অসমীয়া শিপিনীৰ এক বৰ্ণিল ইতিহাস আছে ৷ তাঁতশালত সৰগ ৰচিব পৰা এই শিল্পই কিন্তু এতিয়া তীব্ৰ প্ৰত্যাহ্বানৰ সন্মুখীন হৈছে ৷ এনে প্ৰত্যাহ্বানৰ মাজতে তেজপুৰৰ ঐতিহ্যমণ্ডিত ঘৰপৰা চুবুৰীত নিবেদিতা পাঠক নামৰ এগৰাকী উদ্যমী মহিলাই পৰিচালনা কৰি গৈছে এনে এক বয়ন উদ্যোগ ৷
বিগত ২০০৮ বর্ষতে এই বয়ন ক্ষেত্ৰত জড়িত পাঠকে এঞ্জেলা ইণ্ডাষ্ট্ৰী নামৰে প্ৰথমে ২০২১ চনত মাত্ৰ এখন তাঁতশালেৰে আৰম্ভ কৰিছিল এই ক্ষুদ্ৰ উদ্যোগটো ৷ ক'ভিডকালীন সময়ত সন্মুখীন হোৱা প্ৰত্যাহ্বান আৰু বিভিন্নজনৰ পৰা প্ৰৱঞ্চনাৰ সন্মুখীন হৈয়ো পৰাজয় স্বীকাৰ নকৰি তেওঁ কিছুদিনৰ পাচতে তাঁতশালৰ সংখ্যা তিনিখন আৰু তাৰপিছত চাৰিখনলৈ বৃদ্ধি কৰে ৷
শিপিনীৰ সৈতে নিবেদিতা পাঠক (ETV Bharat Assam)
উদ্যোগী মহিলাগৰাকীৰ প্ৰয়াসত বৰ্তমান এই ক্ষুদ্ৰ উদ্যোগটোত তাঁতশালৰ সংখ্যা আঠখন ৷ উল্লেখযোগ্য যে অভয়াপুৰীতো তেওঁৰ আন তিনিখন তাঁতশাল আছে ৷ তেওঁ কয়, "অতি সোনকালে আৰু ৪ খন তাঁতশাল সংযোগ কৰিম । বৰ্তমান মুঠ ১১ গৰাকী শিপিনী জড়িত থকাৰ লগতে ইয়াৰে আনুষংগিক কামৰে জড়িত হৈ আছে কেইবাটাও পৰিয়াল ৷ নতুন প্ৰজন্মৰ যুৱকেও আত্মসংস্থাপনৰ পথ মুকলি কৰিবলৈ সক্ষম হৈছে এই ক্ষুদ্ৰ উদ্যোগৰ জৰিয়তে ৷"
পাট-মুগা কাপোৰ বয়নত গুৰুত্ব আৰোপ কৰা নিবেদিতা পাঠকে কয় যে কোনো ধৰণৰ চৰকাৰী সাহায্য নতুবা ঋণ অবিহনেই তেওঁ এই কাম কৰি গৈছে ৷ চৰকাৰী মেৰপেঁচৰ বাবেই তেওঁ চৰকাৰী সাহায্যৰ আশাও ত্যাগ কৰা বুলি প্ৰকাশ কৰে ৷ তেওঁ এই সন্দৰ্ভত কয়, "থলুৱা বয়ন শিল্পলৈ আহিছে অশনি সংকেত ৷ পাটৰ নামত আন বিভিন্ন সূতাৰে বহিঃৰাজ্যত বোৱা কাপোৰে অসমৰ পাটৰ কাপোৰলৈ আনিছে তীব্ৰ প্ৰত্যাহ্বান ৷ তাতে সঁচা অৰ্থত থলুৱা বয়ন শিল্পৰে জড়িতসকলৰ বহুতেই বঞ্চিত হ’বলগীয়া হৈছে চৰকাৰী সাহায্য নতুবা ঋণৰ সুবিধাৰ পৰা ৷ ইয়াৰ বিপৰীতে আনৰ বয়ন উদ্যোগলৈ আহি একপি ফটো উঠা লোকেও লাভ কৰে চৰকাৰী সাহায্য ৷"
শিপিনীৰ সৈতে নিবেদিতা পাঠক (ETV Bharat Assam)
এইগৰাকী উদ্যমী মহিলাই আক্ষেপৰে কয় যে এনে কাৰণতেই তেওঁ এতিয়া চৰকাৰী সাহায্যৰ আশাই ত্যাগ কৰে ৷ বৰ্তমান কলকাতাৰ বজাৰত অসমীয়া সাজ-পোছাকৰ আদৰ বৃদ্ধি পাইছে আৰু এক সুকীয়া বজাৰ দখল কৰিবলৈ সক্ষম হৈছে । বৰ্তমান আমেৰিকাৰ পৰা ৪ টা নতুন অৰ্ডাৰ লাভ কৰিছে এইগৰাকী মহিলাই ।
পাট, মুগা, টচ আৰু কটনৰ উন্নত মানৰ কাপোৰ বোৱাত গুৰুত্ব আৰোপ কৰি আহিছে এইগৰাকী উদ্যমী মহিলাই ৷ এখন উপযুক্ত বজাৰৰ সমস্যাৰ বিষয়ে উল্লেখ কৰি তেওঁ লগতে কয় যে প্ৰকৃততে চৰকাৰে গুৰুত্ব আৰোপ কৰিলে এই বয়ন শিল্প ৰাজ্যৰ আত্মসংস্থাপনৰ ক্ষেত্ৰত এক বৃহৎ উদ্যোগ হিচাপে গঢ় ল’ব পাৰে ৷ শিপিনী,ব্যৱসায়ী সকলোৱেই ইয়াৰ দ্বাৰা উপকৃত হ’ব পাৰে, যদিহে কৰ্মদক্ষতা আৰু কামৰ প্ৰতি হাবিয়াস বৃদ্ধি কৰা হয় ৷
