কলিয়াবৰ, 1 মে’: সমগ্ৰ বিশ্বতে প্ৰতি বছৰে ১ মে’ত আন্তঃৰাষ্ট্ৰীয় শ্ৰমিক দিৱস পালন কৰা হয় । দেশৰ ভিন্ন প্ৰান্তৰ লগতে অসমতো বুধবাৰে পালন কৰা হয় মে’ দিৱস অথবা শ্ৰমিক দিৱস ৷
সমগ্ৰ কলিয়াবৰত অসম চাহ মজদুৰ সংঘ, জগদম্বা চাহ বাগিচা প্ৰাথমিক গোটৰ উদ্যোগত মহিলা সমিতি আৰু বাগিচা ৰাইজৰ সহযোগত শ্ৰমিক দিৱস পালন কৰা হয় । অসম চাহ মজদুৰ সংঘৰ নগাঁও শাখাৰ সভাপতি সুখদেৱ নায়ককে প্ৰমুখ্য কৰি ভালেকেইজন বিশিষ্ট ব্যক্তি উপস্থিত থাকে শ্ৰমিক দিৱসৰ অনুষ্ঠানত ।
উল্লেখ্য যে, মে’ দিৱস হিচাপেও জনাজাত এই দিৱস শ্ৰমিক শ্ৰেণীৰ অৱদানৰ স্মৃতিত, কঠোৰ আৰু অসুৰক্ষিত পৰিৱেশত কাম কৰা শ্ৰমিকসকলৰ প্ৰতি হোৱা অন্যায়ৰ বিৰুদ্ধে যুঁজিবলৈ পালন কৰা হয় । মে' দিৱস জীৱন আৰু প্ৰকৃতিৰ নৱীকৰণৰ আনন্দময় ক্ষণ উদযাপনৰ বাবে জনাজাত । শ্ৰমিক আন্দোলনৰ সফলতাৰ স্মৰণীয় অনুষ্ঠান হিচাপে সচৰাচৰ জনা যায় আন্তঃৰাষ্ট্ৰীয় শ্ৰমিক দিৱসক । এই দিনটোত ভাৰতকে ধৰি ৮০ খনতকৈও অধিক দেশত ৰাজহুৱা বন্ধ ঘোষণা কৰা হয় ।