তেজপুৰ, ২০ জুন :মুখ্যমন্ত্ৰী ড৹ হিমন্ত বিশ্ব শৰ্মাই বৃহস্পতিবাৰে তেজপুৰ চহৰৰ মিছন চাৰিআলিত উপস্থিত হৈ নিৰ্মীয়মাণ উৰণ সেতুখনৰ অগ্ৰগতিৰ বুজ লয় । উৰণ সেতুখন নিৰ্ধাৰিত সময়সীমাৰ ভিতৰত কাৰ্যক্ষম হ’ব পৰাটো নিশ্চিত কৰিবলৈ মুখ্যমন্ত্ৰীয়ে বিষয়াসকলক নিৰ্দেশ দিয়ে ।
উৰণ সেতুখনৰ নিৰ্মাণকাৰ্যৰ মানদণ্ডৰ সৈতে জড়িত নীতি-নিয়মসমূহ কোনো হেৰ-ফেৰ নোহোৱাকৈ মানি চলিবলৈ কয় বিষয়াসকলক । সংবাদ মাধ্যমৰ সৈতে হোৱা কথা-বতৰাত মুখ্যমন্ত্ৰীয়ে আশা প্ৰকাশ কৰে যে উৰণ সেতুখন কাৰ্যক্ষম হোৱাৰ লগেলগে শোণিতপুৰ জিলাৰ বাসিন্দাসকলৰ ভ্ৰমণ আৰু যাতায়তৰ দুৰ্দশা দূৰ হোৱাত যথেষ্ট সহায়ক হ’ব ৷ তেওঁ লগতে কয় যে ৰাজ্য চৰকাৰে মিছন চাৰিআলিক বাইহাটা চাৰিআলিৰ সৈতে সংযোগ কৰা ঘাইপথৰ অংশটো চাৰিলেনযুক্ত কৰাৰ চিন্তা কৰি আছে ৷ এই সন্দৰ্ভত কেন্দ্ৰীয় চৰকাৰলৈ পত্ৰ প্ৰেৰণ কৰাৰ কথাও জানিবলৈ দিয়ে মুখ্যমন্ত্ৰীগৰাকীয়ে ৷
আনহাতে মুখ্যমন্ত্ৰীয়ে আজি তেজপুৰস্থিত পল' খেলপথাৰ ক্ৰীড়া আন্তঃগাঁথনি প্ৰকল্পৰ উন্নীতকৰণৰ শুভাৰম্ভ কৰে ৷ এই প্ৰকল্পত ব্যয় হ’ব ৩.৯৭ কোটি টকা । প্ৰকল্পটোত দুখন বেডমিণ্টন ক’ৰ্ট, ৬৫ জনীয়া আসনৰ ক্ষমতাসম্পন্ন গেলেৰীৰ সৈতে অট্টালিকা, বাস্কেটবল ক’ৰ্টৰ উন্নয়ন, আভ্যন্তৰীণ বিদ্যুৎকৰণৰ কাম সন্নিবিষ্ট কৰা হৈছে ।