গুৱাহাটী : বাঁহৰ পৰা প্ৰস্তুত কৰা 'মোজা' ! শুনিবলৈ আচহুৱা যেন লাগিলেও বাঁহৰ পৰাই প্ৰস্তুত কৰা হৈছে মোজা । এই মোজা সাধাৰণ মোজা নহয় । বাঁহৰ পৰা প্ৰস্তুত কৰা এই মোজাৰ আছে ঔষধি গুণ । মধুমেহ ৰোগৰ ক্ষেত্রত বাঁহৰ দ্বাৰা প্ৰস্তুত কৰা মোজা যথেষ্ট উপকাৰী । ইতিমধ্যে দেশৰ বিভিন্ন চিকিৎসালয়ত ইয়াৰ ব্যৱহাৰ হৈছে ।
বাঁহৰ ক্ষেত্রত বিশেষভাৱে চহকী অসমতো উৎপাদন হ'ব বাঁহৰ পৰা প্ৰস্তুত কৰা মোজা । দিল্লীৰ এই প্ৰকল্প এতিয়া অসমতো ৰূপায়ণ কৰা হ'ব । অসমতো বাঁহৰ পৰা প্ৰস্তুত কৰা হ'ব মোজা । মোজাৰ উপৰি বাঁহৰ পৰা প্ৰস্তত কৰা হ'ব অন্তৰ্বাস (আণ্ডাৰৱেৰ) ।
ডিমা হাচাওত হ'ব বাঁহৰ পৰা মোজা প্ৰস্তুত উদ্যোগ
দিল্লীৰ 'বাৰ্ডকাৰ্টছ' (birdcarts) নামৰ কোম্পানীটোৱে অসমত স্থাপন কৰিব ইয়াৰ এটা উৎপাদন গোট । ডিমা হাচাওত তেওঁলোকে স্থাপন কৰিব এই প্ৰকল্প । গুৱাহাটীৰ খানাপাৰাত অনুষ্ঠিত হৈ থকা এডভাণ্টেজ আছাম ২.০ সন্মিলনত বুধবাৰে কোম্পানীটোৱে অসম চৰকাৰৰ সৈতে এক বুজাবুজিৰ চুক্তি স্বাক্ষৰ কৰে ।
৩৯ কোটি টকা ব্যয়সাপেক্ষে 'বাৰ্ডকাৰ্টছ' নামৰ কোম্পানীটোৱে ডিমা হাচাওত স্থাপন কৰিব এই প্ৰকল্প । ইতিমধ্যে তেওঁলোকে স্থান পৰিদৰ্শন কৰি বিনিয়োগৰ বাবে আগবাঢ়ি আহিছে ।
কি কি গুণ আছে এই বিশেষ মোজাৰ
খানাপাৰাত ই টিভি ভাৰতৰে হোৱা এক আছুতীয়া সাক্ষাৎকাৰত 'বাৰ্ডকাৰ্টছ'ৰ সঞ্চালক হৰেৰাম মিশ্ৰাই কয়, "আমি বাঁহৰ আঁহৰ (ফাইবাৰ) পৰা মোজা প্ৰস্তুত কৰোঁ । য'ত ভেল্যু এডিচনৰ বাবে এল'ভেৰা ব্যৱহাৰ কৰা হয় । বাঁহ নিজেই এণ্টি বেকটেৰিয়েল । এল'ভেৰাও এণ্টি বেকটেৰিয়েল । মধুমেহ ৰোগীৰ প্ৰতি লক্ষ্য ৰাখি ইয়াক প্ৰস্তুত কৰা হৈছে । ছেনজিটিভ ছালৰ বাবেও এই মোজা যথেষ্ট উপযোগী ।"
তেওঁ লগতে কয়, "এল'ভেৰাৰ সংমিশ্ৰণৰে বাঁহৰ আঁহৰ দ্বাৰ প্ৰস্তুত কৰা এই মোজা অতি আৰামদায়ক । এই মোজাৰ দ্বাৰা গৰমত ঠাণ্ডাৰ আৰু ঠাণ্ডাত গৰমৰ অনুভৱ হয় । আনহাতে এই মোজা সাতৰ পৰা দহ দিন পৰ্যন্ত ব্যৱহাৰ কৰিলেও কোনো অসুবিধা নহয় । সাধাৰণতে কেইবাদিন ব্যৱহাৰ কৰিলে মোজাৰ পৰা গোন্ধ ওলায় । কিন্তু এই মোজাত তেনে কোনো বেয়া গোন্ধ নোলায় ।"
বাঁহৰ মোজাৰ গুণাগুণ সন্দৰ্ভত তেওঁ আৰু কয়, "বাঁহৰ পৰা প্ৰস্তুত কৰা এই মোজা গোন্ধ প্ৰতিৰোধী মোজা । এইটো দিল্লীৰ কোম্পানী আৰু মেন্যুফেকচাৰিঙৰ ক্ষেত্রত ইণ্টেলিজেন ফেব্ৰিক টেকন'লজীৰ সৈতে টাইআপ আছে । আমাৰ এই কোম্পানী ২০২২ চনৰ পৰা চলি আছে ।"
এই মোজাৰ চাহিদা কিমান
বাঁহৰ মোজাৰ চাহিদা সন্দৰ্ভত তেওঁ কয়, "বাঁহৰ আঁহৰ দ্বাৰা প্ৰস্তুত কৰা এই মোজাৰ যথেষ্ট চাহিদা আছে যদিও আমি প্ৰয়োজন অনুসৰি যোগান ধৰিব পৰা নাই । বছৰি আমাৰ ১৫ কোটি টকাৰ টাৰ্ণ-অ'ভাৰ হয় । আমি আমাৰ যোগান বৃদ্ধি কৰাৰ বাবে অসমৰ ডিমা হাচাওত আমাৰ এটা প্ৰকল্প স্থাপন কৰিম ।"
বিনিয়োগ কৰিব ৩৯ কোটি
এই গোটটোত কৰিবলগা বিনিয়োগ সন্দৰ্ভত তেওঁ কয়, "ইয়াৰ বাবে আমি ৩৯ কোটি টকা বিনিয়োগ কৰিম । আজি এই প্ৰকল্পৰ বাবে অসম চৰকাৰৰ সৈতে বুজাবুজিৰ চুক্তি হৈছে । অসমত বাঁহৰ উৎপাদন যথেষ্ট বেছি । ডিমা হাচাওত বাঁহৰ ভাল উৎপাদন হয় । আমি ডিমা হাচাও ভ্ৰমণ কৰি সেই অঞ্চল চাইছোঁ ।"
তেওঁ লগতে কয়, "৪০ হাজাৰ বৰ্গ ফুট এলেকাত এই প্ৰকল্পটো কৰা হ'ব । এই প্ৰকল্পটোৰ যোগেদি প্ৰত্যক্ষভাৱে ২৬০ নিযুক্তি হ'ব । আনহাতে, পৰোক্ষভাৱে দুই হাজাৰৰো অধিক লোক নিযুক্ত হ'ব । মোজাৰ উপৰি আণ্ডাৰৱেৰো প্ৰস্তুত কৰা হ'ব ।"
কি প্ৰক্ৰিয়াৰে প্ৰস্তুত কৰা হয় বাঁহৰ মোজা
বাঁহৰ দ্বাৰা মোজা প্ৰস্তুত কৰা প্ৰক্ৰিয়া সন্দৰ্ভত তেওঁ কয়, "কেমিকেলি প্ৰচেছিং কৰি প্ৰথমতে বাঁহৰ আঁহ উলিওৱা হয় । তাৰ পাছত সেই আঁহৰ পৰা সূতা প্ৰস্তুত কৰা হয় । সেই সূতাত এল'ভেৰা ব্যৱহাৰ কৰি সামগ্ৰী বনোৱা হয় । দেশৰ বিভিন্ন প্ৰান্তলৈ আমাৰ এই সামগ্ৰী যায় আৰু যথেষ্ট চাহিদা আছে ।"
