বৰপেটা, ৩ ছেপ্টেম্বৰ:বৰপেটাৰ বিদেশী ন্যায়াধিকৰণৰ ৰায়ৰ বিৰুদ্ধে উচ্চ ন্যায়ালয়ত দ্বাৰস্থ হ’ব এ আই ইউ ডি এফ ৷ বৰপেটাৰ ২৮ লোকক অবৈধ ভাৰতীয় বুলি ঘোষণা কৰি গোৱালপাৰা ডিটেনছন কেম্পলৈ প্ৰেৰণ কৰা বিদেশী ন্যায়াধিকৰণৰ ৰায়ক প্ৰত্যাহ্বান জনাই গুৱাহাটী উচ্চ ন্যায়ালয়ত গোচৰ তৰিব এ আই ইউ ডি এফৰ অধ্যক্ষ বদৰুদ্দিন আজমলে ৷ প্ৰয়োজন হ’লে উচ্চতম ন্যায়ালয়ৰো দ্বাৰস্থ হ’ব এ আই ইউ ডি এফৰ অধ্যক্ষগৰাকী ৷ এ আই ইউ ডি এফৰ জনীয়াৰ বিধায়ক ৰফিকুল ইছলামে মঙলবাৰে বৰপেটাত সংবাদমাধ্যমৰ আগত এই কথা ব্যক্ত কৰে ৷
বিদেশী ন্যায়াধিকৰণে কিছুদিন পূৰ্বে অবৈধ বিদেশী ঘোষণা কৰা বৰপেটা জিলাৰ ২৮ লোকক সোমবাৰে গোৱালপাৰাৰ ডিটেনছন শিবিৰলৈ প্ৰেৰণ কৰিছিল ৷ বৰপেটা জিলাৰ আৰক্ষী অধীক্ষকৰ কাৰ্যালয়ৰ পৰা নিৰাপত্তা বেষ্টনীৰ মাজেৰে আৰক্ষীৰ এখন বাছেৰে এই লোকসকলক গোৱালপাৰালৈ প্ৰেৰণ কৰা হয় । ইয়াকে লৈ সংশ্লিষ্ট লোকসকলৰ আত্মীয় বুলি দাবী কৰা যথেষ্টসংখ্যক লোক আৰক্ষী অধীক্ষকৰ কাৰ্যালয়ৰ সন্মুখত সমবেত হয় ।
নিজৰ ভাতৃ-ভগ্নী তথা আত্মীয়-স্বজনক এনেদৰে ডিটেনছন শিবিৰলৈ প্ৰেৰণ কৰাত বৰপেটা আৰক্ষী অধীক্ষকৰ কাৰ্যালয়ৰ চৌহদত শোকাকুল পৰিবেশৰ সৃষ্টি হয় ৷ ইয়াৰ পাছতেই আজি অৰ্থাৎ মঙলবাৰে এই সন্দৰ্ভত প্ৰতিক্ৰিয়া ব্যক্ত কৰিছে এ আই ইউ ডি এফৰ জনীয়াৰ বিধায়ক ৰফিকুল ইছলামে ৷ বিধায়ক ইছলামে এই ঘটনাত তীব্ৰ প্ৰতিক্ৰিয়া ব্যক্ত কৰি একেটা পৰিয়ালৰ পিতৃ, মাতৃ, ভাতৃ যদি ভাৰতীয়, তেন্তে আন এগৰাকী লোকক বিদেশী ন্যায়াধীকৰণে কেনেকৈ বিদেশী ঘোষণা কৰিব পাৰে বুলি প্ৰশ্ন কৰে ।