গোলাঘাট, ৭ মাৰ্চ : বৰ্ধিত প্লাষ্টিকৰ ব্যৱহাৰৰ বিৰুদ্ধে কাজিৰঙাত প্ৰায় অকলে যুঁজ দি গৈছে এজন ব্যক্তিয়ে । প্লাষ্টিকৰ পানীৰ বটলৰ পৰিৱৰ্তে নিজে প্ৰস্তুত কৰিছে এক বিশেষ বাঁহৰ বটল । কেৱল সিমানেই নহয়, এই বটলত পানীৰ সোৱাদ যোগান ধৰিছে কাজিৰঙালৈ অহা দেশী-বিদেশী পৰ্যটকক । লগতে প্লাষ্টিকৰ ব্যৱহাৰৰ বিৰুদ্ধে সজাগতা সৃষ্টি কৰি আহিছে ।
কাজিৰঙাত প্লাষ্টিক বৰ্জন আৰু প্লাষ্টিকৰ বটলৰ বিকল্প হিচাপে এই বিশেষ বটলবিধৰ প্ৰতি সকলোকে আকৃষ্ট কৰিবলৈ চেষ্টা চলাইছে ব্যক্তিগৰাকীয়ে । আনহাতে, 'কাজিৰঙা বেম্বো বটল' নামে পৰিচিত এই বাঁহৰ চুঙা ব্যৱহাৰ কৰি আকৰ্ষিত হৈ পৰিছে পৰ্যটকসকল । এই বটলৰ প্ৰতি আকৰ্ষিত হোৱা পৰ্যটকসকলৰ ভিতৰত এগৰাকী হৈছে গুজৰাটৰ পৰা অহা এগৰাকী পেছাত চিকিৎসকে পৰ্যটক । কাজিৰঙাত প্লাষ্টিকৰ বটলৰ বিকল্প হিচাপে এই বাঁহৰ বটলৰ আৰ্হি দেখি অভিভূত হৈছে চিকিৎসকগৰাকী । লগতে গুজৰাটতো তেওঁ এই ব্যৱস্থা প্ৰচলনৰ কথা উল্লেখ কৰিছে চিকিৎসকগৰাকীয়ে ।
প্ৰণিধানযোগ্য যে ২০১৯ চনতেই প্ৰধানমন্ত্ৰী নৰেন্দ্ৰ মোদীয়ে দেশবাসীক প্লাষ্টিক বৰ্জনৰ আহ্বান জনাইছিল । তেতিয়াৰে পৰাই প্ৰধানমন্ত্ৰীৰ আহ্বানৰ প্ৰতি সঁহাৰি জনাই প্লাষ্টিক বৰ্জনৰ বিপ্লৱ আৰম্ভ কৰে কাজিৰঙাৰ চন্দন নাথ নামৰ ব্যক্তিগৰাকীয়ে । প্ৰায় এককভাৱেই তেওঁ এই অভিযান অব্যাহত ৰাখিছে । পেছাগতভাৱে তেওঁ কাজিৰঙাত জীপ চাফাৰী পৰিচালনা কৰে । এই জীপ চাফাৰীৰ দ্বাৰা তেওঁ পৰ্যটকসকলক কাজিৰঙা দৰ্শন কৰায় । লগতে চলাই গৈছে প্লাষ্টিকৰ বিৰুদ্ধে নিজৰ অভিযান । ইফালে প্লাষ্টিকৰ বটলৰ বিকল্প হিচাপে বাঁহৰ চুঙাত পানী খাই দেশী-বিদেশী পৰ্যটকসকল অভিভূত হৈ হাতে হাতে লৈ গৈছে এই বাঁহৰ বটল ।