বহুকেইটা বৃহৎ প্ৰকল্পৰ নিৰ্মাণকাৰ্যত বিলম্ব : তিনিশ শতাংশ পৰ্যন্ত বৃদ্ধি পাইছে নিৰ্মাণ ব্যয় - MAJOR PROJECTS IN ASSAM

Development Projects : শক্তিখণ্ডৰ পৰা ৰেলসেৱালৈ আৰু তৈলখণ্ডৰ পৰা পথ যোগাযোগ ব্যৱস্থালৈ বহুকেইটা প্ৰকল্পৰ নিৰ্ধাৰিত ব্যয় বহুগুণলৈ বৃদ্ধি। উদ্বিগ্ন কেন্দ্ৰীয় চৰকাৰ। পৰিসংখ্যা আৰু কাৰ্যসূচী ৰূপায়ণ দপ্তৰৰ প্রতিবেদনত অভাৱনীয়ভাৱে ধন আৰু সময় ব্যয় হৈছে সময়মতে ৰূপায়ণ নোহোৱা বহুকেইটা বৃহৎ প্রকল্পত। অসমসহ উত্তৰ-পূৰ্বাঞ্চলৰ কেইবাটাও প্ৰকল্পৰ ভিত্তিত বিশেষ প্ৰতিবেদন।

গুৱাহাটী, 3 জুলাই : নিৰ্মাণকাৰ্যৰ বিলম্বৰ বাবে অসমত বহুকেইটা প্ৰকল্পৰ ব্যয় বহুগুণে বৃদ্ধি পাইছে ৷ নিৰ্ধাৰিত সময়ৰ বিপৰীতে বছৰৰ পাচত বছৰ ধৰি শামুকীয়া গতিত নিৰ্মাণকাৰ্য চলি থকাৰ বাবে অসমত কেইটাও বৃহৎ প্ৰকল্পৰ নিৰ্মাণ ব্যয় অত্যধিক হাৰত বৃদ্ধি পাইছে ৷ লক্ষণীয় বিষয় যে অসমত এঘাৰটাকৈ বৃহৎ প্ৰকল্প নিৰ্মাণৰ নামত কেন্দ্ৰীয় চৰকাৰে অতিৰিক্তকৈ 26,283 কোটি টকা ভৰিব লগা হৈছে ৷ শক্তি খণ্ডৰ পৰা ৰে’ল সেৱা, তৈল খণ্ডৰ পৰা পথ যোগাযোগ ব্যৱস্থালৈ এই এঘাৰটা প্ৰকল্পৰ নিৰ্মাণ কেতিয়া শেষ হ'ব তাৰো কোনো নিশ্চয়তা এতিয়াও নাই ৷

উল্লেখ্য যে পৰিসংখ্যা আৰু কাৰ্যসূচী ৰূপায়ণ দপ্তৰে প্ৰকাশ কৰা এক প্ৰতিবেদন অনুসৰি সময়মতে ৰূপায়ণ নোহোৱা দেশৰ অৰ্ধশতাধিক বৃহৎ প্ৰকল্পৰ বাবে অভাবনীয়ভাৱে ধন আৰু সময় ব্যয় হৈছে ৷ এই তালিকাত অসম তথা উত্তৰ পূৰ্বাঞ্চলৰো বহু কেইটা প্ৰকল্প আছে ৷ বিভাগীয় তথ্য অনুসৰি এই প্ৰতিবেদনত নিৰ্মাণ ব্যয় বৃদ্ধি পোৱা কেইবাটাও প্ৰকল্পৰ ওপৰত আলোকপাত কৰা হৈছে ৷

নামনি সোৱণশিৰি জলবিদ্যুৎ প্ৰকল্প :

ব্যয় বৃদ্ধি পোৱা বৃহৎ প্ৰকল্পসমূহৰ ভিতৰত অন্যতম হৈছে নামনি সোৱণশিৰি জলবিদ্যুৎ প্ৰকল্প ৷ এই প্ৰকল্পটোৰ নিৰ্ধাৰিত নিৰ্মাণ ব্যয়তকৈ অতিৰিক্ত ব্যয় তিনিগুণ বৃদ্ধি পাইছে ৷ কিন্তু তথাপিও বৰ্ত্তমান সময়টো উৎপাদনৰ সময় পিছুৱাই থাকিব লগীয়া হৈছে ৷ নির্মাণ সম্পূৰ্ণ নোহোৱা প্ৰকল্পৰ ভিতৰত অসম-অৰুণাচল সীমান্তত নিৰ্মাণ কৰি থকা নামনি সোৱণশিৰি জলবিদ্যুৎ প্ৰকল্পটোৱে অভিলেখ স্থাপন কৰিছে ৷ এই প্ৰকল্পটোৰ নিৰ্মাণ 2010 চনৰ ছেপ্টেম্বৰ মাহত শেষ হ'ব লাগিছিল যদিও আজি পৰ্যন্ত সম্পূৰ্ণ হোৱা নাই ৷ প্ৰকল্পটোৰ নিৰ্মাণ সম্পূৰ্ণ কৰাৰ নতুনকৈ সময়সীমা নিৰ্ধাৰণ কৰা হৈছে 2026 চনৰ মে' মাহ ৷

চৰকাৰী তথ্য অনুসৰি এই প্ৰকল্পটোৰ আৰম্ভণিতে নিৰ্মাণ ব্যয় 6.285.33 কোটি টকা নিৰ্ধাৰণ কৰা হৈছিল ৷ কিন্তু নিৰ্ধাৰিত সময় বৃদ্ধি পোৱাৰ সমান্তৰালকৈ পুঁজি বৃদ্ধি পাই এতিয়া নতুনকৈ ইয়াৰ নিৰ্মাণ ব্যয় নিৰ্ধাৰণ কৰা হৈছে 21,247.54 কোটি টকা ৷ সময়মতে প্ৰকল্পটোৰ নিৰ্মাণ সম্পূৰ্ণ নোহোৱাত কেন্দ্ৰীয় চৰকাৰে ইয়াৰ বাবদ অতিৰিক্তকৈ 14,962 কোটি টকা ভৰিব লগা হৈছে ৷ অতিৰিক্ত ব্যয়ৰ হাৰ 283 শতাংশ ৷ আনহাতে সময় বৃদ্ধি পাইছে 188 মাহ ৷

লগতে পঢ়ক :ফলপ্ৰসূ হ'ল নে গুৱাহাটীৰ পাহাৰ সংৰক্ষণৰ বাবে হাতত লোৱা ৪ কোটিৰ প্ৰকল্প ? - Guwahati Hill Conservation

নামনি কপিলী জলবিদ্যুৎ প্ৰকল্প :

অসমত শক্তিখণ্ডৰ চলি থকা আন এটা প্ৰকল্প হৈছে নামনি কপিলী জলবিদ্যুৎ প্ৰকল্প ৷ এই প্ৰকল্পটো চলিত বৰ্ষৰ জুন মাহত সম্পূৰ্ণ হ'ব লাগিছিল যদিও ইয়াৰ কাম কেতিয়া শেষ হ'ব তাৰ কোনো নিশ্চয়তা নাই ৷ 120 মেগাৱাট বিদ্যুৎ উৎপাদনক্ষম নামনি কপিলী জলবিদ্যুৎ প্ৰকল্পটোৰ নির্মাণ ব্যয় 1,115.91 কোটি টকা নিৰ্ধাৰণ কৰা হৈছিল ৷ কিন্তু বৰ্তমানলৈ নিৰ্মাণ ব্যয় 1,795 কোটি টকা বৃদ্ধি পালে ৷ অর্থাৎ এই প্ৰকল্পটোৰ নামত কেন্দ্ৰই ইতিমধ্যে 680 কোটি টকা অতিৰিক্তকৈ ব্যয় কৰিব লগা হৈছে ৷

নতুন সংহত টাৰ্মিনেল ভৱন :

এই তালিকাত আছে গুৱাহাটীস্থিত লোকপ্ৰিয় গোপীনাথ বৰদলৈ বিমান বন্দৰৰ প্ৰসংগ ৷ 2016 চনত আৰম্ভ কৰা এই বিমান বন্দৰৰ নতুন সংহত টাৰ্মিনেল ভৱনৰ নিৰ্মাণ নিৰ্ধাৰিত সময়তকৈ চাৰি বছৰ পাৰ হৈ যোৱাৰ পিচতো কাম সম্পূৰ্ণ হোৱা নাই ৷ এই প্ৰকল্পৰ নিৰ্ধাৰিত নিৰ্মাণ ব্যয় আছিল 1,142 কোটি টকা ৷ কিন্তু নিৰ্মাণ ব্যয় বৃদ্ধি হৈ 2,333 কোটি টকা হৈছেগৈ ৷

নুমলীগড় শোধনাগাৰৰ সম্প্ৰসাৰিত প্ৰকল্প :

ৰাজ্যৰ তৈলখণ্ডৰ সম্প্ৰসাৰণৰ বাবে চৰকাৰে বিশেষ উদ্যোগ গ্ৰহণ কৰিছে ৷ নুমলীগড় শোধনাগাৰৰ উৎপাদন বৃদ্ধিৰ বাবে বিশেষ উদ্যোগ গ্ৰহণ কৰা হৈছে ৷ কিন্তু নিৰ্ধাৰিত সময়ত কাম সম্পূৰ্ণ নোহোৱাত বৃদ্ধি পাইছে নিৰ্মাণ ব্যয় ৷ ‘Numaligarh refinery Expansion Project 6 MMTPA Refinery' শীৰ্ষক বৃহৎ প্ৰকল্পটো নিৰ্ধাৰিত সময় অনুসৰি 14 মাহ পূৰ্বেই সম্পূৰ্ণ হ'ব লাগিছিল ৷ 2019 চনত কাম আৰম্ভ কৰা এই প্ৰকল্পটোত নিৰ্ধাৰিত নিৰ্মাণ ব্যয় আছিল 12,366 কোটি টকা ৷ কিন্তু নিৰ্ধাৰিত সময়ত কাম নোহোৱা বাবে ব্যয়ৰ পৰিমাণ 18,968 কোটি টকালৈ বৃদ্ধি পালে ৷ অর্থাৎ এই বৃহৎ প্ৰকল্পটোৰ নিৰ্মাণ ব্যয় অতিৰিক্তকৈ 6,602 কোটি টকা বাঢ়িল ৷

তৈলক্ষেত্ৰৰ আন এটা প্ৰকল্প :

অইল ইণ্ডিয়া লিমিটেডৰ 'Revamping of Facilities at Existing Guwahati Terminal, Assam' শীর্ষক প্ৰকল্পটোৰ 2020 চনত কাম আৰম্ভ কৰা হৈছিল ৷ অৱশ্যে এই প্ৰকল্পটোৰ নিৰ্মাণৰ নিৰ্ধাৰিত সময়সীমা এতিয়াও যথেষ্ট আছে যদিও ব্যয়ৰ পৰিমাণ বৃদ্ধি পাইছে ৷ 2026 চনত নিৰ্মাণ সম্পূৰ্ণ হ'বলগা এই প্ৰকল্পটোৰ নিৰ্ধাৰিত ব্যয় হৈছে 543.91 কোটি টকা ৷ কিন্তু এতিয়ালৈকে অতিৰিক্তকৈ 126.9 কোটি টকা ব্যয় কৰিব লগা হৈছে ৷ অনাগত দিনত এই অতিৰিক্ত ব্যয় আৰু অধিক বৃদ্ধি পোৱাৰ সম্ভাৱনা আছে ৷

লগতে পঢ়ক :সৌৰশক্তিৰ নিয়ন্ত্রণত জনতা ভৱন : সেউজ শক্তিৰ দেশৰ প্ৰথমটো সচিবালয় - Solar Power Plants at Janata Bhawan

শক্তিখণ্ডৰ প্ৰকল্প :

শক্তি খণ্ডৰ আন এটা প্ৰকল্প হৈছে 'North East-Northern-Western Interconnector-I, Part-C' ৷ এই প্ৰকল্পটোৰ কাম আৰম্ভ কৰা হৈছিল 2019 চনত ৷ এই প্ৰকল্পটোৰ নিৰ্মাণ ব্যয় নিৰ্ধাৰণ কৰা হৈছিল 1,326 কোটি টকা ৷ বর্তমানো কাম চলি থকা এই প্ৰকল্পটোৰ নামত এতিয়ালৈকে ব্যয় হৈছ 1,520 কোটি টকা ৷ অর্থাৎ কাম সম্পূর্ণ নৌহওঁতেই অতিৰিক্তকৈ প্ৰায় দুশ কোটি টকা ভৰিব লগা হ'ল ৷

উত্তৰ-পূব সীমান্ত ৰে'লৱেৰ প্ৰকল্প :

উত্তৰ-পূব সীমান্ত ৰে'লৱেৰ বঙাইগাঁও-গোৱালপাৰা-গুৱাহাটীৰ 176 কিলোমিটাৰ ৰে'লপথ নিৰ্মাণৰ কাম 2015 চনৰ এপ্ৰিলত আৰম্ভ কৰা হৈছিল ৷ প্ৰকল্প নিৰ্মাণৰ বাবে ধাৰ্য কৰা হৈছিল 2,232.32 কোটি টকা ৷ কিন্তু প্ৰকল্পটোৰ নিৰ্মাণ ব্যয় বৃদ্ধি হৈ 4,155.65 কোটি টকা হৈছে ৷ অর্থাৎ ৰে'ল বিভাগে এই প্ৰকল্পৰ বিপৰীতে বৰ্তমানলৈ অতিৰিক্তকৈ খৰচ কৰিব লগা হৈছে 1,923.33 কোটি টকা ৷

ৰাষ্ট্ৰীয় ঘাইপথ সম্প্ৰসাৰণৰ তিনিটা প্ৰকল্প :

ৰাজ্যত ৰাষ্ট্ৰীয় ঘাইপথ সম্প্ৰসাৰণৰ তিনিটা প্ৰকল্পৰ নামত অতিৰিক্তকৈ যথেষ্ট পুঁজি ব্যয় কৰিব লগা হৈছে ৷ মৰাণ বাইপাছৰ পৰা বগীবিললৈ যোৱা 37 নং ৰাষ্ট্ৰীয় ঘাইপথ চাৰি লেন কৰাৰ নামত ব্যয় নিৰ্ধাৰণ কৰা হৈছিল 252 কোটি টকা ৷ কিন্তু এই প্ৰকল্পৰ নামত এতিয়ালৈকে ব্যয় কৰা হৈছে 330.4 কোটি টকা ৷ সেইদৰে 54 নং ৰাষ্ট্ৰীয় ঘাইপথৰ বালাচাৰা-হাৰাংগাজাও পথছোৱা চাৰি লেন কৰাৰ নামত প্ৰকল্প ব্যয় নিৰ্ধাৰণ কৰা হৈছিল 818 কোটি টকা ৷ 2017 চনত আৰম্ভ কৰা এই কামটো এতিয়াও সম্পূৰ্ণ নোহোৱাত নির্মাণ ব্যয় 887.68 কোটি টকালৈকে বৃদ্ধি পালে ৷

আনহাতে নুমলীগড়ৰ পৰা যোৰহাটলৈ চাৰিলেন ৰাষ্ট্ৰীয় ঘাইপথ নিৰ্মাণৰ নামত ব্যয় নিৰ্ধাৰণ কৰা হৈছিল 454.89 কোটি টকা ৷ কিন্তু বৰ্তমানলৈ ইয়াৰ ব্যয় বৃদ্ধি পালে 814.56 কোটি টকা ৷ কাম লেহেমীয়া হোৱাৰ পৰিণতিত কেন্দ্ৰই অতিৰিক্তকৈ 359.67 কোটি টকা ভৰিবলগা হ'ল ৷ 2018 চনৰ মে' মাহৰ ভিতৰত ইয়াৰ কাম সম্পূৰ্ণ কৰাৰ লক্ষ্য নির্ধাৰণ কৰা হৈছিল ৷ অথচ নিৰ্ধাৰিত সময়তকৈ 70 মাহ পাৰ হৈ যোৱাৰ পাচতো এতিয়াও প্ৰকল্পটোৰ নিৰ্মাণ সম্পূৰ্ণ হোৱা নাই ৷ যাৰ ফলত প্ৰকল্পটোৰ নামত ব্যয় প্ৰায় 80 শতাংশলৈ বৃদ্ধি পাইছে ৷

মুৰ্কংচেলেক-পাচিঘাট সংযোগী ৰে'ল পথ :

মুৰ্কংচেলেক-পাচিঘাট সংযোগী ৰে'ল পথছোৱা নির্মাণ সম্পূৰ্ণ কৰাৰ লক্ষ্য 2020 চনৰ মাৰ্চ মাহৰ পৰা পিচুৱাই এতিয়া 2025 চনৰ মাৰ্চ মাহ ধাৰ্য কৰা হৈছে ৷ প্ৰকল্পটোৰ নিৰ্মাণ ব্যয় 414.84 কোটিৰ পৰা বৃদ্ধি পাই হৈছেগৈ 1187.49 কোটি টকা ৷ অর্থাৎ 186.25 শতাংশ নির্মাণ ব্যয় বৃদ্ধি পাইছে ৷ সেইদৰে নিৰ্ধাৰিত সময়তকৈ প্ৰকল্পটো নির্মাণ 60 মাহ পলম হৈছে ৷

ডিমাপুৰ-কহিমা সংযোগী ৰে'ল প্ৰকল্প :

শামুকীয়া গতিত চলি থকা আন এটা প্ৰকল্প হৈছে ডিমাপুৰ-কহিমা সংযোগী ৰে'ল প্ৰকল্পটো ৷ এই প্ৰকল্পটো 2015 চনৰ মাৰ্চ মাহত সমাপ্ত হোৱাৰ কথা আছিল যদিও এতিয়া 2026 চনৰ মাৰ্চ মাহতহে প্ৰকল্পটো সম্পূৰ্ণৰ লক্ষ্য স্থিৰ কৰা হৈছে ৷ যাৰ বাবে 2326.52 কোটি টকীয়া প্ৰকল্পটোৰ নিৰ্মাণ ব্যয় এতিয়া বৃদ্ধি পাই হৈছেগৈ 6663 কোটি টকা ৷ অর্থাৎ 186.39 শতাংশ বৃদ্ধি পাইছে প্ৰকল্প ব্যয় ৷

লক্ষণীয় বিষয় যে এই প্ৰকল্পকেইটাত কেইবাটাও ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ৰ নিৰ্মাণকাৰী প্ৰতিষ্ঠান জড়িত হৈ আছে ৷ নামনি সোৱণশিৰি জলবিদ্যুৎ প্ৰকল্প নিৰ্মাণত জড়িত হৈ আছে এন এইচ পি চিৰ দৰে নিৰ্মাণকাৰী প্ৰতিষ্ঠান ৷ ইতিমধ্যে প্ৰকল্পসমূহৰ সময় আৰু ব্যয় বৃদ্ধি পোৱাৰ প্ৰসংগত প্ৰধানমন্ত্ৰীৰ কাৰ্যালয় উদ্বিগ্ন হৈ বিষয়টোত হস্তক্ষেপ কৰিছে ৷

লগতে পঢ়ক :NHPC ভৱিষ্যতৰ বাবে এক অশনি সংকেত : মানৱ অধিকাৰ সংগ্ৰাম সমিতি - MASS Reacts On NHPC Dam