অশোক সিংহলৰ প্ৰতীকী শৱদেহ সাঙীত লৈ আছুৰ ব্যতিক্ৰমী প্ৰতিবাদ - Guwahati Flash Flood - GUWAHATI FLASH FLOOD

গুৱাহাটী,৬ আগষ্ট: গুৱাহাটী উন্নয়ন মন্ত্ৰী অশোক সিংহলৰ প্ৰতীকী সাঙীত লৈ আছুৰ ব্যতিক্ৰমী প্ৰতিবাদ । মঙলবাৰে আছুৱে উজানবজাৰস্থিত শ্বহীদ ন্যাসৰ পৰা অশোক সিংহলৰ প্ৰতীকী শৱদেহ কান্ধত লৈ বিসৰ্জন দিলে ব্ৰহ্মপুত্ৰত । অশোক সিংহল হায় হায়, অশোক সিংহলৰ কাম নাই, অশোক সিংহল মৰি গ'ল, হিমন্ত বিশ্ব শৰ্মা হায় হায়, অসম চৰকাৰ হায় হায়, কৃত্ৰিম বান নিয়ন্ত্ৰণত ব্যৰ্থ হৈছে অসম চৰকাৰ আদি শ্ল'গান দি ব্ৰহ্মপুত্ৰত মন্ত্ৰীগৰাকীৰ প্ৰতীকী শ বিসৰ্জন দিয়ে প্ৰতিবাদকাৰী আছুৰ কৰ্মকৰ্তাসকলে ।  

গুৱাহাটীৰ সমস্যা সমাধান কৰিব নোৱৰা মন্ত্ৰীক অশোক সিংহলক পদত্যাগৰ দাবী জনায় আছুৱে । প্ৰতিবাদ সাব্যস্ত কৰি আছুৰ নেতৃত্বই কয়,"মহানগৰীৰ কৃত্ৰিম বান ৰোধত ব্যৰ্থ হৈছে অসম চৰকাৰ, লগতে ব্যৰ্থ হৈছে মহানগৰ উন্নয়ন মন্ত্ৰী অশোক সিংহল । পদত্যাগ কৰিব লাগে মহানগৰ উন্নয়ন মন্ত্ৰী অশোক সিংহলে । মুখ্যমন্ত্ৰীয়ে গুৱাহাটী উন্নয়নৰ কথা কৈ লাভ নাই । মহানগৰীৰ কৃত্ৰিম বান ৰোধ কৰাত ব্যৰ্থ হোৱাৰ কথা স্বীকাৰ কৰিব লাগে মুখ্যমন্ত্ৰীয়ে । উল্লেখ্য যে সোমবাৰে বিয়লিৰ ভাগৰ পৰা অহা বৰষুণজাকত মহানগৰীৰ জনজীৱন স্তব্ধ হৈ পৰিছিল । যাৰ বিৰুদ্ধে মঙলবাৰে আছুৱে ৰূপায়ণ কৰে এই প্ৰতিবাদী কাৰ্যসূচী ।