গোলাঘাট:ঐতিহাসিক সমলেৰে সমৃদ্ধ গোলাঘাট জিলাৰ দৈয়াং-ধনশিৰি অঞ্চলত আজিও পোত খাই আছে বহতো ঐতিহাসিক কীৰ্তিচিহ্ন ৷ স্থানীয় ৰাইজে ইয়াৰে কিছু উদ্ধাৰৰ বাবে চৰকাৰৰ সহযোগত প্ৰচেষ্টা অব্য়াহত ৰাখিছে । এই সমলৰ ভিতৰত অন্য়তম হৈছে কছাৰী ৰজাদিনীয়া বহু পুৰণি ভগ্নাৱশেষ । ইয়াতেই আছে ঐতিহাসিক শিলালিপি, মঠ-মন্দিৰ, পুখুৰী আদি।
ইতিহাস প্ৰসিদ্ধ স্থান ধনশিৰিৰ আছে বহু ঐতিহ্য তথা গৰিমা । ধনশিৰিৰ ইতিহাস প্ৰসিদ্ধ স্থানসমূহ গৱেষকসকলৰ বাবে এক প্ৰচুৰ সম্ভাৱনাৰ ক্ষেত্ৰ হিচাপে চিহ্নিত হৈছে ৷ সম্প্ৰতি এই স্থানসমূহত ক্ষেত্ৰ অধ্যয়নৰ বাবে মহাবিদ্যালয়-বিশ্ববিদ্যালয়ৰ পৰা ছাত্ৰ-ছাত্ৰী,গৱেষকসকলৰ সোঁত বৈছে ।
কছাৰী ৰজাদিনীয়া ভগ্নাৱশেষ :
২০১৬-২০১৮ চনতেই উদ্ধাৰ হৈছিল পূৰ্বৰ ধনশিৰি বৰ্তমানৰ সৰুপথাৰ সমজিলাৰ দুৱৰণি অঞ্চলৰ ১নং টেঙানি আলিছিঙাত এই ভগ্নাৱশেষ । উদ্ধাৰ হোৱা সম্পদসমূহৰ ৰক্ষণাবেক্ষণৰ দায়িত্বত থকা খৰ্গেশ্বৰ শ্যাম তুৰুং নামৰ লোকজনে এই সন্দৰ্ভত কয়, "হাফলু খান্দি উদ্ধাৰ কৰা হৈছে ইটাৰে নিৰ্মিত ভগ্নাৱশেষ । কছাৰী ৰজাদিনীয়া এই স্থানত হাফলু খান্দি উদ্ধাৰ কৰা এই ইটাৰে নিৰ্মিত ভগ্নাৱশেষে বহু ঠাই আৱৰি আছে । এই ইটা ভিন্ন প্ৰকাৰৰ । মুঠ চাৰি প্ৰকাৰৰ ইটাৰে নিৰ্মিত এই কছাৰী ৰজাদিনীয়া স্তুপবোৰ ।"
এই সন্দৰ্ভত দুৱৰণি শিৱ মন্দিৰৰ সভাপতি তথা স্থানীয় ব্যক্তি দৌলত কুমাৰে কয়, "১নং আলিছিগাত স্থানীয় ৰাইজে ডাঙৰীয়া পূজা কৰিছিল । পূজা-পাতল কৰোতে সেই স্থানতেই হাফলু দেখা পাইছিল । হাফলু খান্দোতেই উদ্ধাৰ হৈছিল ইটাৰে নিৰ্মিত সম্পদসমূহ । উদ্ধাৰ হোৱা সম্পদমূহ ১৬ শ শতিকাৰ বুলি ঠাৱৰ কৰা হৈছে । পূৰ্বতে কছাৰী ৰজাদিনীয়া যাগ-যজ্ঞ কৰা স্থান বুলি স্থানীয় লোকে অনুমান কৰিছে । ২০১৬-২০১৮ চনতেই এই স্থানত উদ্ধাৰ হোৱা সম্পদসমূহ বৰ্তমান খননকাৰ্য বন্ধ ৰাখিছে । স্থানীয় ৰাইজে অনুমান কৰা অনুসৰি যদিহে খননকাৰ্য চলোৱা হয় তেন্তে ৰজাদিনীয়া বহু সম্পদ উদ্ধাৰ হ'ব ।"