বিশ্বনাথ চাৰিআলি: অহা ১৩ নবেম্বৰত ৰাজ্যৰ পাঁচটা বিধানসভা সমষ্টিত অনুষ্ঠিত হ'ব উপ-নিৰ্বাচন । বঙাইগাঁও, বিহালী, ধলাই, চিদলী আৰু চামগুৰি সমষ্টিত অনুষ্ঠিতব্য় উপ-নির্বাচনৰ বাবে ইতিমধ্য়ে সাজু কৰা হৈছে ভোটাৰ তালিকা । ইপিনে,দলীয় প্ৰাৰ্থীৰ নাম ঘোষণা নকৰিলেও সমষ্টিয়ে সমষ্টিয়ে প্ৰচাৰ অভিযান আৰম্ভ কৰিছে বিজেপি,কংগ্ৰেছৰ লগতে কেউটা ৰাজনৈতিক দলে ।
ৰাজ্যৰ ৫ টা বিধানসভা সমষ্টিৰ উপ-নিৰ্বাচনৰ দিন ঘোষণা হোৱাৰ পাছতে তৎপৰ হৈ পৰিছে শাসকীয় বিজেপি আৰু বিৰোধী কংগ্ৰেছ ৷ বিশেষকৈ উপ-নিৰ্বাচন অনুষ্ঠিত হ’বলগীয়া বিহালী আৰু চামগুৰি বিধানসভা সমষ্টি দখলৰ বাবে প্ৰচাৰ তীব্ৰতৰ কৰি তুলিছে বিজেপি আৰু কংগ্ৰেছে ।
এইবাৰ বিহালী সমষ্টিৰ উপ-নিৰ্বাচনৰ বাবে বিজেপিৰ হৈ মুখ্য প্ৰচাৰকৰ ভূমিকা গ্ৰহণ কৰিছে মন্ত্ৰী পীযুষ হাজৰীকাই । শুক্ৰবাৰে বিহালী সমষ্টিৰ ১১ টাকৈ বুথ কমিটীত সাংসদ ৰঞ্জিত দত্তক লগত লৈ কেইবাখনো সভাত অংশগ্ৰহণ কৰে তেওঁ । বিহালী সমষ্টিৰ সংখ্যালঘু অধ্যুষিত অঞ্চল নিজবাঘমাৰী ভোখখোৱা চাপৰিৰ সংখ্যালঘু ৰাইজক আগন্তুক উপ-নিৰ্বাচনত সমষ্টিটোত বিজেপিৰ প্ৰাৰ্থীগৰাকীৰ পক্ষত ভোট দিবলৈ আহ্বান জনায় ।
বিজেপি নেতা জয়ন্ত বৰা দল ত্যাগ
যোৱা বিধানসভা নিৰ্বাচনত বিহালীৰ পৰা নিৰ্দলীয়াভাৱে প্ৰতিদ্বন্দ্বিতা কৰি ২৪ হাজাৰ ভোট লাভ কৰিবলৈ সক্ষম হৈছিল জয়ন্ত বৰাই । তাৰ পিছত তেওঁ যোগ দিছিল বিজেপিত ৷ জয়ন্ত বৰাই শুক্ৰবাৰে বিজেপি দল ত্যাগ কৰা সন্দৰ্ভত মন্ত্ৰী পীযুষ হাজৰীকাই প্ৰতিক্ৰিয়া প্ৰকাশ কৰি কয়," জয়ন্ত বৰা কেইদিননো হৈছে বিজেপি দললৈ অহা । আচলতে জয়ন্ত বৰাৰ লক্ষ্যই হৈছে টিকট । তেওঁ এজন পৰিভ্ৰমী চৰাই দৰে, আহিব যাব । গতিকে তেওঁৰ দৰে মানুহক কোনে ৰাখিব । "