মহানগৰবাসীয়ে পাহৰিলে নেকি ভোগালীৰ ভোগৰ ৰন্ধন প্ৰকৰণ ?

সমুখত ভোগৰ উৎসৱ ভোগালী বিহু । ভোগালীৰ ভোগেৰে উভৈনদী হৈ পৰিছে মহানগৰী । গ্ৰাহক, বিক্ৰেতাৰ মনোভাৱ কেনে ? সৱিশেষ এই প্ৰতিবেদনত ।

গুৱাহাটী: তথাকথিত নগৰীয়াৰ ধামখুমীয়াত মহানগৰবাসীয়ে পাহৰি পেলাইছে নেকি পৰম্পৰাগত খাদ্য সম্ভাৰ ? বিশেষকৈ মাঘ বিহু বুলিলে বিভিন্ন প্ৰকাৰৰ লাড়ু পিঠা সান্দহ, চিৰা, বিবিধ জলপান, চুঙাপিঠা আদিয়ে প্ৰাধান্য পায় । শেহতীয়াভাৱে মহানগৰীত মাঘ বা ব'হাগ বিহুৰ সময়ত বিভিন্ন ধৰণৰ মেলা আয়োজন কৰা হয় ইয়াত সকলো প্ৰকাৰৰ খাদ্য সম্ভাৰ উভৈনদী হৈ পৰে । কিন্তু মহানগৰবাসীয়ে তেওঁলোকৰ নিজৰ ঘৰত এনেধৰণৰ খাদ্য সম্ভাৰ প্ৰস্তুত কৰাৰ চৰ্চা প্ৰায় এৰি দিছে ।

কিয় হৈছে এনেকুৱা ?

সময়ৰ অভাৱ, প্ৰয়োজনীয় কেঁচা সামগ্ৰীৰ অভাৱ, আগ্ৰহৰ অভাৱ, পৰম্পৰাগত খাদ্য সম্ভাৰৰ প্ৰতি বিৰাগ ভাৱ, নতুন প্ৰজন্মক এইবোৰৰ সৈতে জড়িত কৰোৱাৰ মানসিকতাৰ অভাৱ নে বাহিৰা খাদ্য সম্ভাৰৰ প্ৰতি অধিক আগ্ৰহী । এই সন্দৰ্ভত বিভিন্নজনে ব্যক্ত কৰিছে এই ধৰণৰ মনোভাৱ ।

দীঘলীপুখুৰীৰ ভোগালী মেলালৈ বিহুৰ বজাৰ কৰিবলৈ মহানগৰীৰ এগৰাকী গ্ৰাহকে কয়, "কৰ্মব্যস্ততা, ঠাইৰ অভাৱ আৰু পৰম্পৰাগত পিঠা লাড়ু বনাবলৈ নজনাৰ বাবেও বহু লোকে অসমীয়া পৰম্পৰাগত পিঠা লাড়ু বনাবলৈ এৰিছে । কিন্তু আমি বিহুৰ সময়ত নিজে পিঠা পনা বনাওঁ । ঘৰত ঢেঁকী নাই বাবে আমি ইয়াৰ পৰা ঢেঁকীত খুন্দা বৰা চাউলৰগুৰি প্ৰতিবছৰে নিবলৈ আহোঁ । ইয়াৰ পৰা বৰা চাউলৰ গুৰি লৈ গৈ ঘৰত নাৰিকল পিঠা, তিল পিঠা বনাওঁ । আমাৰ পৰম্পৰাটো এৰি দিব নালাগে । অলপ হ'লেও ঘৰত পিঠা পনা বনাব লাগে ।"

আনহাতে বৰ অসম ভোগালী মেলাৰ আয়োজকে কয়, "এইবাৰ ১৮ সংখ্যক ভোগালী মেলাৰ আয়োজন কৰিছোঁ । প্ৰথমে সৰুকৈ আয়োজন কৰিছিলো যদিও এতিয়া মেলাখন যথেষ্ট ডাঙৰ হৈছে। মেলাত ৰেডিমেড পিঠা পনাৰ বিক্ৰীৰ ব্যৱস্থা কৰা হৈছে । ব্যস্ততা বা আন বিভিন্ন কাৰণত ঘৰত পিঠা পনা নবনায় । আনহাতে একাংশই বনাবই নাজানে । বনাব নজনাটো দুখজনক কথা ।"

ইপিনে আন এগৰাকী গ্ৰাহকে কয়, "আমি বজাৰৰ পৰা কিনা পিঠা-লাড়ুৰ সোৱাদ নাপাওঁ । মেলাৰ পৰা কেঁচা সামগ্ৰী ক্ৰয় কৰি ঘৰতে বনাওঁ । ব্যস্ততা যিমান থাকিলেও নিজৰ ইচ্ছা থকাসকলে ঘৰতে বনাই । তদুপৰি নৱপ্ৰজন্মই আমাৰ পৰম্পৰাগত পিঠা লাড়ু বনাব নজনাৰ বাবে আমিয়ে জগৰীয়া । কিয়নো আমি তেওঁলোকক শিকাব পৰা নাই ।"

লগতে পঢ়ক:ভোগালীৰ আগমন, ঢেঁকীৰ চেৱত কঁপিছে ধেমাজি - PREPARATION FOR BHOGALI BIHU