাকীয়ে ৷ তেওঁ কয় এই বছৰত এতিয়ালৈকে ডিমা হাছাও আৰক্ষীয়ে অভিযান চলাই শিলচৰৰ পৰা মুঠ 7 টা সৰবৰাহকাৰীক গ্ৰেপ্তাৰ কৰিছে ৷ 

লগতে পঢ়ক : বিলাসীপাৰাত সজীৱ গুলী-পিষ্টলসহ আটক এজন - Arms Recovered In Bilasipara