মৰাণ, ২৬ ফেব্ৰুৱাৰীঃ পূৰ্বে শিৱসাগৰ জিলাত থকা ঐতিহাসিক চৰাইদেউ মৈদাম শিৱসাগৰ জিলাত অন্তৰ্ভুক্ত হ'ব লাগিব বুলি দল-সংগঠনে দাবী জনোৱাৰ লগতে চৰাইদেউ জিলাৰ ৰাইজে চৰাইদেউ মৈদাম শিৱসাগৰ জিলাৰ অন্তৰ্ভুক্তি হোৱাতো নিবিচাৰে বুলি দাবী কৰিছিল । ইয়াৰ পিচতেই চৰাইদেউ মৈদামক লৈ দুয়োখন জিলাৰ মাজত সৃষ্টি হয় সংঘাতৰ । চৰাইদেউ মৈদাম ক্ষেত্ৰ সন্দৰ্ভত একাংশ সংগঠনে শিৱসাগৰত সংবাদমেলৰ জৰিয়তে বিৰ্তক সৃষ্টি কৰিব বিচৰা সন্দৰ্ভত প্ৰতিক্ৰিয়া প্ৰকাশ কৰিছে সোণাৰি সমষ্টিৰ বিধায়ক ধৰ্মেশ্বৰ কোঁৱৰে ।
সোণাৰি সমষ্টিৰ বিধায়ক ধৰ্মেশ্বৰ কোঁৱৰে আজি প্ৰতিক্ৰিয়া প্ৰকাশ কৰি কয় যে ১৯৮৩ চনত চৰাইদেউ মহকুমা গঠন হওঁতেই চৰাইদেউ মৈদাম ক্ষেত্ৰ চৰাইদেউ মহকুমাত অন্তৰ্ভুক্ত হৈছিল । গতিকে মৈদাম ক্ষেত্ৰৰ কাষৰীয়া বাসিন্দা সকলে নিজৰ ঠিকনাত চৰাইদেউ জিলা বুলি উল্লেখ কৰি আহিছে । তেনেস্থলত চৰাইদেউ মৈদাম চৰাইদেউ জিলাত অন্তৰ্ভুক্ত হোৱাৰ প্ৰাসংগিকতা আছে বুলি মন্তব্য কৰে বিধায়ক ধৰ্মেশ্বৰ কোঁৱৰে । এই সন্দৰ্ভত চৰকাৰে সিদ্ধান্ত গ্ৰহণ কৰিব বুলিও কয় বিধায়ক গৰাকীয়ে ।