গুৱাহাটী : যোৱা ডেৰদশক ধৰি বিতৰ্কই কোঙা কৰা অসম সাহিত্য সভা সভাপতিৰ নিৰ্বাচনক লৈ আকৌ বিতৰ্ক । কোন হ’ব অসম সাহিত্য সভাৰ ২০২৫-২৭ বৰ্ষৰ সভাপতি ? এগৰাকী মহিলা লেখিকা হ’বগৈ পাৰে অসম সাহিত্য সভাৰ পৰৱৰ্তী সভাপতি । ৫ জনীয়া তালিকা প্ৰস্তুত কৰিবলৈ আগবাঢ়িছে অসম সাহিত্য সভা । তাৰ ভিতৰত আছে দুগৰাকীকৈ সাহিত্য অকাদেমী বিজয়ী লেখিকা ৷ দুয়োৰে সন্মতিলৈ বাট চাইছে সাহিত্য সভাৰ নিৰ্বাচনী প্ৰক্ৰিয়াটোৰ সৈতে জড়িতসকলে ।
অসাহিত্যিকৰ ভিৰে লগালে পয়মাল:
অসম সাহিত্য সভাৰ পৰৱৰ্তী সভাপতি কোন হ’ব তাক লৈ তোলপাৰ লাগিছে সভাৰ ভিতৰচ’ৰা ৷ সভাপতিৰ আসনক লৈ চলিছে বিচিত্ৰ ৰাজনীতি ৷ অভিযোগ উঠিছে সাহিত্যিকৰ পৰিৱৰ্ত এইবাৰো অসাহিত্যিকৰ ভিৰ লাগিছে সভাপতিৰ আসন দখল কৰিবলৈ ৷ এই লৈ ৰাজ্যজুৰি সভাৰ শুভাকাংক্ষীসকলৰ মাজত তীব্ৰ প্ৰতিক্ৰিয়া হোৱাত কৌশল সলনি কৰি সভাপতিৰ পেনেল সলনি কৰি মান ৰক্ষা কৰিবলৈ আগবাঢ়িছে সভাৰ বৰ্তমানৰ নেতৃত্ব ।
অসম সাহিত্য সভাৰ বৰ্তমানৰ উপ-সভাপতি গিৰীশ সন্দিকৈক সভাপতি পাতিবলৈ এটা চক্ৰই উঠি-পৰি লাগিছিল । বিতৰ্কৰ আৱৰ্তত সোমাই পৰিছিল অসম সাহিত্য সভাৰ বিষয়ববীয়া নিৰ্বাচনৰ বাবে গঠন কৰি দিয়া উচ্চস্তৰীয় সমিতিখন । গোপনীয় তালিকা ৰাজহুৱাভাৱে চৰ্চিত হোৱাত কঠোৰ সমালোচিত হয় অসম সাহিত্য সভা ৷ যাৰবাবে অৱশেষত পৰৱৰ্তী সভাপতিৰ পেনেল বাতিলৰ প্ৰস্তাৱ দিবলৈ বাধ্য হ’ল অসম সাহিত্য সভাৰ বৰ্তমানৰ সভাপতিগৰাকীয়ে । অসম সাহিত্য সভাৰ উচ্চস্তৰীয় সূত্ৰৰ তথ্য অনুসৰি অসম সাহিত্য সভাৰ বৰ্তমানৰ সভাপতি সূর্যকান্ত হাজৰিকাই অসম সাহিত্য সভাৰ বিষয়ববীয়া নিৰ্বাচনৰ বাবে গঠন কৰি দিয়া উচ্চস্তৰীয় সমিতিক লিখিত এক প্ৰস্তাৱ আগবঢ়ায় ।
লগতে পঢ়ক:প্ৰথমবাৰৰ বাবে অসম সাহিত্য সভাৰ নিৰ্বাচন দুতৰপীয়া হ'ব
উল্লেখযোগ্য যে অসম সাহিত্য সভাৰ পৰৱৰ্তী পূর্ণাংগ অধিবেশনখন পাঠশালাত অনুষ্ঠিত হ’ব । ইয়াৰ পূৰ্বে সভাৰ ৮৪৯ খন সক্রিয় শাখাই এই নির্বাচনত ভোটদান কৰি বিষয়ববীয়া নিৰ্বাচন কৰিব । আনহাতে সভাৰ সভাপতি নির্বাচনক লৈ এইবাৰ সভাই আকৌ এবাৰ সংবিধান সংশোধন কৰি এখন সাতজনীয়া এখন উচ্চস্তৰীয় সমিতি গঠন কৰে । এই সমিতিয়ে পাঁচ গৰাকী ব্যক্তিক নির্বাচন কৰিব ৷ সভাপতি সূৰ্যকান্ত হাজৰিকাৰ প্ৰস্তাৱমতেই এতিয়া আকৌ নতুন ৫ জনীয়া তালিকা প্ৰস্তুত কৰাৰ দিশে আগবাঢ়িছে অসম সাহিত্য সভা ।