লখিমপুৰ: কোনোবা গাভৰুৰ চাদৰৰ আঁচল উৰুৱাই আকাশ ৰাঙলী কৰি ধূলিয়ৰী বাটেৰে আকৌ আহিল দুষ্ট ফাগুণ । আকাশ ৰাঙলী কৰি এই মতলীয়া ফাগুণৰ কঢ়িয়াই আনিছে আলি-আয়ে-লৃগাঙৰ বতৰা । লৃগাঙৰ বতৰাই থৌকি-বাথৌ কৰিছে মিচিং গাভৰুৰ মন ।
তাঁতশালত ব্যস্ততা বাঢ়িছে লখিমপুৰৰ মিচিং জীয়ৰী-বোৱাৰীৰ । ফাগুণে আনিছে লৃগাঙৰ বতৰা । লৃগাঙৰ বতৰাই উতলা কৰিছে মিচিং ডেকা-গাভৰুৰ মন । ফাগুণ মানেই মিচিং জনগোষ্ঠী লোকসকলৰ উৎসৱৰ বতৰ । ফাগুণ মানেই যেন ঐনিতম, গুমৰাগৰ সমাহাৰ ।
মদাৰ-শিমলু ফুলিলেই নামি আহে মিচিং জনগোষ্ঠী সকলৰ হেঁপাহৰ উৎসৱ আলি-আয়ে-লৃগাং । কাৰণ, ফাগুণৰ প্ৰথমটো বুধবাৰতে পালন কৰা হ’ব ভূমিপুত্ৰ মিছিংসকলৰ কৃষিভিত্তিক উৎসৱ আলি-আয়ে-লৃগাং। সমাগত মিচিং জনগোষ্ঠীৰ কৃষিভিত্তিক উৎসৱ আলি-আয়ে-লৃগাঙক কেন্দ্ৰ কৰি এতিয়া ব্যস্ততা বাঢ়িছে মিচিং ডেকা-গাভৰুৰ ।
ৰাজ্যৰ অনান্য প্ৰান্তৰ দৰে লখিমপুৰৰ ঢকুৱাখনাতো মিচিং জনগোষ্ঠীৰ জনবসতিপ্ৰধান অঞ্চলত এতিয়া গুমৰাগ-ঐনিতমৰ মিঠা সুৰত মুখৰিত হৈছে আকাশ-বতাহ । হেঁপাহৰ লৃগাঙক লৈ তাঁতশালত বাঢ়িছে মিচিং যুৱতীৰ ব্যাপক ব্যস্ততা । থৌকি-বাথৌ হিয়াখন লৈ মিচিং জীয়ৰী-বোৱাৰীসকলে চলাইছে লৃগাঙৰ প্ৰস্তুতি ।
সাতোবন কাটি কৰি এতিয়া ঐনিতম জুৰি তাঁতশালত ব্যস্ত হৈছে ঢকুৱাখনাৰ মেধিসুঁতি গাঁৱৰ মিচিং জীয়ৰী-বোৱাৰী । তাঁতশালত বাৰে বাৰে লাগিছে আউল । এতিয়া মূৰ তুলিবলৈও আহৰি নাই । হাতত সময় তেনেই কম । কিয়নো, লৃগাঙত যে আপোনজনক যাচিব লাগিব হেঁপাহৰ উপহাৰ ।
প্ৰাণৰ উৎসৱ লৃগাঙলৈ বুলি কোনোৱে যদি লগাইছে জনগোষ্ঠীটোৰ পৰম্পৰাগত বস্ত্ৰ লেকে এগে, ৰিঃবি গাচেং, অৰকগ, দুমৌৰ কোনোৱে লগাইছে মিবু গালেগ, গন্ৰ উগনৰ লগতে নানাৰঙী বুতাবচা কাপোৰ ।
তাঁতশালত ব্যস্ত মিচিং গাভৰুৱে ক’লে, "লৃগাঙত হেপাহেৰে বোৱা কাপোৰ দিব লাগিব প্ৰিয়জনক । দিব লাগিব পৰিয়ালৰ লোকক । ৰঙীণ ন কাপোৰ পিন্ধি লৃগাঙৰ দিনা গুমৰাগ নাচিব লাগিব । লৃগাঙৰ পৰম্পৰাগত নৃত্য-গীতৰ আনন্দত বিলীন হ'ব লাগিব ।"
মিচিং সমাজৰ এই পৰম্পৰা ৰক্ষাৰ বাবেই লৃগাঙৰ প্ৰাকক্ষণত তাঁতশালত ব্যস্ত হৈ পৰিছে জনগোষ্ঠীটোৰ জীয়ৰী-বোৱাৰী । গীত-মাতৰ উচাহভৰা পৰিৱেশত তাঁতশালৰ খিট খিট শব্দত এতিয়া এনেদৰে লৃগাঙৰ প্ৰস্তুতিত দিনে নিশাই ব্যস্ত মিচিং গাভৰু ।
