গুৱাহাটী, ১৮ ছেপ্টেম্বৰ :২০২৬ৰ বিধানসভা নিৰ্বাচনৰ প্ৰতি লক্ষ্য ৰাখি মুখ্যমন্ত্রী ড৹ হিমন্ত বিশ্ব শৰ্মা চৰকাৰে অসম চুক্তিৰ ৬নং দফা ৰূপায়ণ কৰাৰ নামত ভেঁকো-ভাওনা কৰিছে । বিপ্লৱ শৰ্মা আয়োগৰ ৫৭টা পৰামৰ্শ কাৰ্যকৰী কৰাৰ বাবে অসম কেবিনেটে লোৱা সিদ্ধান্ত সন্দৰ্ভত প্ৰশ্ন কৰি এই অভিযোগ উত্থাপন কৰে প্ৰদেশ কংগ্ৰেছৰ সভাপতি ভূপেন বৰাই ।
- 'কা' বলবৎ কৰি ৫নং দফা শেষ কৰিলে
বুধবাৰে দিছপুৰত এখন সংবাদমেল সম্বোধন কৰি ভূপেন বৰাই কয়,"অসম চুক্তিৰ ৫ আৰু ৬নং দফাক লৈ দীৰ্ঘদিন চৰ্চা হৈ আহিছে । কিন্তু ইয়াৰ মাজতে 'কা' বলবৎ কৰি অসম চুক্তিৰ ৫নং দফা শেষ কৰা হ'ল । ইফালে, অসম চুক্তিৰ ৬নং দফা ৰূপায়ণ সন্দৰ্ভত বিপ্লৱ শৰ্মা আয়োগে দিয়া প্ৰতিবেদন কেন্দ্ৰীয় চৰকাৰৰ বিপৰীতে অসম চৰকাৰে গ্ৰহণ কৰি বিগত ৪ বছৰ বিষয়টো গাপ দি ৰাখিলে । শেহতীয়াকৈ অসম চৰকাৰৰ লখিমপুৰত হোৱা কেবিনেটত বিপ্লৱ শৰ্মা আয়োগৰ ৫৭ টা পৰামৰ্শ কাৰ্যকৰী কৰাৰ সিদ্ধান্ত লোৱা হৈছে ।"
তেওঁ পুনক কয়, "১০টা পৰামৰ্শ কেন্দ্ৰীয় চৰকাৰৰ অধিকাৰৰ বিষয় বুলি কোৱা হৈছে । ৰাজ্য চৰকাৰৰ এই সিদ্ধান্তৰ বিষয়ে যদি কেন্দ্ৰীয় চৰকাৰ অৱগত তেন্তে কিয় কেন্দ্ৰীয় চৰকাৰে এটাও বিবৃতি দিয়া নাই । কাৰণ অসম চুক্তি ৰূপায়ণৰ গোটেই দায়িত্বটোৱেই হৈছে কেন্দ্ৰীয় গৃহ মন্ত্রণালয়ৰ । কিন্তু কেন্দ্ৰীয় চৰকাৰে এতিয়ালৈকে কোনো ধৰণৰ প্ৰতিক্ৰিয়া ব্যক্ত কৰা নাই । আনহাতে, বিপ্লৱ শৰ্মা আয়োগৰ পৰামৰ্শ সন্দৰ্ভতো অসম চৰকাৰে কোনো কথা ৰাজহুৱা কৰা নাই।"
- ১০টা পৰামৰ্শ সন্দৰ্ভত স্পষ্ট কৰা নাই কোনো কথা
চৰকাৰে কি কি পৰামৰ্শ কাৰ্যকৰী কৰিব তথা কেন্দ্ৰীয় চৰকাৰৰ অধিকাৰৰ ১০টা পৰামৰ্শ কি সেই সন্দৰ্ভত কোনো কথা স্পষ্ট কৰা নাই বুলি উল্লেখ কৰি তেওঁ কয়," কথা হৈছে যে কেন্দ্ৰৰ অধিকাৰৰ ১০ টা পৰামৰ্শ বাদ দি আমি প্ৰকৃত লক্ষ্যত থিয় দিব পাৰিম নে নাই ? কাৰণ সেই পৰামৰ্শ সমূহ ৬নং দফাৰ আত্মা । খিলঞ্জীয়াৰ বাবে আসন সংৰক্ষণ, ভাৰত-বাংলা সীমান্ত ছীল আদি গুৰুত্বপূৰ্ণ বিষয়ত কি হ'ব ? চিনাক্ত হোৱা বিদেশীক কি কৰিব সেই সন্দৰ্ভত স্থিতি কি হ'ব চৰকাৰৰ ? ইনাৰ লাইন পাৰ্মিটৰ ক্ষেত্ৰত কেন্দ্ৰীয় গৃহ মন্ত্ৰালয়ৰ স্থিতি কি হ'ব সেই সম্পৰ্কত স্থিতি স্পষ্ট হ'ব লাগিব ।"