যোৰহাটৰ ভোগদৈ নদীৰ পাৰত যুৱকৰ মৃতদেহ উদ্ধাৰ - drug addicted youth

যোৰহাট, 21 মাৰ্চ : যোৰহাট সদৰ থানাৰ অন্তৰ্গত আৰু নগৰৰ মাজমজিয়াত থকা ভোগদৈ দলঙৰ পৰা কিছু নিলগত নদীৰ পাৰত পৰি থকা অৱস্থাত এজন যুৱকৰ মৃতদেহ উদ্ধাৰ হৈছে । মৃতদেহটো ফাঁচীআলিৰ ফিৰোজ নামৰ যুৱকজনৰ বুলি চিনাক্ত কৰা হৈছে । বুধবাৰৰ দিনৰ ভাগৰ পৰা সন্ধানহীন হৈ থকা যুৱকজনৰ শৰীৰত থকা আঘাতৰ চিনলৈ চাই এয়া এক হত্যাকাণ্ড বুলি সন্দেহ কৰা হৈছে । ঘটনাস্থলীত যুৱকজনৰ ম’বাইল ফোনটোও বিচাৰি পোৱা হোৱা নাই ।

তাৎপৰ্যপূৰ্ণ যে, অঞ্চলটোত ব্যাপক হাৰত প্ৰচলন হৈ থকা নিষিদ্ধ ড্ৰাগছৰ বাবেই যুৱকজন হত্যাৰ বলি হোৱা বুলি অভিযোগ উত্থাপিত হৈছে । ফাঁচীআলি তথা ভোগদৈ নদীৰ মথাউৰি অঞ্চলটোত একাংশই ব্যাপক হাৰত নিষিদ্ধ ড্ৰাগছৰ ব্যৱসায় কৰি অহাৰ অভিযোগ দীৰ্ঘদিনীয়া । উল্লেখ্য যে, মৃত ফিৰোজ পূৰ্বে ড্ৰাগছ আসক্ত আছিল যদিও বিগত ছয়-সাত মাহ পূৰ্বৰে পৰা ড্ৰাগছ সেৱনৰ পৰা আঁতৰি আহি চিকিৎসকৰ পৰামৰ্শ অনুসৰি ঔষধ সেৱন কৰি আছিল ৷ ফিৰোজৰ মৃত্যুৰ বাবে যিসকল জগৰীয়া সেইসকলৰ সন্ধান উলিয়াই বিহিত ব্যৱস্থা গ্ৰহণ কৰিবলৈ দাবী জনাইছে পৰিয়াল তথা স্থানীয় লোকে । ঘটনাস্থলীত ইতিমধ্যে আৰক্ষী উপস্থিত হৈ যুৱকজনৰ মৃতদেহ মৰণোত্তৰ পৰীক্ষা বাবে JMCH লৈ প্ৰেৰণ কৰিছে ৷

লগতে পঢ়ক : ছাত্ৰীৰ মৃতদেহ লৈ প্ৰতিবাদত নামিল হাজাৰ হাজাৰ ৰাইজ