ৰঙিয়া, ৪ জুন : চলিত লোকসভা নিৰ্বাচনত অসমত ভোটগ্ৰহণৰ অন্তত ৰাজ্যৰ ১৪ খন আসনৰ ভিতৰত ১২ খন বিজেপিয়ে আৰু দুখনত মিত্ৰদলে জয়লাভ কৰিব বুলি ভৱিষ্যদ্বাণী কৰিছিল ৰাজ্যিক বিজেপিয়ে । কিন্তু শেহতীয়া ফলাফলত বিজেপিয়ে ৯ খন আৰু মিত্ৰদল অগপই এখন আৰু ইউ পি পি এলে এখন আসন দখল কৰিবলৈ সক্ষম হৈছে ।
বিজেপিৰ ফলাফলক লৈ ভৱেশ কলিতাৰ প্ৰতিক্ৰিয়া (ETV Bharat Assam) অৱশ্যে বিজেপিৰ প্ৰক্ষেপণ অনুসৰি আসন লাভ নকৰিলেও এই জয়লাভত সন্তুষ্টি লাভ কৰিছে ৰাজ্যিক বিজেপিয়ে । সংবাদ মাধ্যমৰ আগত নিজৰ প্ৰতিক্ৰিয়া প্ৰকাশ কৰি ৰাজ্যিক বিজেপিৰ সভাপতি ভৱেশ কলিতাই এই কথা কয় । লগতে বিজেপিয়ে পুনৰ চৰকাৰ গঠন কৰাক লৈ উৎসাহী বুলিও তেওঁ প্ৰকাশ কৰে ।
তেওঁ কয়, "বিজেপিৰ অসমত ১২ খন আসনৰ লক্ষ্য আছিল । কিন্তু যোৰহাটত আমাৰ ফলাফল বেয়া হ'ল । যোৰহাট লোকসভা সমষ্টিত পৰাজয়ৰ বিষয়ে দলৰ মজিয়াত আলোচনা কৰা হ'ব ।"
লগতে পঢ়ক :অসমৰ নিৰ্বাচনী যুঁজৰ ফলাফল : নগাঁৱত প্ৰদ্যুৎ, কোকৰাঝাৰত জয়ন্তৰ জয় - LOK SABHA ELECTION RESULTS 2024
আনহাতে, পোন প্ৰথমবাৰৰ বাবে মিত্ৰদল অগপই বৰপেটাত জয়লাভ কৰিছে । এয়া এক ঐতিহাসিক ক্ষণ বুলিও তেওঁ উল্লেখ কৰে । আনহাতে, পূৰ্বৰ কলিয়াবৰ তথা বৰ্তমানৰ কাজিৰঙা সমষ্টিত বিজেপি প্ৰাৰ্থী জয়ী হোৱাক লৈও তেওঁ মন্তব্য কৰে । তেওঁ কয় যে প্ৰথমবাৰৰ বাবে বিজেপিয়ে এই সমষ্টিটো নিজৰ দখললৈ নিয়াটো এক উল্লেখনীয় বিষয় । ইয়াৰ বাবে তেওঁ বৰপেটা আৰু কাজিৰঙা দুয়োটা সমষ্টিৰ ভোটাৰ ৰাইজক ধন্যবাদ জনায় ।
ইফালে আজমল পৰাস্ত হোৱাৰ বিষয়টো সন্দৰ্ভত ভৱেশ কলিতাই সংবাদ মাধ্যমৰ আগত কয়, "বদৰুদ্দিন আজমল হাৰিব বুলি আমি জানো । ধুবুৰীৰ জনগাঁথনি সুকীয়া । সেয়ে আমি তাত প্ৰভাৱ পেলোৱাটো কঠিন ।"
আনহাতে, সৰ্বভাৰতীয় স্তৰত বিজেপিৰ প্ৰদৰ্শন সন্দৰ্ভত মন্তব্য কৰি ৰাজ্যিক বিজেপিৰ সভাপতিগৰাকীয়ে কয় যে দেশত বিজেপিৰ প্ৰদৰ্শন বেয়া হোৱা নাই । কংগ্ৰেছে ১০০ খন আসনো লাভ কৰা নাই বুলি উল্লেখ কৰি তেওঁ কয় যে ইণ্ডিয়া এক 'ঘমন্দি' জোঁট । সেই কাৰণে সংখ্যাগৰিষ্ঠতা নাপালে । চৰকাৰ বিজেপিয়ে কৰিব আৰু নৰেন্দ্ৰ মোদীয়েই তৃতীয়বাৰৰ বাবে প্ৰধানমন্ত্ৰী হ'ব ।
লোকসভা নিৰ্বাচনৰ ফলাফলৰ অধিক বা-বাতৰিৰ বাবে ক্লিক কৰক :
https://www.etvbharat.com/en/!elections/election-2024
