মিৰ্জা, 30 মে’ :ৰাজ্যত পুনৰ খাদ্যত বিষক্ৰিয়া হোৱা ঘটনা পোহৰলৈ আহিছে ৷ এইবাৰ বুটমাহ খাই অসুস্থ হৈ পৰিছে ডেকা-বুঢ়া-মেথাকে ধৰি বহু লোক ৷ এইবাৰ ঘটনাৰ স্থান দক্ষিণ কামৰূপৰ সানপাৰাৰ সাউদপাৰা ।
খাদ্যত বিষক্ৰিয়া (ET V Bharat Assam) জানিব পৰা মতে, বুধবাৰে প্ৰায় 130 টা পৰিয়ালে বাস কৰা সানপাৰা গাঁৱৰ অনাথ আশ্ৰম শিৱ মন্দিৰত ৰাইজে আয়োজন কৰিছিল জেঠমহীয়া নাম ৷ বুট-মগু এই নামত প্ৰসাদ হিচাবে উলিওৱা হৈছিল ৷ ৰাজহুৱা শিৱ মন্দিৰত আয়োজিত এই নামৰ প্ৰসাদ গ্ৰহণ কৰিছিল বহু লোকে ৷ ইমানলৈ সকলো ঠিকেই আছিল ৷
কিন্তু ঘটনা নিশা অৰ্থাৎ বুধবাৰে নিশাৰ পৰাই গাঁৱৰ অধিকাংশ লোকৰ স্বাস্থ্যৰ অৱনতি ঘটে । অতিমাত্ৰা শৌচ, বমি কৰাত বহু লোকক আজাৰা প্ৰাথমিক চিকিৎসালয়লৈ চিকিৎসাৰ বাবে প্ৰেৰণ কৰা হয় ৷ আনকি বহু লোকক ব্যক্তিগতভাৱে বিভিন্ন চিকিৎসালয়ত ভৰ্তি কৰোৱা হয় । প্ৰাথমিক চিকিৎসাৰ অন্তত চিকিৎসকে খাদ্যত বিষক্ৰিয়া হোৱাৰ ফলতে এনে ঘটনা সংঘটিত হৈছে বুলি মত প্ৰকাশ কৰিছে ৷
লগতে পঢ়ক :জিভাৰ জুতি নে জীৱন ? সাৱধানেৰে বাচনি কৰক - food poison case
জানিব পৰা মতে, বৰ্তমানেও আজাৰা প্ৰাথমিক চিকিৎসালয়তো প্ৰায় 50 জন লোক চিকিৎসাধীন হৈ আছে । ইফালে বুধবাৰে নিশাই এই প্ৰসাদ খাই এটি শিশুৰ স্বাস্থ্য অধিক বেয়াৰ ফালে গতি কৰাত আজাৰা প্ৰাথমিক চিকিৎসালয়ৰ চিকিৎসকে গুৱাহাটী চিকিৎসা মহাবিদ্যালয় হাস্পতাললৈ (GMCH) প্ৰেৰণ কৰে ৷ শেহতীয়াকৈ লাভ কৰা তথ্য অনুসৰি, বুধবাৰে নিশাই GMCH লৈ প্ৰেৰণ কৰা শিশুটিৰ ইতিমধ্যে মৃত্যু হৈছে ৷ মৃত 6 বছৰীয়া শিশুটিৰ নাম তৃষ্টিলীনা দাস ৷ এই বাতৰি বিয়পি পৰাৰ লগে লগে সমগ্ৰ অঞ্চলটোৰ ৰাইজ চিন্তিত হৈ পৰিছে ৷
ইফালে পৰিস্থিতি বিষম দেখি আজি (বৃহস্পতিবাৰ) পুৱাই স্বাস্থ্য বিভাগৰ এটা উপস্থিত হয় দক্ষিণ কামৰূপৰ সানপাৰাৰ সাউদপাৰা গাঁৱত ৷ বৰ্তমান স্বাস্থ্য বিভাগৰ দলটোৱে গাঁওখনত উপস্থিত হৈছে সকলো দিশ তন্নতন্নকৈ পৰীক্ষা কৰিছে ৷ লগতে গাঁওবাসীৰ স্বাস্থ্য পৰীক্ষা কৰাৰ বাবে যো-জা চলাইছে দলটোৱে ৷
লগতে পঢ়ক :পলু খাই বিষক্ৰিয়া হৈ ২০ গৰাকী লোক চিকিৎসাধীন - food poisoning in Tinsukia
