স্প’ৰ্টছ ডেস্ক, 15 ছেপ্টেম্বৰ: অষ্ট্ৰেলিয়াৰ বাওঁহতীয়া বিস্ফোৰক অ’পেনিং বেটছমেন ট্ৰেভিছ হেডৰ বাবে কোনো দুঃস্বপ্নতকৈ কম নহয় টীম ইণ্ডিয়া ৷ এই বেটছমেনগৰাকীয়ে ভাৰতৰ বিৰুদ্ধে অতি দৰ্শনীয় প্ৰদৰ্শন দাঙি ধৰি কিছুমান স্মৰণীয় ইনিংছ খেলিছে ।
2023 চনত আই চি চি-ৰ দুখন মেচত দুৰ্দান্ত প্ৰদৰ্শন দাঙি ধৰি কেংগাৰু বাহিনীক জয়ৰ সোৱাদ দিয়াত গুৰুত্বপূৰ্ণ ভূমিকা পালন কৰিছিল হেডে ।
আই চি চি-ৰ দুখন ফাইনেলত ভাৰতৰ পৰাজয়ৰ কাৰণ
‘দ্য অ’ভেল’ত অনুষ্ঠিত হোৱা বিশ্ব টেষ্ট চেম্পিয়নশ্বিপৰ ফাইনেলৰ পাছত ভাৰতত অনুষ্ঠিত এদিনীয়া বিশ্বকাপৰ ফাইনেলত 140 কোটি ভাৰতীয়ৰ হৃদয় ভাঙি পেলোৱাৰ মূলতে আছিল ট্ৰেভিছ হেড ৷ এই দুয়োখন মেচতে ক্ৰিকেটাৰগৰাকীয়ে শতক অৰ্জন কৰি ডাঙৰ মেচৰ খেলুৱৈ হিচাপে তেওঁৰ নাম অধিক শক্তিশালী কৰি তুলিছিল ।
ভাৰত প্ৰিয় প্ৰতিদ্বন্দ্বী নহয়: হেড
ভাৰতীয় ক্ৰিকেট দলৰ বিৰুদ্ধে অপৰিসীম সফলতা লাভ কৰাৰ পিছতো ক্ৰিকেটাৰগৰাকীয়ে স্বীকাৰ কৰিছে যে, ভাৰত তেওঁৰ "প্ৰিয়" প্ৰতিদ্বন্দ্বী নহয় । সংবাদ মাধ্যমৰ সৈতে হোৱা এক বিশেষ বাৰ্তালাপত অষ্ট্ৰেলিয়াৰ বেটছমেনগৰাকীয়ে ভাৰতৰ দৰে শক্তিশালী দলৰ বিৰুদ্ধে খেলাটো এক বৃহৎ প্ৰত্যাহ্বান বুলি প্ৰকাশ কৰে ।