যোৰহাট : শনিবাৰে পুৱা ৯ বজাৰ পৰাই আৰম্ভ হৈছে ৰাজ্যত হাইস্কুল শিক্ষান্ত পৰীক্ষা । এইবাৰ ৰাজ্যত মুঠ ৪,২৯,৪৪৮ গৰাকী পৰীক্ষাৰ্থী অৱতীৰ্ণ হৈছে । তাৰ ভিতৰত ১,৯০,৬৫৩ জন ছাত্ৰ আৰু ২,৩৮,৭৯৫ গৰাকী ছাত্ৰী । ইফালে প্ৰথমবাৰলৈ অসম ৰাজ্যিক বিদ্যালয় শিক্ষা পৰিষদে হাইস্কুল শিক্ষান্ত পৰীক্ষা পৰিচালনা কৰিছে । বিগত বৰ্ষৰ তুলনাত এইবাৰ পৰীক্ষাৰ্থী সংখ্যা বৃদ্ধি পাইছে । ২০২৫ বৰ্ষত ৮,৭২০ গৰাকী পৰীক্ষাৰ্থী বৃদ্ধি পাইছে । সমান্তৰালকৈ পৰীক্ষা কেন্দ্ৰৰ সংখ্যাও বৃদ্ধি কৰা হৈছে । মুঠ ৯৪৪ টা কেন্দ্ৰত অনুষ্ঠিত হৈছে এই পৰীক্ষা ।
প্ৰথম দিনা ইংৰাজী বিষয়ৰ পৰীক্ষা অনুষ্ঠিত হৈছে । পুৱা ৯ বজাৰ লগে লগে পৰীক্ষা কেন্দ্ৰসমূহ শিক্ষাৰ্থী আৰু অভিভাৱকৰ ভিৰ দেখা গৈছে । ব্যতিক্ৰম নহয় যোৰহাট জিলা । জিলাখনৰো প্ৰতিটো কেন্দ্ৰতে পুৱাৰে পৰা ব্যস্ততা দেখা গৈছে । নিজ নিজ সন্তানক লৈ পৰীক্ষা কেন্দ্ৰৰ বাহিৰত ভিৰ কৰিছে অভিভাৱক তথা পৰিয়ালৰ সদস্যসকলে । সকলোৱে পৰীক্ষাৰ্থীসকলক শুভেচ্ছা জনাইছে । এগৰাকী অভিভাৱকে কয়,"পৰীক্ষাত অৱতীৰ্ণ সকলো শিক্ষাৰ্থীকে মই শুভেচ্ছা জনাইছো আৰু সকলোৰে উজ্জ্বল ভৱিষ্যৎ কামনা কৰিছো ।"
পৰীক্ষা কেন্দ্ৰৰ নিৰাপত্তা ব্যৱস্থা
ইফালে প্ৰতিটো কেন্দ্ৰতে কটকটীয়া নিৰাপত্তা ব্যৱস্থা গঢ়ি তোলা হৈছে । পৰীক্ষা কেন্দ্ৰৰ বাহিৰত আৰক্ষী তথা অৰ্ধসামৰিক বাহিনীও মোতায়েন কৰা হৈছে । পৰীক্ষাৰ্থীৰ বাহিৰে যাতে আন লোক কেন্দ্ৰৰ ভিতৰত প্ৰৱেশ কৰিব নোৱাৰে তাৰ প্ৰতি গুৰুত্ব আৰোপ কৰা হৈছে । এগৰাকী অভিভাৱকে কয়,"আগতে অভিভাৱকে ভিতৰলৈ যাব পাৰে, এইবাৰ ভিতৰত যাব নোৱাৰে । অভিভাৱক সকলো বাহিৰতে আছে ।" লক্ষণীয়ভাৱে বাকী জিলাৰ লগতে যোৰহাটৰো পৰীক্ষাকেন্দ্ৰসমূহত চিচিটিভি কেমেৰা স্থাপন কৰা হৈছে ।
